Read Biete DÂNNIKNA 28 Bible Online

DÂNNIKNA 28 - Biete bible

DÂNNIKNA 28

¹“PUMAPA nin Pathian ṭongbâi suak chu iṭha takka nin ringai a, vuaninta thu nangni kî pêk, a thupêk murdihei ridîn takkan nin zômin chu, PUMAPA nin Pathian khan rammuala nam murdi lâia ân chung takin nangni siam a ti.

²PUMAPA nin Pathian thu nin zôm ngânin chu hi ṭhatvurna murdihei hih nin ta ni mai a ti.

³“PUMAPA khan in tiang neh loi tiang ṭhat nangni vur a ti.

⁴“PUMAPA khan irila râhei, nin rinêng irâhei, nin sial neh bera lômhei nangni inpung pêkin ṭhat nangni vur a ti.

⁵“PUMAPA khan nin bu bêm neh nin bu khênghei ṭhat nangni vur pêk a ti.

⁶“PUMAPA khan nin sintho murdi ṭhatvur a ti.

⁷“PUMAPA khan nin irâlhein nangni an doi lâiin nangni nê pêk a ta, nangni doi rangin lam khatka tah hong an ta; khanniseh, nangmani ata kil tinah lâizâm thông an ti.

⁸“PUMAPA khan nin kut sintho murdi ṭhatvur a ta, nin fasiar khah bu insip a ti. Ram nangni ai pêkah khan ṭhat nangni vur a ti.

⁹“Nin zianga ṭong a lei irkhâm tâk angkan PUMAPA nin Pathian thupêkhei nin zôm a, a lampuihei nin zui ngânin chu ama ta ranga nam rithiangin nangni indet a ti.

¹⁰Khanchu, rammuala nam tinin PUMAPA ta nin nit iti riang an ta, nangni ṭi an ti.

¹¹Nangni peh ranga nin pi neh puhei zianga ṭongrikhâma a lei înkung ramah PUMAPA khan nin irila râhei, nin ranhei, nin rinêng irâhei rikhêl takkan nangni inpung pêk a ti.

¹²PUMAPA khan a hun taka nin ram ifâ rang ruatui nangni peh rang neh nin kut sintho murdi ṭhat nangni vur rangin rivâna archon kok iṭha khah nangni ong pêk a ta; khanchu, nam itam takkah inritâng nin ta; khannisela, nangmanin chu ritâng no tin u.

¹³PUMAPA khan nam tin tin lâiah, an inung izuitu nih loiin, a lu takin nangni siam a ta, ân thuai tak nih loiin, ân chung tak nih mai nin ti; PUMAPA nin Pathian thupêkhei, vuaninta nangni kî pêk hih nin zôm ngânin chu.

¹⁴A thuhei ata hih changtiang manih, voi tiang manih, nin pêt rang ni mak a, pathian danghei izui a, an sin itho rangin nin pêt tlak rang ni mak e.

¹⁵“Khannisela, PUMAPA nin Pathian ṭongbâi suak khah iṭha takka nin ringai noa, vuaninta thu nangni kî pêk, a thupêkhei neh a dânhei murdi hih ridîn takka nin zôm non chu hi vânisalna murdihei hih nin chungah ai tlung rang a nit.

¹⁶“PUMAPA khan nin in neh nin loimahei vâni sâm a ti.

¹⁷“PUMAPA khan nin bu bêm neh nin bu khênghei vâni sam a ti.

¹⁸“PUMAPA khan vâni nangni sâmin, nai iroi chekah, bu roi chekah, sial neh bera iroi chekah bang nangni pêng a ti.

¹⁹“PUMAPA khan nin sintho murdi vâni sâm a ti.

²⁰“Thil ṭhano nin sina, PUMAPA nung nin songin chu PUMAPA khan nin chungah siatnahei, buainahei, inkhôknahei zuang ithlun a ta, voikazelin inrimang riaiin om nin ti.

²¹Nin lua rang ramah khan nangni ân rimang riai mâkah ripui nangni inrivoi a ti.

²²PUMAPA khan rî ṭhanohei nangni inrivoi a ta, ithlingnahei, inkhurnahein kuttum nangni thông a ta, nin chimu seh rangin ithli lumhei, ramnahei tir a ta, nin rimang mâkah chu hi siatnahei hin nangni rizûl mai a ti.

²³Ruatui sûr khâi no nia, nin rinêng chu ritap lung angkah nîng a ti.

²⁴Nin ramah ruatui rithûlin PUMAPA khan ipil neh bali khû nangni tir pêk a ta, nin rimang riai mâkah chu nin chungah nangni invur a ti.

