Read Biete DÂNNIKNA 34 Bible Online

DÂNNIKNA 34 - Biete bible

DÂNNIKNA 34

¹Mosia chu Moab phâia rithokin Jeriko ridîna Nebo tlâng, Pisga tlângsîpah khan a lui a. PUMAPA khan ram kha Gileada rithokin mâr tiang Dan khua dênin ân thlîr a;

²Naftali ram murdi Efraim neh Manasea ram murdi, Juda ram thlang tiang Mediteranean tuipui idênin ân thlîr a.

³Juda ram, sim tiang ram; Zoar ata Jeriko, Itûm phâi khopui idênin ân thlîr a.

⁴Khanungchu, PUMAPA khan a ziangah, “Hi ram hi a nit, Abrahama, Isaka, Jakoba hei zianga, nin richihei la pêng ki ti itia ṭongrikhâma ki lei înkung ram chu a nit. Inmuh chu nang inmûng ki ta; khannisela, kha ramah khan chu nang infe no ning e,” a ti a.

⁵Khanchu, PUMAPA ti lam angkan Moab ramah khan PUMAPA suak Mosia chu a thi tâk a.

⁶Beth-Peor khua ridîna Moab rama phâiah PUMAPA khan a phûm a; khannisela, a thlân mun chia chu atûn tenan an iriat ino a nit.

⁷Mosia chu a thiah khan kum rizalei sôminika mi a nit; a mit zîng mak a, artha khom ṭuai ual mak e.

⁸Israela richihei khan Mosia khah Moab phâiah khan sûn sômithumkah an isûn a nit.

⁹Nuna naipa Josua kha Mosia khan ama thûl rangin a chungah kut a lei ringat tâk sikin vârnan a sip a; Israela richihei khan Josua thu an zôm a, Mosia manga PUMAPA thupêkhei khah an vong ngit a.

¹⁰Israelhei lâiah Mosia angkana PUMAPA khan mâiritonga a îsôn ngai zânthla rêng rêng om khâi mak e.

¹¹Faroa neh a milianhei neh Aigupta ram pumpui chunga Mosia manga risinsianahei neh thilrikhêlhei, PUMAPA întho angkana tho thei zânthla dang tute zel omak e.

¹²Israel mi murdihei mitmuah thil roinpui neh inrît tak tak Mosian ai tho angkana tho thei zânthla dang khom omak e.