Read Biete DÂNNIKNA 25 Bible Online

DÂNNIKNA 25 - Biete bible

DÂNNIKNA 25

¹“Israel mi inikah, thu buai an neiin chu roirêlnaah khan fêng an ta, roirêltuhei khan lei rêl pêk an ta, mi fel kha thiam inchang an ta, mi sual kha thiamno an inchang rang a nit.

²Mi sual khah ito inrup a nitin chu, roirêltu khan a khupin inzâl a ta, a mu chung ngêiah ân tôk rang a nit, â sual dân izirin itôk rang zâk chu iten rang a nit.

³Voi sômilika tenah itoh thei nîng a ta, kha nêka tam chu a nit rang ni mak; kha nêka tam nin itôkin chu nin imusit ai nit rang a nit.

⁴“Serâtchalin bu a chîl lâiin a mûr nin khuap rang ni mak.

⁵“Ipa urnaikah munkan om sela, naipa nei loiin khatkah kha thi ta sela, â thi tâk nupui khan putianga mi, mi dang pasalin a nei rang ni mak a; a pasal inzirpui khan ani khah nupuiin a lua rang a nit, inzirpui tho rang khah ithon, nupuiin a nei rang a nit.

⁶Kha nupang neh nai ipa an inei masatak kha â thi tâk ân zirpuipa naia be nîng a ta; khanchu, Israel richi suinaah â thi tâk riming khah ai boi ino rang a nit.

⁷Khannisela, ani khan ân zirpuipa nupui khah a nei nuam non chu, ân zirpuipa nupui khah kho ulianhei ziangah fêng a ta, ‘Ki pasal inzirpuipa hin Israel lâia an zirpuipa riming in-om mai nuam mak a, pasal inzirpuipa tho tum khah ki chungah tho nuam mak,’ a ti rang a nit.

⁸Khanungchu, an kho ulianhei khan ani khah koi an ta, risônpui an ta; kha ten khoma ani khan, ‘Kî nei nuam ino a nit,’ itia a la khir khapin chu,

⁹ân zirpuipa nupui khan ulianhei makungah khan ani khah hang pun a ta, a pheikok kiangkah khêng pêk a ta, a mâiah ichil a ta, ‘Ân zirpuipa insungkua inding nuam inotu chungah khan hingka hin itho ni riseh,’ a ti rang a nit.

¹⁰Khanchu, a insungkua kha, “A pheikok ikhêng pêka insungkua,” itin Israelhei lâiah khan riming inriput ai nit rang tâk a nit.

¹¹“Mi inikah risual sela, khatka nupui khan a pasal isanin arsualpuitu ser khah a man pêkin chu,

¹²kha nupang kut khah nin tan pêk rang a nit, lung nin inkham rang ni mak.

¹³“Rikhîna neh ritâna nin mangin mi nin lêm rang ni mak.

¹⁵Rikhîna neh ritâna dik tak neh fel tak nin mang rang a nit; khanchu, PUMAPA nin Pathianin nangni ai pêk ramah khan nin ring nin dam sôt a ti.

¹⁶Milêmsia murdi kha PUMAPA nin Pathian ringaiin porinche an nit.

¹⁷“Aigupta ram ata nin hong suakna lampuia Amalekhei nangni lei tho dân khah remai rei.

¹⁸Pathian khom ṭi loiin nin sôl nin rizal neng lâiin nungtianga rithokin nangni an doi a, nin lâia nung ita murdi an that riai dânhei kha.

¹⁹Khasikin, PUMAPA nin Pathianin nin lua ranga ram nangni ai pêkah khan nin irâlhei murdi ata PUMAPA nin Pathianin râlringamna nangni a pêk tikah khan Amalekhei hi nin that infâi vang rang a nit, vân nuaiah anmani riatmaina khah îte nin zua rang ni mak e. Ringil tlak no rei.