Read Biete DÂNNIKNA 32 Bible Online

DÂNNIKNA 32 - Biete bible

DÂNNIKNA 32

¹“Rivânhei o, ki thu ringai unla, Rinêng khom hin ki ṭongbâi suak hih ringai riseh.

²Ken riseina kha ruatui angkan sûr a ta, Ki thusîr kha rido angkan thlâng a ti. Thing cher rinoi tak chunga ruarmal itla, Loisûl rinoi tak chunga tla angkan ki thuhei chu nîng a ti.

³PUMAPA riming chu inpâk ki ta, A mihei khan a roinpuina chu inpuang an ti.

⁴PUMAPA chu nin zôkna lungpui a nit a, A sintho tinrêng a fel rikipa; A lampui murdi â dik a nit. Pathian iamom neh idik, Ifel neh iṭha sin ngaitu Pathian a nit.

⁵Khannisela, nangni chu iamom ino tak, A miheia ibe inrup ino, Nam isual tak neh pualoi tak nin nit.

⁶O mi invêt neh intlohei, Hingka hin im, PUMAPA khah nin ithung kîr rang? Nangni neitu, nin pa a nit; Nangni siama, nama nangni indingtu a nit.

⁷Tianlâi sûnhei kha remai rei, Rikhûk itam tak ivun tâk kumhei kha ngaitua rei, Nin pahei ridon unla, thil itlunghei nangni ril an ti; Ulianhei ridon unla, zoro thleng tâk thuhei nangni ril an ti.

⁸Chungnungtakkan namhei ram a pêk a, Miriam naihei omna rang a bîk pêk lâiah khan, Namhei ramrî[6] khah â rît pêk a, Israel richihei zâkah khan.

⁹PUMAPA khan Jakoba richihei chu, Ama dongtum rang bîkin a irthlang a nit.

¹⁰Ramchârah an ivâi lâiin anni chu a mu a, Ramchâr, thlipui râng irî vung vungna a khan. Anmani ompuiin a enkol a, A mit lâilên a îhoih ngai angkan anni chu a îhoih a nit.

¹¹Mupuiin arbu a, a tehei â chok thoi[7] a, A tê chungah arthla a zâp a, ivuang ân risei a, Arthla phar chungah ân chuang a, Ai chôi inzôk riam ngai angkan PUMAPA khan Israelhei chu, An ibâ nona rangin a donsui ngai a.

¹²PUMAPA bangin a mihei â ruai ngai a, Ram dang pathian ṭang mak e.

¹³Rinêng mun risângheiah ân chuang a, Rama thil ivâng an fâk a; Lungpui kâr ata khuaitui an lâk a, Lung bilah khom an oliv kunghei chu an thuar pêk ngai a.

¹⁴An serâthei neh an kêlhei khah an dût a tam a; Bera ṭha tak takhei an nei a, Basan ram bera neh kêlhei neh sialhei angkan. Bu tui tak neh uain ithlum takhei an nei ngai.

¹⁵PUMAPA mihei khah an hong richonga, Khannisela, an hong rihel a; An hong tak a, an hong mar a, an hong nâm tâk a. Â siamtu, Pathian nung an song a, An saninringna lungpui khah an nôl tâk a.

¹⁶Ram dang pathianhei chubai an iûn khan PUMAPA khan a nel tak tak a, An thil porinche tho khan a ning an inthik pêk a.

¹⁷Pathian tak nino, ramrilihei ziangah an ribôl a, An pi an puhei iriat ngai ino pathian itharhei ziangah, Israelhein an ibiak ngai ino pathianhei ziangah khan.

¹⁸An saninringna lungpui, an Pathian khah an ringil tâk a, Ringna petu Pathian khah an irngil tâk a nit.

¹⁹PUMAPA khan a mu a, a theimâk a, A nainuhei neh a naipahei chu a nôl tâk a.

²⁰‘An ziang ata ki mâi thup pêk ki ti, Ingkan ngân im an om lei thlîr hi rong, Hi rikhûk insual neh rin kâi ino mihei an nit.

²¹Pathian nino chubai an ûn a, Ki thîkthu an ichok thoi a, An mirmilhein ki ning an inthik a. Chi neh nama tep inrup inohei imangin an ning inthik pêk ki ta; Nam intlohei imangin an thîkthu chok ithoi pêk ki ti.

²²Ki ningthik chu mei angkan chok a ta, Rinêng chunga thil murdi kâng a ti, Mithi khua dênin kâng a ta, Itlâng ringatna bulhei kâng a ti.

²³An chungah siatna ritiar bûm a ta, An chungah ki thalhei murdi iṭhum ki ti.

²⁴Voniṭâmin danginda an ta, Rî ṭhano takin thîng an ta, Anmani sê rang ram sarânghei tir pêk ki ta, Anmani chuk rang rûl tûrirât chi tir pêk ki ti.

