Read Biete DÂNNIKNA 3 Bible Online

DÂNNIKNA 3 - Biete bible

DÂNNIKNA 3

¹“Khanungchu, mâr tiang ei rithon a, Basan lampui tiang ei fe a, Basan rêng Oga neh a mihei kha Edrei kho kôlah khan ne doi rangin an hong rithok a.

²Nikhomsela, PUMAPA khan ki ziangah, ‘Ani khah ṭi no roh, amah neh a mihei murdi neh a ram kha ni kutah nang kî pêk diam tâk a nit; Hesbona om Amorhei rêng Sihona chunga ni tho lam angkah takah khan a chungah ni tho rang a nit,’ a ti a.

³“Khanchu, PUMAPA ei Pathian khan Basan rêng Oga khom a mihei murdi neh ei kutah a ne pêk a, khatka lua khom zua loiin ei ithat riai a nit.

⁴Kha rualah khan a khua murdi kho sômirukkah, Basan rêng Oga inlalna Argob bial murdi kha ei lâk riai a; ei ilâk ino khua khatka lua khom omak e.

⁵Hi khua murdi hih kulpui risâng tak tak, kotkhâr neh â kalna nei korong a nit a, kulpui nei ino khua khom itam takkah ai om sa a nit.

⁶Hesbon rêng Sihona chunga ei tho lam angkah khan ei tho a, khosunga miriam murdi ipa, nupang neh naipang an rêngkan ei that inrimang riai a.

⁷An ranhei neh an thil neihei kha chu râllâk thilin ei ilâk riai a nit.

⁸“Kha ṭumah khan Amor rêng inikahei ram, Jordan dung nisua tiang ram Arnon vadunga rithoka Hermon tlâng idênin ei ilâk pêk a nit.

⁹(Hermon tlâng hih Sidonhein chu Sirion an ti a, Amorhein chu Senir an iti a nit.)

¹⁰Basan rêng Oga ram murdi: phâi rama khopuihei, Gilead bial ram hei, Basan bial ram hei kha Edrei neh Saleka dênin ei ilâk a nit.”

¹¹(Refaimhei lâia la dam isun chu Basan rêng Oga bang hi a nit. A zâlmun rikuang kha lungrikuang a nit a, mûk inrualna rikhî-ah khan a dung tiang mûk ikuakkah, a khang tiang mûk ilikah a nit. Atûn tenah hin Amonhei khopui Rabaah a lai om mai a nit).

¹²“Kha ram khah ei lâk zoin chu, Arnon vadung kôla Aroer khua mâr tiang ram neh Gilead tlângram ritiakah neh khantaka khua omhei kha Reubena namhei neh Gada namhei ki pêk a.

¹³Gilead ram la om murdi neh Oga inlalna Basan ram murdi, Argob bial ram kha Manasea nam rizâtkahei ki pêk a.” (Basan ram pumpui kha Refaimhei ram an lei iti ngai a nit.

¹⁴Manasea richia mi, Jaira khan Argob bial ram, Basan ram an iti ngai kha Gesurhei neh Maakahei ramrî dênin a lâk a. Khuahei kha ama riming ipêlin riming ithar a sak a, Havot-Jair[2] a ti a, atûn tenan an lai ti mai a nit.)

¹⁵“Gilead ram kha Manasea nama Makira panamhei ki pêk a.

¹⁶Reubena namhei neh Gada namhei chu Gileada rithoka Arnon vadung idênin an ram rangin ki pêk a. Sim tianga an ramrî chu vadung inlâina tak kha a nit a, mâr tianga an ramrî chu Jabok vadung a nit a, Amonhei ramrî dên kha a nit.

¹⁷Thlang tiang panga an ramrî chu Jordan vadung idêna, Galili dîla rithoka Tuipui Ithi dên a nit a, sua tianga an ramrî chu Pisga tlâng cho-ot ten a nit.

¹⁸“Kha lâi ngirah khan anni chu hi thu hih ki pêk a, ‘PUMAPA ei Pathianin hi Jordan râl nisua tiang ram hih nin dongtuma nangni ai pêk a nit. Atûn chu nin râlkâp mi murdi inrifo unla, nin suapuihein an ram an lua theina rangin ṭangpui riseh.

¹⁹Ran nin nei intam a, nin ranhei neh nin nupui nainetehei bang khah hi nangni kî pêk khuaheiah hin an om rang a nit.

²⁰Nangni chu nangmani angkah ngira nin suapuihei hin Jordan râl tiang ram PUMAPA ipêk rang ramah râlringam takka an om thei mâkah chu nin suapuihei nin san rang a nit. Kha rizoiin chu hi ram nin dongtuma nangni kî pêkah hin nin zuang ikîr nôk thei rang a nit,’ ki ti a.

²¹“Khanchu Josua ziangah, ‘PUMAPA nin Pathianin kha rêng inikahei, Sihona neh Oga chunga thil ai tho murdi kha ni mit ngêiin ni mu riai a. Khangkah ngirah khan nin irûn ram murdi chungah PUMAPA khan ai tho rang a nit.

²²Anni khah ṭi tlak no unla, PUMAPA nin Pathian khan nangni ai doipui mai rang a nit,’ itin thu ki pêk a.

²³“Kha lâi ngirah khan PUMAPA ziangah ki ṭongṭai a,

²⁴‘O Pumapa PATHIAN, ni suak hi ni roinpuizia neh ni kutrâtzia ni nen mu chak a nit iti ki riat a. Rinêngah neh rivânah hi thil roinpui tak nî tho angkana tho thei hih pathian dang tute zel omak e.

²⁵O PUMAPA, Jordan dung rikanin, varâl tianga ram iṭha tak, tlângram ihoi tak neh Lebanon tlânghei kha nen mu roh,’ ki ti a.

²⁶“Khannisela, nangmani sikin ki chungah PUMAPA kha a ning a thik a, ki thu kha ner ngai pêk nuam mak a. Khanêkan, ki ziangah, ‘Inrup ta riseh, hi thu-ah hin chu ne sôn nôk khâi no roh.

²⁷Pisga tlângsîpah hang lui inla, sak tiang hei, thlang tiang hei, sim tiang hei, mâr tiang hei ni mit hang inlêng inla, iṭha takkan hang thlîr roh; Jordan hi ni irkan tlak ino rang a nit.

²⁸Khasikin, Josua hih thu pen la, iṭha takkan ithor inrât roh; hi mipuihei hih iruai a ta, ni hang ithlîr ram khah a înlua rang a nit,’ a ti a.

²⁹“Khanchu, Beth-Peor khua dep phâiah khan ei iom mai tâk a nit khah,” a ti a.