Read Biete DÂNNIKNA 31 Bible Online

DÂNNIKNA 31 - Biete bible

DÂNNIKNA 31

¹Mosia khan Israel mihei ziangah hi thu hih â sîr zom mai a,

²an ziangah, “Atûn chu kum rizalei sôminikah ki nit tâk a, fe hong thei khom ni khâi mang a; khabanah PUMAPA khan, ‘Jordan dung hi rikan no tin,’ a ne ti a.

³PUMAPA nin Pathianin nin ma iruai mai a ta; hi namhei hih nangni inrimang pêk a ta, an ram khah chuan nin ti. PUMAPA lei înkung tâk angkan Josua hi nin ruaitu nîng a ti.

⁴PUMAPA khan Amorhei rêng Sihona hei, Oga hei neh an ram chunga a tho lam angkah khan kha namhei khom khah inrimang a ti.

⁵PUMAPA khan anni khah nangni pêng a ta, thu nangni kî pêk angkah takah khan an chungah nin tho rang a nit.

⁶Irât tak neh ihâi takkan om unla, indôp no unla, anni khah ṭi viat no rei; nin zianga fe sa kha PUMAPA nin Pathian a nit a; lo nangni insam no nia, imah khom nangni marak no nih,” a ti a.

⁷Khanungchu, Mosia khan Josua khah a koi a, Israel mihei murdi mitmuah, a ziangah, “Irât tak neh ihâi takkan om roh, hi mihei ma ruaiin, an pi neh puhei zianga PUMAPAN ṭongrikhâma ipe a lei înkung tâk ramah khan ṭhui inlût ni ta, annihei hi ni înlua rang a nit.

⁸Ni ma ruaitu chu PUMAPA nîng a ta, ni ziangah om mai a ta, lo nang insam no nia, imah khom nang marak no nih; khasikin, ṭi non la, indôp tlak no roh,” a ti a.

⁹Mosia khan hi Pathian dân hih lekhabuah arziak a, Levia richi, PUMAPA Thuthlung Bôm rizôntu thiampuhei khah a pêk a, Israel ulianhei khom a pêk a.

¹⁰Khanchu, Mosia khan, “Kum sarika kum, lâkai izâ kum ikipah Dângdi kût lâiin iring takkan nin tep ngai rang a nit.

¹¹PUMAPA nin Pathianin amah chubai ûnna ranga mun ai bîkah Israel mi murdi PUMAPA nin Pathian makunga an hong rilan zoron hi dân hih Israel mi murdi riatah nin tep rang a nit.

¹²Mi murdi, nupang, ipa, naipangte tehei, nin ompui ram dang mihei, koi bûm unla; khanchu, mi tinin hi dân hih riang an ta, PUMAPA nin Pathian ṭi dân neh hi dân thu murdi hih ridîn takka zôm dân an hong irsei thei rang a nit.

¹³Khangkah khan nin nainetehei PUMAPA nin Pathian dân la reh tlak ngai inohei khomin hong riang an ta; khanchu, Jordan dung râla nin va lua rang rama nin om sung kârkah PUMAPA nin Pathian ṭi dân hong risei an ti,” itin thu a pêk a.

¹⁴Khanungchu, PUMAPA khan Mosia ziangah, “Ringai ta, ni thi rang nikhua a hong nâi tâk; Josua khah koi inla Ritongna Puan-Inah hong rilang rei; khanchu, ani khah thu kî pêk rang a nit,” a ti a. Khante, Mosia neh Josua khah an fe a, Ritongna Puan-Inah an var lang a.

¹⁵PUMAPA kha Puan-Inah khan sûmpualah khan an ziangah a zuang inlâr a; sûmpual kha Puan-In kotbâi chungah khan â ding a.

¹⁶PUMAPA khan Mosia ziangah, “Ringai ta, ni pi neh ni puhei ziangah nî zâl rang tâk a nit a, ni thi nung tenan chu hi mihei hih ki chungah iamom inon om an ta, ki thuthlung an zianga ki thlung khah isiang an ti. Nung ne song an ta, an va omna rang rama pathianhei chubai ûn an ti.

¹⁷Khangkan a nit tenan chu an chungah ki ning thik a ta; nung song ki ta, an ziang ata ki mâi thup ki ta, inrimangin om an ti. Thil ṭhano neh lungzîngna intak tak kha an chungah tlung a ta; kha tik tenan chu, keimah an Pathianin ki ompui khâi no sikin kha thil ṭhano murdi khah an chungah ai tlung a nit iti reh tâng an ti.

¹⁸Pathian danghei chubai iûna, thil ṭhano an tho sikah khan an ziang ata ki mâi kî thup ngêt rang tâk a nit.

¹⁹“Khasikah khan atûnah hin hi lâ hih riziak inla, Israela richihei kha inrisei roh; an chunga ke lung hoi nozia an riatna a nit theina rang nih riseh.

²⁰An pi neh puhei zianga ṭongrikhâma ki înkung, dût neh khuaitui luangna ramah khan ṭhui ki ta, amakhan fâk nêk khop ithlâia omin, vâng hong sak an ti. Khannisela, pathian danghei tiang hong ngat an ta, a sinhei thông an ta, ne phial an ta, ki thuthlunghei isiang an ti.

²¹Thil ṭhano neh lungzîngna itam takkah an chungah a zuang tlung tenan chu hi lâ hih an richi suanpârhei bâiah khom la suak mai a ta, amakhah an isualzia inresuaktu nîng a ti. Atûn zelah hin, ki ṭongrikhâm ramah ki ṭhui ma zel khomah hin an lungril riput dân chu kî riat ṭian a nit,” a ti a.

²²Khangkan Mosia khan lâ kha, kha nî zelah khan arziak a, Israela richihei ân risei a.

²³Khanungchu, PUMAPA khan Nuna naipa Josua khah â sôn a, a ziangah, “Irât tak neh ihâi takkan om roh. Israela richihei hih ṭongrikhâma ipe ki înkung ramah khan nî ṭhui inlût rang a nit; ni ziangah om mai ki ti,” a ti a.

²⁴Mosia khan Pathian dân thuhei khah a mong idênin lekhabuah arziak zoi diam tenan chu,

²⁵Thuthlung Bôm rizôntu Levia chihei khah a pêk a, an ziangah,

²⁶“Hi Pathian Dânbu hih lah unla; PUMAPA nin Pathian Thuthlung Bôm kôlah khan seh rei, a mihei chungchânga riatpuitu rangin amakhan om riseh.

²⁷Rihel nin songzia neh nin tuklul lianziahei khah kî riat a nit. Ringai ta u, atûna nangni ki la dampui lâi ilua manin PUMAPA chungah nin rihel ngai a, ki thi nung tenan vâng chu ingka dôran im nin inatinsat rang tâk na!

²⁸Nin nam lupuihei neh nin ruaituhei murdi koi bûm rei, an ikuar riatah hi thu hih lei iril ki ta, thu riatpuitu rangin rinêng neh rivân kî fial a nit hi.

²⁹Ki thi nung tenan chu natinsat takkan isual nin ta, ki thu nangni pêk lampui ata hih nin ipêt rang a nit iti kî riat ṭian a nit. A nungkhônah vâng chu PUMAPA mitmuah thil porinche tho tên tên nin ta, a ning inthik pêk nin ta, nin la irmang rang a nit,” a ti a.

³⁰Khanungchu, Mosia khan Israel ribûmhei murdi kuar riatah khan hi lâ thu hih a mong idênin â ril riai a.