Read Biete DÂNNIKNA 7 Bible Online

DÂNNIKNA 7 - Biete bible

DÂNNIKNA 7

¹“PUMAPA nin Pathianin nin va lua rang ramah khan nangni ṭhui inlût a ta, khantaka om nam sarikah, nangmani nêka tam ual neh rât ual, Hit mihei, Girgas mihei, Amor mihei, Kanan mihei, Periz mihei, Hiv mihei neh Jebus mihei khah nin maah nangni ûm isua pêk a ti.

²PUMAPA nin Pathianin hi mihei hih nin kutah nangni a pêk a, nin inê tikah khan, nin that inrimang riai rang a nit. Anmani neh thu nin thlung rang ni mak a, lung nin inkham rang khom ni mak.

³Nupui pasal rineipui no unla, nin naihei khomin an nei rang ni mak.

⁴Khanonchu, nin naihei khah pathian danghei biakna tiang nangni an iṭhui inkôi pêk rang a nit. Khangkan a nitin chu PUMAPA ning kha nin chungah thik a ta, nangni a inrimang zel rang a nit.

⁵Khasikin, an chungah hingka hin nin tho rang a nit; an mâichâmhei isimpêk riai unla, an lungphun iserhei ikhoi chit pêk unla, an pathiannu Aseri rilim risinsiana thinghei kha rikit unla, an mirmilhei kha nin hâl vang rang a nit.

⁶Nangni chu PUMAPA nin Pathian ta ranga nam rithiang nin nit sikin khangkan nin tho rang a nit. PUMAPA nin Pathian khan rinênga nam tin tin lâia rithoka ama dongtum bîk inih ranga nangni a irthlang nin nit.

⁷“Nam dang nêkan nin tam ual sika PUMAPA khan lung nangni ai thlunga, nangni a irthlang ni mak; nam tin tin lâiah nam iroi tak kêng nin init.

⁸PUMAPA khan lung nangni a thlung sik neh nin chibulhei zianga ṭong a lei irkhâm kha ilen a nuam sikin kêng Aigupta rêng Faroa bôi ata a kut irât takin nangni a irtlan suak a nit.

⁹Khasikin, remai rei, PUMAPA nin Pathian bang hi Pathian chu a nit, Pathian iamom, amah lung ithlunga, a thupêk izômtuhei chunga rikhûk sâng idêna a thuthlung indet mai ngai neh a lungkhamlianna inlang mai ngai a nit.

¹⁰Khannisela, ama neltuhei chu anmani takchung ngêia ṭuanga, thung ngai a nit.

¹¹Khasikin, thupêkhei neh dânhei murdi nin zôm ranga vuaninta nangni kî pêkhei hih nin zôm rang a nit.

¹²“Hi thupêkhei hih nin ringai a, iṭha takkan nin zômin chu PUMAPA nin Pathianin nin pi neh puhei zianga a lei înkung angkah khan a thuthlung chu nin ta rangin indet mai a ta, nin chungah a lungkhamlianna inlang mai a ti.

¹³Lung nangni thlung mai a ta, ṭhat nangni vur a ta; khanchu, irila râ nainetehei ineiin hong pung nin ta, nin loima khom ṭhat nangni vur pêk a ta, buhei, uainhei, sial-ui-arhei hong nei tam nin ti. Ipeh ranga nin pi neh puhei zianga ṭongrikhâma a înkung ramah khan hi ṭhatvurnahei murdi hih nangni ai vur rang a nit.

¹⁴Rammuala nam tin tin lâiah ṭhatvurna dong intam tak nîng nin ti. Nangmani lâiah neh nin ranhei lâiah â ching zel om no tin u.

¹⁵PUMAPA khan nin lâi ata rîrâi tinrêng nangni inrikiang pêk riai a ta, nin lei iriat tâk ngai Aigupta rama rîhei khah nin chungah inlêng no nih; khannisela, nangmani neltuhei chungah chu inlêng a ti.

¹⁶PUMAPA nin Pathianin nangni ai pêk rama nam murdihei khah nin inrimang riai rang a nit; lung nin inkham rang ni mak e. An pathian sin khom nin tho rang ni mak; amakhah nin iôkna rangin châng nîng a ti.

¹⁷“Nin lungrilin, ‘Hi namhei hih ei nêkan an tam ual a, ingkan im ei ûm isua thei rang?’ ti no rei.

¹⁸Anni khah ṭi no unla; PUMAPA nin Pathianin Faroa neh Aigupta mihei murdi chunga a thiltho khah reh mai rei.

¹⁹Thil inrît natinsat taka kuttum a tho dân khah nin mit ngêiin nin mu a, thil rikhêlhei neh risinsiana roinpui tak takhei ithôn ama kut irât tak ngêi imanga, ritha nei takka PUMAPA nin Pathianin nangni ai ṭhui suak kha reh mai rei. Khangkah ngirah khan PUMAPA nin Pathianin nin mi ṭihei chungah khan ai tho rang a nit.

²⁰PUMAPA nin Pathian khan an lâiah khuaipui tir a ta, nin that bân, a la dam isun, nangmani ata zôk a, ribihei khom khah bel that riai an ti.

²¹Khasikin, kha mihei khah ṭi tlak no rei. PUMAPA nin Pathian chu nin ziangah ai om mai a nit; ani chu Pathian roinpui tak neh ṭiom tak a nit.

²²PUMAPA nin Pathian khan matiang nin pan thiai mai lâiah khan kha namhei khah ichîn chînkan nangni ûm isua pêk a ti. Voikazelin nin ûm isua vangin chu ramsahei hong pung an ta, nin ta rangin iṭiom hong nîng a ti.

²³PUMAPA nin Pathianin nin irâlhei khah nin kutah nangni pêng a ta, an rimang vang mâkah chu buaina rikhêl takin inbuai a ti.

²⁴An rênghei khah nin kutah nangni pêng a ta, that nin ta, an riming chu rivân nuai ata hih nin ithâi inrimang rang a nit. Nin inrimang vang mâkah nangni lei idan thei rang rêng rêng tute zel om no nih.

²⁵An mirmil pathianhei khah nin hâl rang a nit. Kha tuamna tangkarua neh rângkachak khah nin rizuk rang ni mak a, nin ta rangin nin lâk rang ni mak; khanonchu, nin iôkna rang chang duai a ti; mirmil biakna hi PUMAPA nin Pathian ringaiin thil porinche a nit.

²⁶Kha mirmilhei khah nin insungah nin lâk lût rang ni mak a, kha thilhei angkah khan vânisalin nin om rang ni mak. PUMAPA vânisâm nuaia om an nit sikin nin itir tak tak rang a nit a, nin nel vak rang a nit.