²⁵Putiang khandaiin thîng an ta, Insungtiang rithlavâiin om an ti, Nungâk, tlangvâl, rinu nêk lâi, Lua kêlmul iṭoihei idênin thi riai an ti.

²⁶Tutên reh tlak khâi loi rangin ki înrimang vang manih o, ki ti a.

²⁷Nikhomsela, an irâlhein risong takkan, A mihei chu kin inuai chit an ti kî ṭi a nit. Â nuai chittu lak chu keimah kî nit a,’ a ti a.

²⁸Israelhei chu vârna nei ino nam an nit a, Anmaniah riatthiamna zel omak e,

²⁹Vâr sela chu hihei hih rethiam an ta, An sûn nung thil rang an ingaitua thiam rang a nit.

³⁰Îtho sika khatkan sângkah arzûl a, Inikan sîngkah lâizâm an întho kha? PUMAPA, an Pathian khan anni khah nung a song a, Tinrêngthothei Pathianin a mâk tâk sika a nit.

³¹An irâlhei khomin an pathian kha, Israelhei Pathian angkan rât mak iti an riat a.

³²An irâlhei khah Sodom neh Gomora angkan an siat a, Grep ikhâ, tûr inei angkah hi an nit.

³³An uainhei khom sokngân tûr angkah a nit.

³⁴PUMAPA khan an irâlhei thiltho khah ritik tap a ta; Anmani kuttum itho rangin iruang ṭian a ti.

³⁵Phuba la neh thungkîr chu PUMAPA tho rang a nit, An sirbi riphêt zoro la hong tlung a ti; An siatna nî kha a hong nâi tâk, An chunga thil hong itlung ranghei kha hong tlung zel a ti.

³⁶PUMAPA khan a mihei kha ritha nei khâi mak iti a mu tenan inzôk a ta, An chan siatzia a mu tenan a sinthotuhei kha lunginkham a ti.

³⁷Khanungchu, PUMAPA khan a mihei ziangah, ‘Taktiang im nin rinpui pathianhei kha an iom tâk?

³⁸Nin ribôlna sa thâihein nin ifâ a, An in rang thillan uain nin lan a. Atûnah hin zuang ithoiin nangni zuang san ta riseh ba, Nangmani inzôktu ni ta riseh.

³⁹Keimah, keimah bang, Pathian ki nit, pathian dang zel omak e, Ki that ngaia, ken ring nôk ngai; Ke phop ngai a, ken dam nôk ngai; Ki kut ata nê sut thei rêng rêng omak e.

⁴⁰Pathian iring ki nit hih, Bân ipharin ki nuamin chu ṭong ker khâm ngai.

⁴¹Ki khandai ritle itât inngaih ki ta, Idik takkan roirêl ki ti. Ke râlhei chungah phuba lâng ki ta, Ne neltuhei chu kuttum thông ki ti.

⁴²An thisen kha ki thalheiah khan luang a ta, Ki khandaiin ne doituhei murdi that a ti; Ne doituhei kangân chu tute zua no ning a; Popliamhei neh ringmana imanhei idênin thîng an ti,’ a ti a.

⁴³O, nangni nam tinhei, PUMAPA mihei chu inpâk rei, A mihei thisen phuba chu a lâk tâk a, Ama doituhei chungah phuba a lâk a, A mihei sualna chu a ngaidam ngai,” itin.

⁴⁴Mosia neh Nuna naipa Josua khan kha lâ khah mipuihei kuar riata an ril suak riai tâk a.

⁴⁵Khante, Mosian kha thu khah Israel mi murdihei ziangah â sîr zoiin chu,

⁴⁶an ziangah, “Vuaninta nin zianga ki thu nangni pêk murdiah hin nin lungril phûm ngit unla, hi dân thu murdihei hih ridîn takka zôm rangin nin naihei thu peh rei.

⁴⁷Nin ta rangin thu chanlamboi ni mak a, nin ringna thu a nit; Jordan dung rikana nin va lua rang ramah khan hi thuhei hih zôm unla, nin ring nin dam ai sôt rang a nit,” a ti a.

⁴⁸Khante, kha nî ngirah khan PUMAPA khan Mosia ziangah,

⁴⁹“Moab rama Jeriko ridîna Abarim tlâng dunga Nebo tlângsîpah khan lui inla, Israela richihei lua ranga kî pêk Kanan ram khah hang thlîr roh.

⁵⁰Khanchu, nen zirpuipa Aronah Hor tlânga ai thi angkah khan nang khom kha tlângah khan nî thi rang tâk a nit.

⁵¹Zin ramchâr, Kades kho kôla Meriba tui munah khan Israela richihei lâiah ki thu zôm mak che a, Israela richihei lâiah ni ne ichôiinrisâng ino a nit.

⁵²Khasikah khan ram chu ilah taka rithokin hang mu thei ni ta; khannisela, Israela richihei kî pêk ram kha chu lût no tin e,” a ti a.