Read Biete DÂNNIKNA 29 Bible Online

DÂNNIKNA 29 - Biete bible

DÂNNIKNA 29

¹Horeb tlânga a thuthlung banah khan PUMAPA khan Moab ramah Israela richihei zianga thuthlung Mosia a înthlung, a thuthlung thuhei chu hihei hi a nit;

²Mosia khan Israel mi murdi khah a koibûm a, an ziangah, “Aigupta rama Faroa neh a milianhei neh a ram pumpui chunga PUMAPA thiltho murdihei khah nin mit ngêiin nin mu a.

³Ripui natinsat takhei, risinsianahei, thil rikhêlhei nin mit ngêiin nin imu a nit.

⁴Khannisela, vuani tenah hin riatthiamna lungrilhei, mu theina mithei, riat theina kuarhei, nangni a lai pêk ino a nit.

⁵Kum sômilika sung PUMAPA khan ramchârah nangni â ruai a; nin silbomhei khah sil iṭhet mak chei a, nin pheikokhei khom ribun iseh mak chei u a.

⁶Ifah rang ibaihei, iin rang uainhei, zufânghei nei mak chei a; khannisela, PUMAPA khan ani chu nin Pathian a nit iti nin riat theina rangin nin irsam murdi nangni a pêk a.

⁷Hi mun nin hong tlungah hin, Hesbon rêng Sihona neh Basan rêng Oga khah ne doi rangin an hong rithok a. Khannisela, anni khah ei lei inê a;

⁸an ram khah ei lâk a, Reubena namhei, Gada namhei neh Manasea nam rizâtkahei lua rangin ei pêk a.

⁹Khangkan nin thil tho murdiah nin hong inṭum mai theina rangin hi thuthlung thuhei hih iamom takkan ipom unla, zôm rei.

¹⁰“Vuanah hin PUMAPA nin Pathian maah nin rêngkan nin îding a nit. Nin nam lupuihei,

¹¹nin ruaituhei, nin milianhei, Israel mi murdi ipa, nupang neh naipang hei, nin lâia om ram dang mihei, nin thing rikittu neh nin tui ichôituhei idênin nin rêngkan PUMAPA maah nin îding a nit.

¹²Vuanah hin PUMAPA nin Pathian khan thu nangni ai thlungpui rang a nit:

¹³Nin chibul Abrahama, Isaka, Jakoba hei ziangah neh nin zianga a lei înkung tâk angkan nin Pathian a nit theina rang neh ama mihei inih ranga nangni ân det theina rangin vuanah hin hi munah hin nin iom a nit.

¹⁴Izôm ranga ṭongrikhâmna thuthlung hih nin ziang bangah ai thlung ni mak.

¹⁵Vuaninta PUMAPA ei Pathian maah dinghei murdi ziangah neh ei richi suanpâr la hong iom ranghei ziangah khom ai thlung sa a nit.

¹⁶“Aigupta rama ei nunchanhei, nam danghei ram ipâl thlenga ei hong dânhei khah nin riat a.

¹⁷An mirmil porinche tak thinghei, lunghei, tangkaruahei, rângkachakheia an isiam khom khah nin imu a nit.

¹⁸Vuaninta hi muna ding murdi ipa manih, nupang manih, insungkua manih, nam pumpui manih khomin kha nam dang pathianhei chubai iûn rangin PUMAPA ei Pathian chu nung isong rang ni tlak mak e. Khanonchu, thing rizung hong icher suak ikhah tak neh tûr inthang tak angkah hi ni duai a ti.

¹⁹Vuaninta hi muna om, hi ṭongrikhâmna thu ria, ei lâiah mi tutên ireh ṭiankan tuklul ilian takka mahni nuam lam lama a om khoma a ta rangin îte inkhôk inoh rang angkana mahni khâta lungngam risak om no rei. Nin om duaiin chu kha sik takah khan mi sia neh mi ṭha ri-ang nat kan nin irmang rang a nit.

²⁰Khangkana mi kha PUMAPA khan izâ tlak no nia, PUMAPA ningthikna meichok khan kha mi khah thlût a ta; hi lekhabua vânisâm ichuang murdi hih a chungah ṭum a ta, PUMAPA khan vân nuai ata arming khah ziat inrimang a ti.

²¹Hi PUMAPA Dân neh inriseina bu thuthlung riziaknaa chuang vânisâmna murdi hih Israel nam pumpui enrikhîna rangin PUMAPA khan a chungah siatna ithlun pêk riseh.

²²“Rual ithar la hong iom ranghei neh ram dang mi ram ilah taka omhei khan nin rama natna neh dengtheina PUMAPA îthlunhei khah la hong mûng an ti.

²³Ram pumpui chu ram ichâr, kât neh ichihei irkhû ram chang zoi a ta; îte iphun thei ni no nia, loisûl khom ṭoi thei no nih. Nin ram chu Sodom neh Gomora hei, Adma neh Zeboim khua PUMAPA ningmur neh ningthik ritêla a îsiat inram chit angkah nîng a ti.

²⁴Khanungchu, rammual pumpuiin ‘PUMAPA khan îtho sikin im hi ram hih hingkana ai tho? Hi ningthikna tlung natinsat hih ingka sika mani?’ tîng an ti.

²⁵Hingka hin sâm an ta, ‘An chibulhei Pathian khan Aigupta ram ata a zu ṭhui suak lâiah khan thuthlung a siampuia, PUMAPA mihei khan kha thuthlung khah an isiat a;

²⁶pathian dang an iriat ngai ino, nam dang pathian, PUMAPA khan chubai ûn loi rang ai ti pathianhei sin khah an tho a, an biak tâk sika a nit.

²⁷Khasikah khan PUMAPA chu a mihei chungah a ning a thik a, hi Lekhabua chuang vânisalna murdi an ramah a îthlun pêk tâk a nit.

²⁸PUMAPA khah a ning a thik tak tak a, a ningthikna natinsat takah khan an ram ata a phâi suak riai a, Nam dang ramah ai dêng lût a nit, kha ramheiah khan vuani tenah hin an iom mai a nit,’ itin sâm an ti.

²⁹“PUMAPA ei Pathianin thu rithup ṭhenkah a înpuang ino a om a; khannisela, hi dân thu murdi hi chu a ne înrilang pêk a nit, eimani neh ei richi suanpârhein kumkhuakan ei zôm rang a nit.