Read Biete DÂNNIKNA 5 Bible Online

DÂNNIKNA 5 - Biete bible

DÂNNIKNA 5

¹Mosia khan Israelhei murdi khah a koibûm a, an ziangah, “O Israel mihei, vuaninta nangni kî pêk dânhei murdi hih ringai rei. Risei unla, nin zôm ngêt rang a nit.

²PUMAPA ei Pathianin Horeb tlângah khan ei ziangah thu a thlung a.

³PUMAPA khan ei pi neh puhei ziang bangah khan thu ai thlung ni mak a, einihei, atûn tena iring idama la om murdihei ziang ngêi khomah hin ai thlung a nit.

⁴PUMAPA khan itlângah khan meia rithokin mâiritongin nangni â sôn a.

⁵Kha lâiah khan PUMAPA neh nangmani kârah khan ke ding a, PUMAPA thu nangni ril nin zianga sîr nôk rangin kî om a nit, mei khah nin ṭi sikin itlângah khan nin hang ilui ngam ino a nit.

⁶“PUMAPA khan hingkan a ti a: Keimah hi PUMAPA nin Pathian, Aigupta rama bôia nin omna ata nangni ṭhui suaktu chu ki nit.

⁷“Keimah ni no chu Pathian dang rêng rêng nei no roh.

⁸“Mirmil siam no roh, chung tiang rivâna thil manih, nuai tiang rinênga thil manih, rinêng thuai tuia thil iom rilim manih îte ni siam rang ni mak.

⁹Mirmil rêng rêng chubai ni ûn rang ni mak a, an sin khom ni tho rang ni mak e. Keimah PUMAPA ni Pathian hi Pathian thîkthu sia, pahei siatna sika naihei kuttum itho ngai, ne neltuhei chu rikhûk ithum rikhûk ilîka dêna kuttum itho ngai,

¹⁰lung ne thlunga ki thupêkhei izômtu sâng itam takkahei chunga lungkhamna inlang ngai ki nit hi.

¹¹“PUMAPA ni Pathian riming kha môkin ni ching pai pai rang ni mak. PUMAPA khan arming iching pai paitu khah kuttum tho loiin isua tlak no nih.

¹²“PUMAPA ni Pathianin thu nang ai pêk angkan sabatnî khah ser inrithiang roh.

¹³Sûn rukka sung ni sin thông ni ta,

¹⁴A sûn sarinî-ah khan chu PUMAPA ni Pathian ta rang ringamnî a nit a. Kha nî-ah khan chu sin rêng rêng ni tho rang ni mak, nangmah khomin, ni naihei khomin, ni suakhei khomin, ni ranhei khomin, ni ina ram dang mihei khomin sin an tho rang ni mak e. Nangma angkan ni suakhei khom an ringam ngêt rang a nit.

¹⁵Nang khom Aigupta ramah khan bôi ni nit khah reh mai roh. Khantaka rithokah khan PUMAPA nin Pathianin kut irât tak neh a sinthotheina roinpui takin nangni ai ṭhui suak a nit. Khasikah khan a nit, PUMAPA nin Pathian khan sabatnî hi iser rang thu nangni ai pêk a nit.

¹⁶“PUMAPA ni Pathianin thu nang ai pêk angkan ni nu neh ni pa ngîk roh; khanchu, PUMAPA nang ipêk ramah hin vângsak ni ta, ni ring dam sôt a ti.

¹⁷“Mi that no roh.

¹⁸“Inrê no roh.

¹⁹“Inruh no roh.

²⁰“Ni bungahei dikino takkan nô no roh.

²¹“Ni bungahei nupui ni thîk rang ni mak, a in hei, a loi hei, a bôipa hei, a bôinu hei, a serâtchal hei, a sakuartung hei, ni bungahei thil rêng rêng îte ni thîk rang ni mak.

²²“PUMAPA khan hi thupêkhei hih a nit Horeb tlâng bula nin hong ribûm lâia nangni a îril khah a nit. Mei neh sûmpui izîng isâ taka rithokin rôl iring takkan nin ziangah a îsîr a nit kha; thu dang isîr ual mak. Khahei khah lungphêk inikah khan arziak a, a ne ipêk a nit khah.

²³“Itlâng khah a chok luai luai a, izîng richel khapa rithoka rôl nin hang riatah khan, nin nam lupuihei murdi neh nin ruaituhei khah ki ziangah an hong a,

²⁴‘PUMAPA kin Pathian khan a roinpuizia neh ân thangzia kha kin ziangah ân lang a, meia rithokin a rôl kin riat a. Pathianin miriam â sôn a, miriam kha thi ngêt ual ngai mak iti vuanah hin kin iriat tâk a nit.

²⁵Khasikin, atûnah hin îtho rang im ithi thei rangin kin iom rang? Mei natinsat tak khan ne zuang kâng inrivâm a ti. PUMAPA kin Pathian rôl kha kin riat nôkin chu kin ithi ngêt rang tâk a nit.

²⁶Meia rithoka Pathian rôl iriaa miriam a la ring mai tûm a om a?

²⁷Nangman hang nâi inla, PUMAPA kin Pathian thu sîr murdi khah hang ringai roh; PUMAPA kin Pathianin ni zianga a îsîr murdi chu nangman kin ziangah isîr ni ta; khanchu, lei ringai kin ta, kin izôm rang a nit,’ an ti a.

²⁸“PUMAPA khan ki zianga nin thu sîr khah a lei riat a. PUMAPA khan ki ziangah, ‘Hi mihein ni zianga an thu sîr khah ki lei riat a; an thusîr murdi kha â dik a nit.

²⁹Khangkana lungril khah ripuh mai ngai sela chu a ṭhat rang tlia na! Ne ṭi sela, ki thupêkhei chu zôm mai sela, anmani neh an naihei khom kumkhuakan vângsak inṭumin an iom mai rang a nit.

³⁰Fen la, an puan ina kîr nôk rang tâkin iril roh.

³¹Khannisela, nang chu ki ziangah hin om inla, ki dânhei neh ki thupêkhei chu nang kî pêk rang a nit. Kha dânhei neh thupêkhei khah mipuihei nen risei rang a nit; khanchu, an lua rang ram kî pêkah khan an izôm thei rang a nit,’ a ti a.

³²“Israel mihei, PUMAPA nin Pathianin thu nangni ai pêk hih ridîn takkan zôm rei; changtiang manih, voitiang manih pêt tlak no rei.

³³Nin va lua rang ramah nin om a, vângisak taka nin om mai theina rangin PUMAPA nin Pathianin thu nangni ai pêk lampui khah nin ro thal rang a nit.