Read Biete DÂNNIKNA 33 Bible Online

DÂNNIKNA 33 - Biete bible

DÂNNIKNA 33

¹Pathian mi, Mosia khan a thi maah khan hi ṭhatvurnaah hin Israela richihei chu ṭhat ai vur a nit.

²PUMAPA chu Sinai tlânga rithokin a zuang a, Inî angkan Edom ramah a hong suak a, Paran tlânga rithokin a mihei chu a el a. A ziangah vân angel sângsômkah an om a, A kut changtiangah khan meichok a om a,

³A nit, PUMAPA khan a mihei lung a thlung a, Ama tahei murdi chu â hoi ngai a. Khasikin, a ke bulah ei ikhûn a, A thupêkhei ei izôm a nit.

⁴Mosian dân a ne ipêkhei khah ei zôm a, Ei nam richon ilu tak a nit.

⁵PUMAPA chu a mi Israelhei rêng a nit, Nam ruaituhei neh Israel mipui ribûmhei chungah khan.

⁶Mosia khan Reubena namhei chungchâng hingkan a ril a; “Reubenhei chu nam iroite an nit khom a, thi loiin dam mai riseh,” a ti a.

⁷Judahei chungthu-ah khan; “O PUMAPA, Juda namhei lungzîng khêk rôl ringai inla, An chipui Israel nam danghei neh inrichin nôk roh; PUMAPA, an irâlhei doipui inla, Nangmah ngêiin doi pêk roh,” a ti a.

⁸Levia namhei chungthu-ah khan: “PUMAPA, ni suak iamom Levia richihei khan, Urim neh Thumim ikol sela, Nangman ni lungdo kha zuang inlang roh, Massa-ah khan ni fia a, Meriba tuiah khan an idik iti nî fia tâk a nit.

⁹An nuhei, an pahei, an urênghei, An naihei chunga an iiamom nêkan, Ni chungah an iiamom ual a nit. Ni thu khah an ipom a, Ni thuthlungah iiam an iom a nit.

¹⁰Jakobhei khah ni dânhei inrisei an ta, Ni mâichâm chungah ribôlna lan an ti.

¹¹PUMAPA, an nam ṭhatvur roh; An kut sintho tinrêng iham inla, Â doituhei kong chu ito khiak inla, Â neltuhei kha iding thei khâi no riseh,” a ti a.

¹²Benjamina namhei chungthu-ah khan hingka hin ai ril a nit. “PUMAPA iditsak bîk neh ai vênginzôk ngai nam an nit. Sûntluanin a enkol ngai a, An lâiah ai om mai ngai a nit,” a ti a.

¹³Josefa namhei chungthu-ah khan: “An ram chu PUMAPA ṭhatvur ramin om riseh, Rivân thil ilu ridohei, Rinêng thuaia tui inthûk tak tuihein ifâ riseh.

¹⁴An thei irâhei khan inî mu ṭha sela, A zoro thapah thei iṭha tak tak vâng riseh.

¹⁵An tlâng rilunhei neh mualhei chu thei iṭha tak takin sip riseh.

¹⁶An ramah khan thil iluhei sip sela, Sûlribuk ichoka hong iṭong suaktu, PUMAPA ṭhatna ivur ni riseh. Ṭhatvurna chu Josefhei lu-ah zuang vur sela, A urênghei kâiruaitu lusîp ngêiah khan.

¹⁷A râtzia chu serâtchal ritha angkah a nit a, Arkî chu selechal riki angkah a nit. Arkihei chu Manasea richi sâng itam takkahei an nit a, Efraim richi sîng itam takkahei an nit. Anni khan namhei sik an ta kôlkomong idênin nor an ti,” a ti a.

¹⁸Zebuluna namhei neh Isakara namhei chungthu-ah khan: “Zebuluna namhei chu tuipuia an rivai thonaah khan vângisakin om riseh. Isakara namhei chu an insunga an richon ipungin om riseh.

¹⁹An tlângrama om rangin nam dang an koi a, Amakhan ribôlna dikhei lan an ti, Tuikhanglian richongna dong an ta, Ṭiaiphoia richon riphûmhei neh khan,” a ti a.

²⁰Gada namhei chungthu-ah khan: “Gada namhei ram inrizattu Pathian chu inpâkin om riseh. Gada khan sakeibaknei angkan ardîp a, Ibân isânphor a, lusîp ten idêna lîk ngai sakeibaknei angkah a nit.

²¹Ram ṭhatna mun tak an ta rangin an rithlang a, Ruaitu dongtum khah indongin an om a, PUMAPA thupêkhei, dânhei khah an zôm a, Israel lupuihei an ribûm lâiah khan,” a ti a.

²²Dana namhei chungthu-ah khan: “Dana chu sakeibaknei vânglâi a nit a, Basan rama rithokin a zuang ivuan suak a nit,” a ti a.

²³Naftalia namhei chungthu-ah khan: “O, Naftali, ditsaknaa ikhop ithlâi takka om, PUMAPA ṭhatvurna a sip, A ram khan Galili dîl ata sim thlang[8] ai dên a nit,” a ti a.

²⁴Asera namhei chungthu-ah khan: “Asera chu nam danghei nêk khoma ṭhativur bîk a nit. A urênghein ditsak bîk sela, A ram chu oliv thingin richong riseh.

²⁵A khopui chu thîr dâikota rikul ni sela, A damsung kârkah a râtna khom om mai riseh,” a ti a.

²⁶“O Israel mihei, nin Pathian angkana Pathian dang zel omak e, Nangni san ranga roinpui taka sûm chunga chuangin, Rivân khi a irfang zun zun a nit.

²⁷Kumtluang Pathian chu nin zôkna a nit a, A kumtluang ibân chu nangni ṭangpuitu a nit. Nin irâlhei chu nin maah nangni a ûmisua pêk a, ‘That inrimang riai rei,’ a ti ngai.

²⁸Khasikin, Jakoba richihei thlangamin om rei, Bu neh uain tamna ramah khan izôkriam kan om rei, A nit, rivâna ruatuiin rinêng â fâna munah khan.

²⁹O Israel, ni ham a ṭhat vang na! Nangma angkana rêng rêng tûm an om a? PUMAPA înzôk namhei, PUMAPA chu nang irungtu, ne pho a nit a, Ni roinpuina khandai a nit, Ne râlhei ni ziangah ripêng an ta, Nangman lei sirde khap ni ti,” a ti a.