²⁵“PUMAPA khan nin irâlhei makungah nangni intlôm a ta, anmani doi rangin lampui khatka tah fêng nin ta; khannisela, kil tinah lâizâm thông nin ti; rammuala nam tinin nin chunga thil itlung khah an mun chu rikhêl itin iṭi rilônthingin om an ti.

²⁶Nin ruak khah chunga vuang iva murdi neh ram sa murdihein fâng an ta; tute a ûm rizûl rang om no nih.

²⁷Aiguptahei irvoi angkana indam thei ino sakhuai hei, pânsia hei, ithlingna hei, uithak hei kha PUMAPA khan nangni inrivoi a ti.

²⁸Invêtna hei, mitdelna hei, ṭina hei nin chunga thlunin PUMAPA khan kuttum nangni thông a ta;

²⁹mitdelin izîng khapka a irmai ngai angkan sûn khovârah khom rimai zal nin ta; nin sinthona tinah vângsak no tin ua; sirde neh irok vangin om rizom zat nin ta; nangni inzôk rang tute om no nih.

³⁰“Nupui hual nin ta, mi dangin nangni nei pêk an ti. In sin nin ta, lua no tin u. Grep rikul siam nin ta, a grep irâ chu fah no tin u.

³¹Nin mitmuah nin sialhei khah ithat nîng a ta, a sa chu fah no tin u; nin sakuartunghei khah nangni lah pêk tên tên an ta, nangni peh kîr nôk khâi no nih. Nin berahei khah nin irâlhei ipe nîng a ta, nangni santu rang tute om no nih.

³²Nin nainuhei, nin naipahei khah nin mu chung ngêiah nam danghei bôi rangin ipe nîng an ta, sûn tin anmani ringaiin thlîr nin ta, îte tho thei chu nei ual no tin u.

³³Nin rinêng irâhei neh nin sinsôl irâhei khah nin iriat ngai ino namhein fah zoi an ta, sirdena neh dengintheina bang ti no chu îte dong no tin u.

³⁴Nin dengthei tuang khan lungril mumal iboiin nangni siam a ti.

³⁵PUMAPA khan nin rikhûkheiah, nin keheiah indam thei ino pânsia nangni inrivoi a ta, nin kepha ata nin lusîp idênin sakhuaiin nangni tuam a ti.

³⁶“Nangmani neh nin rênghei khom, nam dang ram, nin pi neh puhei la om ngai nona ramah PUMAPA khan nangni ṭhui a ta; kha ramah khan thing neh lunga siam pathianhei sin thông nin ti.

³⁷PUMAPA khan nangni a la chekindarna rang rama mi nangni mu murdi khan nin chunga thil itlung hih arkhêl tîng an ta, nangni musit an ta, nuizabûrin nangni mang an ti.

³⁸“Loiah fachi itam takkah irît nin ta; khannisela, ichîntekah bang ât nin ti; ikhâiin nangni fah pêk riai a ti.

³⁹Grep rikul siam nin ta, enkol nin ta; khanniseh, a grep irâ rimal no tin u, a uain khom in no tin u; a kung khah ringên ai fâk riai rang a nit.

⁴⁰Nin ram pumpuiah oliv thing tam khom sela a riak chu rithû no tin u, oliv irâ khah a tebopin a irthing vang rang a nit.

⁴¹Nainu naipa nei nin ta; khannisela, an ritha fah no tin u, bôia ṭhui vangin om an ti.

⁴²Nin theikung murdi neh nin chimu tinrêng arnge neh a rikin fah vang a ti.

⁴³“Ram dang mi nin lâia omhei khan nangni khêl risâng tîr tîr an ta, nangni chu nuai ṭul tîr tîr nin ti.

⁴⁴Anni khan nangni inritâng rang sum nei an ta; khannisela, nangmanin chu inritâng rang îte nei no tin u. A nungkhôn takah chu nin chungah lân lal an ti.

⁴⁵“PUMAPA nin Pathian thu zôm iloia, a thupêk neh a dân nangni ai pêkhei khah nin zôm nuam no sikin hi vânisalna murdi hih nin chungah tlung a ta, nin rimang mâkah chu nin chungah om mai a ti.

⁴⁶Khahei khah nin chungah neh nin richihei chungah Pathian â lung hoi mak iti nin riat theina ranga kumkhuaka risinsiana a nit.

⁴⁷Lam tinrêngah PUMAPA nin Pathianin ṭhat nangni a vur khoma a sin khah ilôm tak neh râiifân takkan tho nuam mak chei a.

