Read Biete DÂNNIKNA 30 Bible Online

DÂNNIKNA 30 - Biete bible

DÂNNIKNA 30

¹“Atûnah hin nin rithlang rang ṭhatvurna neh vânisâmna nangni kî pêk a nit. PUMAPA khan nin chungah hi thil ṭhanohei murdi hih â thlun a, nangni â chekindarna nam dang ramah nin om tenan chu rithlang rang nangni kî pêk hih reh suak nin ti.

²PUMAPA nin Pathian tiang nangmani neh nin naihei kha nin hong ngat nôk a, a thupêkhei vuaninta nangni kî pêk hih nin lungril murdia nin zômin chu,

³PUMAPA nin Pathian khan lung nangni inkham nôk a ti. PUMAPA nin Pathianin nam dang dang lâia nangni â chekindarna ram ata nangni ṭhui bûm nôk a ta, vângsak inṭumin nangni siam nôk a ti.

⁴“Kôlkomong idêna chekindar ni ta khom unla, PUMAPA nin Pathianin nangni bûmin, nangni hong ṭhui ikhîr nôk a ti.

⁵Khanchu, PUMAPA nin Pathianin nin pi neh puhei a înlua ramah khan nangni ṭhui inlût a ta, lua nôk nin ti. Ani khan nin pi neh puhei ikhûmin vâng nangni insak a ta, nangni inpung a ti.

⁶Nin ring theina ranga PUMAPA nin Pathian kha nin lungril murdi neh nin ringna murdia lung nin thlung theina rangin, PUMAPA nin Pathianin nin lungril neh nin richihei lungril iser khah nangni tan pêk a ti.

⁷PUMAPA nin Pathianin hi vânisâmna murdi hih nangni sirdetu neh nangni neltu, nin irâlhei chungah iṭhum a ti.

⁸Mâi hong ngat nôk nin ta, PUMAPA ṭongbâi suak hih ipom nin ta, vuaninta thu nangni kî pêk, a thupêk murdihei hih zôm nin ti.

⁹PUMAPA nin Pathian khan nin kut sintho murdiah inṭumin nangni siam a ta, sial-ui-ar itam takka nei nin ta, nin loiah ifâk vâng tak tak a ti. Nin pi neh puhei vângsak inṭuma siam ai nuam angkah khan nangni khom vângsak inṭuma nangni siam nuam a ti.

¹⁰Khannisela, PUMAPA thu khah nin zôm ngit rang a nit, hi dân bua chuang a thupêkhei neh a dânhei murdi hih nin zôm rang a nit. Nin lungril murdi neh nin ringna murdin PUMAPA nin Pathian tiang nin ngat rang a nit.

¹¹“Hi thupêk, vuaninta nangni kî pêk hih nin ta rangin â zôm intak rai mak a, riat phâk ino rang ai om ino a nit.

¹²‘A thu kin riata, kin zôm theina rangin tûm rivâna ne hang ife pêk a, ne hang ilah pêk rang?’ nin tina rangin rivâna om ni mak.

¹³‘Kin riata, kin zôm theina rangin tûm tuikhanglian râla ne fe pêk a, ne hong ichôi pêk rang?’ nin tina rangin tuikhanglian râla om ni mak e.

¹⁴Nin zôm theina rangin thu khan nangni a nâi teng a, nin bâiah neh nin lungrilah ai om a nit; khasikin, zôm rei.

¹⁵“Vuanah hin nin maah rithlang rang ringna neh thina, ṭhatna neh siatna kî sia a nit.

¹⁶PUMAPA nin Pathian thupêk vuaninta nangni kî pêk hih nin zôm a, amah lung nin thlunga, a thu nin zôm a, a dânhei nin vong inṭhatin chu iring idamin om nin ta, hong pung nin ta, nin va lua rang ramah khan PUMAPA nin Pathianin ṭhat nangni vur a ti.

¹⁷Khannisela, nin lungrilin kho dang a ngat a, nin zôm nuam noa, ṭhui inrimanga nin om a, Pathian danghei nin biak a, a sinhei nin thon chu,

¹⁸rimang ngêt ngêt nin ti, iti atûnah hin nangni ki îril a nit; Jordan dung râla nin lua rang ramah khan dam sôt no tin u.

¹⁹Nin maah hin ringna neh thina, ṭhatvurna neh vânisâmna kî sia a nit, atûnah hin nin irthlang chungchâng riatpuitu rangin rinêng neh rivân kî fial a nit. Ringna khah rithlang rei. Khanchu, nangmani neh nin richihei ring thei nin ti.

²⁰PUMAPA nin Pathian lungthlung unla, ama thu zôm unla, amah chu ituh ngit rei; khanchu, nin chibul Abrahama, Isaka, Jakoba hei zianga ṭongrikhâma ipe a înkung ramah khan nangmani neh nin richi suanpârhei chu ring dam isôtin om nin ti,” a ti a.