Read Biete DÂNNIKNA 4 Bible Online

DÂNNIKNA 4 - Biete bible

DÂNNIKNA 4

¹Khanungchu, Mosia khan Israel mihei ziangah, “PUMAPA nin pi neh puhei Pathianin ram nangni ai pêk kha iring idama nin lua theina rangin dânhei neh omdân rang nangni ki înrisei ngai kha nin zôm rang a nit.

²Thu nangni kî pêk murdi hi nin bôksa rang ni mak a, nin inrikâi rang khom ni mak.

³Peor tlânga PUMAPA thiltho dân kha nin mit ngêiin nin mu a; Baal chubai iûntu murdihei kha PUMAPA nin Pathianin nin lâi ata a înrimang a nit.

⁴Nikhomsela, PUMAPA nin Pathian itûn richeltuhei kha chu atûn tenah hin iring idamin nin lai om pak a nit.

⁵“PUMAPA ki Pathianin thu a ne pêk lam angkah takin dânhei kha nangni ki înrisei tâk a nit. Nin va lua rang ramah khan khahei khah zôm mai rei.

⁶Hi dânhei hih iṭha takkan zôm unla, khanchu, nin vâr tlia nam dang mihei mitmuah ilangin om a ti. Hi dânhei murdi hih an riat tikin chu anni khan, ‘Hi nam roinpui tak hih nam ivâr tak neh thil ireh mi tak an nit ngêt hite,’ tîng an ti.

⁷“PUMAPA ei Pathianin a ne inâi mai ngai angkana anmani nâi ngai pathian inei nam roinpui tute zel omak e. Ne san ranga ei isam ikipah a ne isâm ngai a nit.

⁸Hingka taka fel, dânhei neh thupêkhei, atûna nin maa kî zam murdi angkana dân inei, nam roinpui dang tute zel omak e.

⁹Ridîn tak tak rei, nin mita nin thil mu tâkhei khah nin ring kongkârkah ringil tlak loi rangin vong ngit rei. Nin naihei neh nin tuhei khah iril mai ngai rei.

¹⁰Horeb tlângah khan PUMAPA nin Pathian maah nin ngîr a, PUMAPA khan ki ziangah, ‘Mipuihei kha ribûm riseh. Rinêng chungah an om sung kârkah ki thu an zôm a, an naihei khom ne ṭi dân an inrisei theina rangin ki thuhei inria kî nuam a nit,’ ai tihei khah iril inreh rei.

¹¹“Nin hong nâi a, itlâng bulah khan nin hong ngîr a, itlâng khah sûmpui isa takin arkhû khap a, rivân isuna mei ichok luai luaihei khah nin naihei iril rei.

¹²PUMAPA khan meia rithokah khan nangni a zuk isôn a; a rôl chu nin riat a, nikhomsela, a mêl îte nin imu no a nit.

¹³A thuthlung kha zôm inṭha rangin nangni â ril a, Thupêk sômkah, lungphêk inika riziak khah zôm inṭha rangin nangni ai ti a nit.

¹⁴PUMAPA khan a dân murdi kha nangni inrisei rangin thu a ne pêk a. Nin va rûn a, nin va chuan rang ram nin tlung tenan kha dânhei khah iṭha takkan nin zôm rang a nit.

¹⁵“Horeb tlângah khan meia rithokin PUMAPA khan nangni a zuang isôn lâiah khan a mêl rilim îte nin imu no a nit. Khasikin, ridîn tak tak rei;

¹⁶mirmil, chubai nin ûn rang isiamin porinchen om no rei; nin ta rangin mirmil rêng rêng, ipa rilim manih, nupang rilim manih;

¹⁷sakeli rilim manih, iva rilim manih,

¹⁸nuaia a phûnga rivâk chi irûlhei rilim manih, inga rilim manih chubai iûn rang, nin siam rang ni mak.

¹⁹Rivân tiang nin hang tang a, inî hei, ithla hei, ârsi hei, rivâna thil dang iom murdihei nin hang imu khi chubai iûn rangin nin lungril ithlêk no riseh. PUMAPA nin Pathianin hihei murdi hi chu chubai an ûn rangin nam danghei ziangah ai pêk a nit.

²⁰Khannisela, nangni chu, PUMAPA khan a mihei, a dongtum bîk inih rangin Aigupta ram, hâlzorna meipui ata kha nangni a hong iṭhui suak a nit, atûna a mihei nin init mai angkah hin.

²¹Kei chu, nangmani sikin PUMAPA nin Pathian kha ki chungah a ning a thik a, Jordan vadung rikan loi a, nin lua rang ram iṭha tak PUMAPA nin Pathianin nangni ai pêkah khan ki lût nona rangin ṭong a înkung tâk a nit.

²²Kei chu Jordan rikan loiin hi ramah hin kî thi rang tâk a nit; khannisela, nangni chu rikan nin ta, kha ram iṭha tak khah va chuan nin ti.

²³PUMAPA nin Pathian thuthlung, nin zianga ai thlung khah ringil tlak loi rangin ridîn tak tak rei. Mirmil rêng rêng siam loi ranga PUMAPA nin Pathian thupêk khah zôm ngit rei.

²⁴PUMAPA nin Pathian chu mi kâng inrivâm ngai mei angkah a nit a; Pathian thîkthu seh tak a nit.

