Read Biete DÂNNIKNA 6 Bible Online

DÂNNIKNA 6 - Biete bible

DÂNNIKNA 6

¹“PUMAPA nin Pathianin hi thupêkhei neh dânhei hih nangni inrisei rangin a ne iti a nit. Nin va lua rang ramah khan hihei hih nin zôm rang a nit.

²Nin ring kong kârkah, nangmani neh nin richi suanpârhei khomin PUMAPA nin Pathian chu nin ṭi a, a dân neh thupêk nangni ki pêk murdi hih nin zôm rang a nit; khanchu, kha ramah khan dam sôt nin ti.

³O Israel mihei ringai unla, zôm rei. Khanchu, PUMAPA nin pi neh puhei Pathianin nangni a înkung pêk angkan dût neh khuaitui luangna ramah vângisak tak neh natinsat takka hong ipung puangin om nin ti.

⁴“O Israel mihei ringai ta u, PUMAPA, PUMAPA bang hi ei Pathian a nit.

⁵PUMAPA nin Pathian chu nin lungril murdi, nin ringna murdi, nin râtna murdin lung nin thlung rang a nit.

⁶Hi thu, vuaninta nangni kî pêk hih nin lungrilah vong mai unla;

⁷ṭhatnemringai takkan nin naihei inrisei nin ta, nin ina nin iṭhung lâi hei, lampuia nin lôn lâi hei, nin zâl rangin hei, nin thoi tikin hei nin isîr mai rang a nit.

⁸Khante, nin riatmai theina rangin nin ibânah khuap nin ta, nin ichalah nin khim rang a nit.

⁹Nin inkotbâi ngulhei, nin dâikot khârheiah nin riziak rang a nit.

¹⁰“Nin pu Abrahama, Isaka, Jakoba hei zianga ṭongrikhâma ipe a înkung ram khah PUMAPA nin Pathianin nangni pêng a ta, nin înding ni tlak ino khopui ilian neh roinpui tak takhei chu nei nin ti.

¹¹Khante, inheiah khan thil iṭha tak tak nin îsua ni tlak ino, om a ta; nin ichoi ni tlak ino tuikuang choih isahei khom om a ti; khabanah, nin iphun ni tlak ino, grep rikulhei neh oliv bilhei khom nei sâng nin ti. PUMAPA khan kha ramah nangni a ṭhui lût tenan chu ikhop neh ithlâi takkan nin iom rang a nit.

¹²Iṭha takkan ridîn rei; khanonchu, suak nin changna, Aigupta ram ata nangni ṭhui suaktu PUMAPA khah ringil duai nin ti.

¹³PUMAPA nin Pathian chu ṭi unla, amah chubai ûn unla, ama riming iching bangin ṭong nin rikhâm rang a nit.

¹⁴Nin vêla omhei pathian kha nin biak rang ni mak a, pathian dang rêng rêng nin ikhûn rang ni mak.

¹⁵Nin zianga om PUMAPA nin Pathian chu Pathian thîkthu seh tak a nit; khasikin, pathian danghei chubai nin ûnin chu PUMAPA nin Pathian ningthik khah nin chungah ṭuang a ta, rinêng ata hi nangni a înrimang pai rang a nit.

¹⁶“Massa muna nin ifia angkah khan PUMAPA nin Pathian kha nin fia rang ni mak.

¹⁷PUMAPA nin Pathianin nangni ai pêk, thupêkhei neh dânhei hi ridîn takkan zôm rei.

¹⁸PUMAPAN iṭha ai ti neh idik ai ti khah sin unla, nin ta rangin ṭhâng a ta, nin pi neh puhei zianga ṭongrikhâma ipe a lei înkung tâk ram iṭha tak khah nin ilua thei rang a nit.

¹⁹PUMAPA înkung tâk angkan nin irâlhei murdi chu ni maah ûm isua riai a ti.

²⁰“Sûn la hong rangah nin naihein, ‘PUMAPA ei Pathianin îtho rang sik im hi dânhei hih izôm rangin thu a ne ipêk?’ itia nangni an ridon tikin chu,

²¹nangmanin nin naihei ziangah, ‘Aigupta ramah Faroa bôi kin nit a, PUMAPA khan Aigupta ram ata kha kut irât takin a ne iṭhui suak a nit.

²²PUMAPA khan kin mitmu ngêiah khan thil rikhêlhei, risinsianahei neh thil inrît tak takhei kha Aigupta ram pumpui chungah neh Faroa neh a milianhei murdi chungah khan a tho pêk a.

²³Keini chu khantak ata khah a ne ṭhui suak a, hi ram, kin pi neh puhei zianga ṭongrikhâma ipe a lei înkung ramah hin ne hong iṭhui inlûtin, a ne ipêk a nit.

²⁴Khanchu, PUMAPA khan hi dân murdihei hih izôm rangin thu a ne pêk a, ei ṭhatna rangin PUMAPA ei Pathian kha iṭi mai rangin thu a ne ipêk a nit. Khasikin, ei rêngkan vuansûn tenah hin iring idama a ne izua mai a nit hih.

²⁵Hi a thu ne pêk lam angkana PUMAPA ei Pathian thupêk murdi hih iṭha taka ei zômin chu ei ta ranga damna ai nit rang a nit,’ nin ti rang a nit.