Read Biete DÂNNIKNA 26 Bible Online

DÂNNIKNA 26 - Biete bible

DÂNNIKNA 26

¹“PUMAPA nin Pathianin nin lua ranga ram nangni ai pêk nin chuan a, nin va om tenan chu,

²PUMAPA nin Pathianin nangni ai pêk ram rinênga chimu nin învâng masa tak murdi ata ichîn chînkah kha bêmah thun nin ta, PUMAPA nin Pathianin amah chubai ûnna ranga mun ai bîkah khan nin chôi rang a nit.

³Khante, kha zoroah khan thiampu ziangah fêng nin ta, a ziangah, ‘Nê peh ranga kin pi neh puhei zianga ṭong a lei irkhâm ram ki hong lût tâk iti vuanah hin PUMAPA kin Pathian ziangah kin înlang a nit,’ a ti rang a nit.

⁴“Thiampu khan nin kut ata bêm khah lâng a ta, PUMAPA nin Pathian mâichâm kôlah a sia rang a nit.

⁵Khanungchu, nangmanin PUMAPA nin Pathian maah khan, ‘Ki pu bul chu Aram mi, mi vâi mi lêng a nit a; a insungkuahei neh Aigupta ramah an zu fe a, an zu om a, iroichekah an nit a; khannisela, kha ramah khan nam roinpui tak ritha nei tak, itam tak an hong nit tâk a.

⁶Aigupta mihei khan an nuam an ne lo a, deng an nen thei a, sin intak tak an nen sin a.

⁷Khanungchu, PUMAPA kin pi neh puhei Pathian khah kin isam a, PUMAPA khan kin rôl khah a lei riat a, kin tuangziahei, kin dengtheiziahei, sirde kin nitziahei khah a mu a.

⁸Khante, PUMAPA khan Aigupta ram ata khah a bân ritha rât imangin, thil inrîttakhei, risinsianahei thil rikhêl tak takhei a tho a, a ne ṭhui suak tâk a,

⁹Hi munah hin a ne ṭhui inlût a, hi ram dût neh khuaitui luangna ram hih a ne ipêk tâk a nit.

¹⁰Atûnah hin, O PUMAPA, nangman ni ne ipêk rinêng irâ masa takhei chu kin hong ichôi a nit,’ nin ti rang a nit. “Khanungchu, bêm kha PUMAPA nin Pathian maah inṭhung nin ta, PUMAPA nin Pathian maah chubai iûnin nin ikhûn rang a nit.

¹¹PUMAPA nin Pathianin nangmani neh nin insungkuahei thil iṭha nangni ai pêk murdiah khan râiifân takkan nin om rang a nit; Levia chihei neh nin lâia om ram dang mihei khom nin lômna ruaiah khan nangni zom sa sela, ilôm takkan om riseh.

¹²“A kum ithumna kuma nin chimu invâng sômka khatkah kha nin lâia om Levia chihei, ram dang mihei, farahei neh numeihei nin pêk rang a nit; khanchu, khotinah ifah rang an inei chit rang a nit.

¹³Amakhah nin tho zoiin chu PUMAPA nin Pathian ziangah, ‘Thil iser, sômka khatkah chu, ki inah atûnah hin îte ikol khâi mang e; ni thu ne pêk lam angkah takin Levia chihei, ram dang mihei, numeihei, farahei ki pêk zoi vang tâk a; ni thupêk khah îte iseh mang a, ringil khom ringil mang e.

¹⁴Ki lusûn lâiin khatkah khom fah mang a; ke nim lâiin khatkah khom la suak mang a, mithi rang thillanin khatkah khom lan mang e; PUMAPA ki Pathian ni rôl chu ker ngai a, ni thu ne pêk murdi angkah takah khan kî tho riai a nit.

¹⁵Ni omna mun rithiang rivân ata zuk thlîr inla, ni mi Israelhei ṭhatvur roh; khabanah, kin pi neh puhei zianga ṭong ni lei irkhâm tâk dung izuia ni ne ipêk dût neh khuaitui luangna ram khom hih ṭhatvur roh,’ nin ti rang a nit.

¹⁶“Vuanah hin PUMAPA nin Pathianin hi dânhei murdi hih izôm rangin thu nangni ai pêk a nit; khasikin, nin lungril murdi neh nin ringna murdia pomin nin zôm rang a nit.

¹⁷Vuanah hin PUMAPA chu nin Pathianin nin ipom tâk a; a lampuihei izuia, a dânhei, a thupêkhei murdi izôm rangin nin inkung tâk a.

¹⁸Vuanah hin nangni a înkung pêk angkah khan ama dongtum bîk mihei inih rangin nangni a îpom tâk a nit.

¹⁹A lei iti tâk angkan PUMAPA nin Pathian ta ranga mi rithiang nin nit theina rang neh nam ai siam tâk murdi lâia nam roinpui takin nangni a siam a, inpâknahei, riming ṭhatnahei, chôiinrisângnahei idong rangin PUMAPAN nangni a irthlang a nit,” a ti a.