Read Biete DÂNNIKNA 8 Bible Online

DÂNNIKNA 8 - Biete bible

DÂNNIKNA 8

¹“Nin pi neh puhei zianga PUMAPA nin Pathianin ṭongrikhâma ipe a înkung ram khah iring idama nin va chuan a, nin hong pungpuang theina ranga vuaninta thupêk nangni kî pêkhei hih izôm rangin nin ridîn rang a nit.

²A thupêkhei khah nin zôm rang neh rang no; nin lungril riatna ranga fianan dengtheinahei a tir a, ramchârah kum sômilika sung PUMAPA nin Pathianin nangni ân rivâk vêl dân khah reh mai rei.

³Miriam hih ibai bangin ring no nia, PUMAPA bâia thu tinrêng isuakin kêng an iring ngai a nit iti nangni ân riat theina rangin vonṭâm dengthei nangni ân tuang a; khanungchu, nin lai riat ngai ino, nin pi neh puhei khomin an lai riat ngai ino Manna-ah khan nangni a vâi a.

⁴Hi kum sômilika sungah hin nin silbomhei sil iṭhet mak chei a, nin kehei khom ithling ual mak.

⁵Mîn a nai a îsôi ngai angkan PUMAPA nin Pathian khan nangni a îsôi ngai a nit iti hih nin lungrilin reh mai rei.

⁶Khasikah khan PUMAPA nin Pathian thupêkhei izômin, a lampuiah lôn unla, amah chu ṭi rei.

⁷PUMAPA nin Pathian khan ram iṭha takah nangni ai ṭhui rang a nit, vadung tuihei tamna, tuinâr neh rinêng rila tuipût hong isuak tamna, itlâng neh phâi omna ram;

⁸bu hei, barli hei, grep hei, theipui hei, theisen hei vângna ram; oliv neh khuaitui tamna ramah khan nangni ai ṭhui inlût rang a nit.

⁹Kha ramah khan chu ṭâm tlak no tin ua, risam nei loiin fâk zong nin ti. Kha rama lungheiah khan thîr a om a, â tlânghei ata kha sumsen choih thei nin ti.

¹⁰Nin fâk a, khop ithlâia nin om tikin chu ram iṭha tak nangni a pêk sikah khan PUMAPA nin Pathian chu inpâk nin ti.

¹¹“PUMAPA nin Pathian kha ringil tlak loi rangin ridîn rei; a dânhei, a thupêkhei vuaninta nangni kî pêk hih zôm loiin om tlak no rei.

¹²Khanonchu, ikhop ithlâi takkan nin om a, in iṭha tak takhei nin sin a, nin lua tenan neh,

¹³nin sialhei, nin berahei, nin kêlhei a hong pung a, sum neh rângkachak nin hong nei tam a, nin thil nei murdi a hong pung tenah khan,

¹⁴nin lungrilhei hong risong a ta, bôi ata Aigupta rama rithoka nangni ṭhui suaktu PUMAPA nin Pathian khah nin irngil rang a nit.

¹⁵Ani khan ramchâr rizat tak neh inrît tak takah nangni a hong iruai a, irûl tûr inah chihei neh ainuvêthei tamna ramheiah khan nangni â ruai a. Tui omnona ram iṭôlah khan lungpui ikhir taka rithokin tui nangni â sua pêk a.

¹⁶Kha ramchârah khan nin pi neh puhei iriat ngai ino Manna-ah khan nangni â fa a; nangni fiana rang neh hi nunga thil iṭha tinrêng nangni a vur theina rangin nin chungah dengtheina ai tir a nit.

¹⁷Khasikin, nin lungrilin, ‘Hi kin sum neh puanhei hih keimani râtna neh kin kut sin irâ a nit,’ ti tlak no rei.

¹⁸PUMAPA nin Pathianin richong thei rangin ritha nangni ai pêk a nit iti remai rei. Hihei a thona chu nin pi neh puhei zianga thuthlung ai siamah khan vuani tenah hin a la iamom mai sika a nit.

¹⁹“PUMAPA nin Pathian khah nin ringil a, pathian danghei nin zui a, an sinhei nin tho a, nin biak duaiin chu rimang ngêt ngêt nin ti iti vuanah hin nangni ki înriat a nit.

²⁰PUMAPA nin Pathian thu nin zôm non chu, nin va lua rang rama namhei a înrimang angkan nangni khom nangni inrimang ngêt a ti.