²⁵“Kha ramah khan isôt takkah nin om nung, nainetehei neh tunetehei nin nei nung khomin mirmil rêng rêng ingkana mirmil khom siam no rei. Amakhah PUMAPA nin Pathian mitmua thil ṭhano tak a nit a; a ning nin inthik duaiin chu,

²⁶rinêng neh rivân ichingin kî ti a nit, Jordan dung rikana nin va lua rang ram ata khah rimang zel nin ti. Kha ramah khan om sôt no tin u a, nin irmang vang rang a nit.

²⁷PUMAPA khan nam tin lâiah nangni chekindar a ta, PUMAPA nangni chekindarna namhei lâiah khan mi iroichekah bang izuan om nin ti.

²⁸Kha ramah khan miriam isin mirmil, thing manih, lung manih, ṭong thei ino, îte reh thei ino, imu khom mu thei ino, îte fah thei ino, thil inam khom reh thei inohei sin kha thông nin ti.

²⁹Kha ramah khan PUMAPA nin Pathian khah zong nin ta, nin lungril murdi neh nin ringna murdia nin zongin chu mûng nin ti.

³⁰Inkhôk takkan nin om a, nin chungah kha thilhei murdi khah a hong tlung tikin, a nungkhôn takah chu PUMAPA nin Pathian tiang mâi ngat nôk nin ta, a thu chu zôm tâng nin ti.

³¹PUMAPA nin Pathian chu mi lunginkham thei tak Pathian a nit a, nangni marak no ni a, nangni inrimang vang no nih; nin pi neh puhei zianga ṭongrikhâma a thuthlung khah ringil tlak no nih.

³²“Nin suak ma, khuansiang ma hei khah hang sût unla, leilungah Pathianin miriam a siam tena rithokin vân nuaiah hingkana thil roinpui hih a om tâk ngai im? Tu khatkan nin riat tâk ngai im a?

³³Tu nam ngân im meia rithoka Pathian thu sîr ireh ngai a, Pathian rôl an riat nung khoma la ring mai an om tâk ngai im?

³⁴Nam dang lâi ata ama mihei inih rang bîka, nam khatkah iṭhui suak ngam Pathian an om ngai im a? Nangni chu, nin Pathian khan, a sinthotheizia neh artha neizia nin mitmu ngêiah ân lang a; rîhei neh ridoinahei ân lêng a, risinsianahei neh thil rikhêlhei a tho a, thil inrît tak takhei a îthlun a nit.

³⁵PUMAPA chu Pathian a nit iti nin riat theina rangin khahei murdi khah nin ziangah a înlang a nit, ama banah chu Pathian dang zel omak e.

³⁶Nangni ân risei theina rangin rivâna rithokin a rôl nangni a zuk in riat a; hi rinêng chungah hin a meipui rithiang khah nangni ân mu a, meia rithokah khan nangni a îsôn a nit.

³⁷Nin pi neh puhei lung a thlung sikin nangni arthlang a, a sinthotheina roinpui takin amah ngêiin Aigupta ram ata kha nangni ai ṭhui suak a nit.

³⁸Nin fe thiai mai lâiin, ani khan nam dang nangmani nêka roinpui ual neh ritha nei ualhei kha nangni a ûm isua pêk a, an ram kha nangni ân lua a, atûna nin ilua mai ram hi a nit.

³⁹Khasikin, atûnah hin nin lungrilah vong unla, ringil tlak no rei: PUMAPA chu chung tiang rivânah neh nuai tiang rinêngah hin Pathian a nit. Pathian dang zel omak e.

⁴⁰Kumkhuaka nin ta ranga PUMAPA nin Pathianin nangni ai pêk ramah khan nangmani neh nin richi suanpârhei ranga ṭha rang neh nin om mai theina ranga dânhei neh a thupêkhei, vuaninta nangni kî pêk hih nin zôm mai rang a nit,” a ti a.

⁴¹Khanungchu, Mosia khan chângripala mi nal isattu tlânna rang Jordan râl nisua tiang pangah khan khopui ithumkah a bîk a. Kha khuaheiah khan, mîn, â râl khom nino, chângripalin a that duaiin chu itlân lût thei a ta, inzôkin ai om rang a nit.

⁴²

⁴³Reubena richihei ramah, ramchâra tlâng phâia om Bezer khopui khah a bîk a; Gada richihei ramah Gilead biala om Ramot khopui khah a bîk a; Manasea richihei ramah Basan biala om Golan khopui khah ai bîk pêk a nit.

⁴⁴Mosia khan Israel richihei kha Pathian dânhei neh inriseinahei khah a pêk a.

⁴⁵Aigupta ram ata an hong suak nunga Hesbona om Amorhei rêng Sihona ram sunga Beth-Peor khua ridîn Jordan dung râl nisua tiang phâia an om lâiah khan hi dânhei hih Mosia khan ai pêk a nit. Mosia neh Israela richihei khan Rêng Sihona kha an înê a nit khah.

⁴⁶

⁴⁷A ram kha an dong pêk a, Basan rêng Oga ram khom an idong pêk a nit. Hi Amor rêng inikahei hih Jordan râl nisua tiang panga om an nit.

⁴⁸Kha ram khah Arnon phâi sîra Aroer khuaa rithoka Sirion tlâng (Hermon tlâng an iti ngai) idên a nit a.

⁴⁹Jordan dung râl nisua tiang ram murdi khom sim tiang Tuipui Ithi dênin neh nisua tiang Pisga tlâng idênin a îhuap a nit.