Read Biete DÂNNIKNA 27 Bible Online

DÂNNIKNA 27 - Biete bible

DÂNNIKNA 27

¹Khanungchu, Mosia neh Israel ulianhei khan mipuihei ziangah, “Vuaninta thupêk nangni kî pêk murdi hi zôm rei.

²Jordan dung nin rikan nî a, PUMAPA nin Pathianin nangni ai pêk ram nin va lût tikin chu lung ilian tak tak nin phun rang a nit, lung inrimanna mangin nin innâm rang a nit.

³Kha chungah khan hi dân murdi hih nin riziak rang a nit. PUMAPA nin pi neh puhei Pathianin nangni a lei înkung pêk angkah khan dût neh khuaitui luangna ram, PUMAPA nin Pathianin nangni ai pêk ram khah nin lût a,

⁴Jordan dung râl tiang nin om tenan chu vuaninta thu nangni kî pêk angkah hin Ebal tlângah khan lunghei phun unla, lung inrimanna mangin nin innâm rang a nit.

⁵Khante, kha ramah khan PUMAPA nin Pathian ta rang lungin mâichâm nin siam rang a nit, kha lung khah thîra suk a nit rang ni mak.

⁶PUMAPA nin Pathian mâichâm rêng rêng chu suk loi lung imang rang a nit; amakhan PUMAPA nin Pathian ta ranga hâlrivâm thillanhei nin lan rang a nit;

⁷ringeina thillanhei khom amakhan lan nin ta, nin fâk rang a nit; PUMAPA nin Pathian maah khan râiifân takkan nin om rang a nit.

⁸Khante, lungphunah khan hi dânhei hih ifiang takkan nin riziak rang a nit,” itin thu a pêk a.

⁹Khanungchu, Mosia neh Levia chi thiampuhei khan Israel mi murdihei ziangah khan, “O Israel mihei o, iṭha takkan ringai rei; vuanah hin PUMAPA nin Pathian mihei nin hong nit tâk.

¹⁰Khasikin, PUMAPA nin Pathian thu chu nin zôm rang a nit, vuaninta thu nangni kî pêk, thupêkhei neh dânhei hih nin zôm rang a nit,” an ti a.

¹¹Kha nî ngirah khan Mosia khan mipuihei khah thu a pêk a,

¹²“Jordan dung nin rikan a, mipuihei rang ṭhatvurna inpuang lâiin hi namhei hih Gerizim tlângah an iding rang a nit; Simeona namhei, Levia namhei, Juda namhei, Isakara namhei, Josefa namhei, Benjamina namhei.

¹³Vânisâmna inpuang lâiin hi namhei hih Ebal tlângah an iding rang a nit; Reubena namhei, Gada namhei, Asera namhei, Zebuluna namhei, Dana namhei, Naftalia namhei.

¹⁴Levia chihei khan hi thu hih Israel mi murdi ziangah rôl iring takkan an inpuang rang a nit.

¹⁵“‘Kutithiamhei kutsuak PUMAPA ta ranga porinche mirmil isiam manih, inrûkka dôna chubai iûn manih chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.

¹⁶“‘Tukhom a nu manih, a pa manih marit tho no kangân chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.

¹⁷“‘Tukhom a bungtualbôm ramrî thontu chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.

¹⁸“‘Tukhom lampui ninoa mitdel infetu chu vânisalin om riseh,’ tîng an ta. “Mipui murdi khan, ‘Amen’ an lei rang a nit.

¹⁹“‘Tukhom ram dang mihei, naifarahei, numeihei, roi dik ino taka rêl pêktu chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.

²⁰“‘Tukhom a pa nupui izâlpuia, a pa mualphoi isaktu chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.

²¹“‘Tukhom sial-ui-ar isehpuitu chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.

²²“‘Tukhom a farnu tak tak manih, a pa nainu manih, a nu nainu manih ichâipuitu chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.

²³“‘Tukhom a tarpi châipuitu chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.

²⁴“‘Tukhom inrûkka a bungtualbôm ithattu chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.

²⁵“‘Tukhom mi ningsiat sin ino thatna ranga sum ilahtu chu vânisalin om riseh,’ tîng an ta. “Mipui khan, ‘Amen’ an lei ti rang a nit.

²⁶“‘Tukhom PUMAPA dânhei neh inriseinahei murdi zôm inotu chu vânisalin om riseh,’ tîng an ta. “Mipui murdi khan, ‘Amen’ an lei ti rang a nit.