⁴⁸Khasikah khan nangmani doi rang PUMAPA khan a la hong tir rang nin irâlhei sin khah vonṭâm pumhei, tuirihâl pumhei, korongboi pumhei, thil tinrêng risam tak pumhein thông nin ti. Nangni ân rimang mâkah chu nin ringah thîr ringkol nangni inribât a ti.

⁴⁹Kôlkomonga rithokin nangmani doi rang, an ṭong khom nin iriat ngai ino nam, PUMAPA khan hong ṭhui a ta, anni khan mupui angkan nangni bô an ti.

⁵⁰Nam inrum tak nîng an ta; naipang chungah khom, itar chungah khom lungkhamna rêng rêng inlang no nih.

⁵¹Khante, nin sial-ui-arhei, nin buhei, nin bâlhei fâng an ta, nangni chu voniṭâmin thîng nin ti. Nin buhei, nin uainhei, nin oliv riakhei, nin sialhei, nin berahei îte nangni zua pêk no nia; voniṭâmin thîng nin ti.

⁵²PUMAPA nin Pathianin nangni ai pêk rama nin omna khua murdi rûn an ta, nin kulpui risâng, â det nin iti tak takhei khah isim vang an ti.

⁵³“Nin irâlhein nin khopui an hual khap tikin chu nangni an hual khapnaah khan nin irila râ, PUMAPA nangni ipêk nin nainuhei neh nin naipahei sa khom la fâng nin ti.

⁵⁴Nin lâia mi nunhoi neh richong tak ngai, îte inrep ngai ino khomin hualna sika vonṭâm lungdongin ama naihei sa khah la fâng a ta. Ân zirpuihei manih, a nupui lungthlung manih, a nai la dam isunhei manih tak ilua khom sem no nih.

⁵⁵

⁵⁶Nin lâia nupang ifel tak, archongna sika a ke zela thuai chuang ngai ino khom khah irâlhein a omna khopui an hual khap tenan chu îte ifah rang a nei khâi no sikin a nai suak phing neh a champui khah inrûkkan fâng a ta, a pasal lungthlung tak neh a nai a la dam isunhei khom sem no nih.

⁵⁷

⁵⁸“PUMAPA nin Pathian riming roinpui tak neh iṭiom tak nin ṭi noa, hi lekhabua chuang murdi hih ridîn takka nin zôm non chu,

⁵⁹PUMAPA khan nangmani neh nin richihei chungah rî rikhêl tak neh indam thei ino ripui rikâi tuar tuar ngai chi a înlêng rang a nit.

⁶⁰Nin iṭi tak ngai Aigupta ram rîhei khah nin chungah inlêng nôk a ta, dam suak thei tlak no tin u.

⁶¹Hi Pathian Dân neh Inriseina lekhabua riziak inchuang ino natna neh rî tinrêng khom nin rimang mâkah chu PUMAPA khan nin chungah a înlêng rang a nit.

⁶²PUMAPA nin Pathian thu nin zôm no sikin rivâna ârsi zâk inih ngaihei khah iroi chekkah bang hong ni tâng nin ti.

⁶³Khante, PUMAPA khan nangni inṭha rang neh nangni inpung ranga ai nuam angkah khan, nangni inrimang rang neh nangni iseh rangin ai nuam rang tâk a nit. Nin va lua rang ram ata khah nangni phâi suak chit a ti.

⁶⁴“PUMAPA khan kôlkomonga rithoka kiangtiang kôlkomong idênin chitin lâiah nangni chekindar a ta, kha ramah khan nin pi neh puhei lai riat ngai ino thing neh lunga siam pathianhei chubai iûnin, an sin la thông nin ti.

⁶⁵Tak ramah khom sôldamna rêng rêng mu no tin ua, nin kepha ringatna rang tak khom mun nei no tin u; amakhan PUMAPA khan lungdongna hei, sabeidongna hei, ngûina hei nangni inrikhû mai a ti.

⁶⁶Nin ringna chu iṭi der der kan om a ta, sûn neh zân iṭi rilônthingin om nin ta; nin ringna khan ningbei takka om nî zel nei no nih.

⁶⁷Nin thil mu kangân chu ṭîng nin ta; nin lungril indôp mai a ta; zîng tiangah khan, ‘Kholoi ni ta sela o,’ tîng nin ta, kholoi tiangah khan, ‘Zîng ni ta sela o,’ tîng nin ti.

⁶⁸PUMAPA khan Aigupta ramah nangni tir khâi no ning ti ta khom sela, rikuangin nangni tir kîr nôk a ta; amakhan bôi rangin rizuar nin ta; khannisela, tutên nangni richoh nuam no nih,” a ti a.