Read Biete DÂNNIKNA 9 Bible Online

DÂNNIKNA 9 - Biete bible

DÂNNIKNA 9

¹“O Israel mihei, ringai ta u, nangmani nêka roinpui ual neh ritha nei ual namhei ram ilua rangin vuanah hin Jordan dung chu nin irkan rang tâk a nit. A khopuihei chu a roinpuia, a kulpuihei chu rivân isun a nit.

²A mi omhei chu milian tak tak, dung risâng, irât tak tak an nit a, milian inthang nin iriat tâk ngai Anakim richihei, tutên an idoi ngam inohei an nit.

³Khannisela, atûnah hin PUMAPA nin Pathian chu mi kânginrivâm ngai mei angkan nin matona ai fe ngai a nit iti nin mit ngêiin mûng nin ti. Ani khan nin matonah annihei kha nangni lei inê pêk a ta; khanchu, a ṭonginkung angkan anni chu ûm isua nin ta, inrimang riai nin ti.

⁴“PUMAPA nin Pathianin nangni a ûm isua pêk zoi tikah khan, ‘Kin felna sikin hi ram hih ichuan rangin PUMAPA khan a ne iṭhui inlût a nit,’ nin lungrilin ti tlak no rei. Hi namhei hih an isual rai sikin kêng PUMAPA khan ai ûm isua a nit.

⁵Nin fel sik neh nin lungril idik sika an ram khah nangni a închuan rang ni mak a, hi namhei hih an isual rai sik neh nin pu Abrahama, Isaka, Jakoba hei zianga a ṭongrikhâmna kha indet rangin PUMAPA nin Pathian khan anni khah nangni ai ûm isua pêk a nit.

⁶Khasikin, PUMAPA nin Pathian khan hi ram iṭha tak hih, nin fel sika nangni ai pêk ni mak iti remai rei; nangni chu nam tuklul ilian tak kêng nin init.

⁷“Ramchârah khan PUMAPA nin Pathian ning nin inthik ziahei khah remai unla, ringil no rei. Aigupta ram ata nin hong suak nî-a rithoka hi mun nin hong tlung nî dênah hin PUMAPA chunga rihel isong ngai nin nit.

⁸Horeb tlâng khomah khan PUMAPA ning nin inthik a, nangni inrimang phar rang rakin PUMAPA ning ai thik a nit.

⁹Lungphêk, PUMAPAN nin zianga a thu thlung riziakna lungphêk ilah ranga itlângah ki hang fe lâiah khan sûn sômilikah neh zân sômilikah itlângah khan ki hang om a; îte fah mang a, tui khom in mang e.

¹⁰Khanungchu, PUMAPA khan lungphêk inikah, ama kut ngeia riziak a ne pêk a; kha lungphêkah khan itlâng kôla nin ribûm nî-a itlâng chunga meia rithoka PUMAPAN nin zianga thu a îsîr murdihei kha a chuang a.

¹¹A nit, sûn sômilikah neh zân sômilika nungah khan thuthlung riziakna lungphêk inikah kha PUMAPA khan a ne ipêk a nit.

¹²“Khanungchu, PUMAPA khan ki ziangah, ‘Thoi inla, hin taka ta hi fe zel ta roh, Aigupta ram ata ni hong iṭhui suak ni mihei khu an isiat zoi tâk a nit. An zui ranga thu kî pêk lampui ata khah an pêt tâk a, an ta rangin mirmil kêng an isiam tâk khu,’ a ti a.

¹³“Â tharin PUMAPA khan ki ziangah, ‘Hi mihei hih ki en ki enin, nam tuklul ilian tak an nit.

¹⁴Anmani inrimang rang neh vânnuai ata an riming thâi inrimangin ki tho thon lei tho rong, ne khap no roh; nangma richiheia rithokin anmani nêka nam roinpui ual neh itam ual nam lei inding rong,’ a ti nôk a.

¹⁵“Khanchu, itlâng ata khah ki ṭum a, thuthlung riziakna lungphêk inikah kha ki kut kiang ruaikan ki chôi a. Itlângah khan meichok khah a om mai a.

¹⁶Khante, PUMAPA nin Pathianin omdân rang nangni ai pêk khah nin lei mâk phar tâk a, serâtte rilim isiamin PUMAPA nin Pathian chungah khan thilisual tak nin tho tâk iti ki mu a.

¹⁷Khanchu, lungphêk inikah kha nin makung ngêiah khan ki paih inrinôi chit tâk a.

¹⁸Khanungchu, nin sualna sik neh PUMAPA chungah thil nin thonsual tên tên sikah khan PUMAPA maah khan sûn sômilikah neh zân sômilikah sung fâk khom zong loiin, tui khom in loiin ke bok nôk a.

¹⁹Nangni inrimang vang rang dôrka PUMAPA ningthikna, ningmurna neh lunghoi nona natinsat tak kha nin chungah zuang ṭuang a ti iti ki ṭi a; nikhomsela, kha ṭum khomah khan ki thu kha PUMAPA khan a ner ngai pêk a.

²⁰PUMAPA khah Arona chungah khom inrimang paih rang dôrkan a ning a thik a; khasikah khan Arona ta rang khomin kha zoro ngirah khan ki ṭongṭai pêk sa zel a.

²¹Nin sualna sika nin isiam serâtte rilim kha ki lâk a, meiah ki hâl a. Khanungchu, ki suk ikhoi a, ki nôi indi chita; khante, a di khah itlânga rithoka vadung zuang iluangah khan ki pai a.

²²“Taber hei, Massa hei, Kibrot-Hatavaa[3] nin om lâi khomin PUMAPA ning khah nin inthik pêk a nit.

²³Khante, Kades-Barneaah khan, ‘Fe unla, ram nangni ki pêk rang khah hang chuan ta rei,’ itia PUMAPA khan nangni a tir lâi khomah khan PUMAPA nin Pathian thupêk chungah khan nin rihel a, amah chu iam mak chei a, a thu khom ringai nuam mak chei ua.

²⁴Nangni ki riat phut ata PUMAPA chunga rihel isong ngai mi nin nit mai a.

²⁵“PUMAPA khan nangni inrimang rang a tum sikin sûn sômilikah neh zân sômilika chu PUMAPA maah khan ke bok a.

²⁶PUMAPA ziangah khan ki ṭongṭai a, ‘O Rêngpa PATHIAN ni sinthotheina neh ni kut irât taka Aigupta ram ata ni irtlan suak, ni mihei, ni dongtum bîkhei hih inrimang no roh.

²⁷Ni suak Abrahama hei, Isaka hei, Jakoba hei khah remai inla, hi mihei hih an tuklul lianzia hei, an siatzia hei, an sualzia hei angkah hin en no roh.

²⁸Khanonchu, ni ne ṭhui suakna Aigupta rama mihei khan, PUMAPA khan a ram inkungah khan a ṭhui inlût theino sik neh a nel sikin ramchâra that rangin ai ṭhui suak a nit, ti duai an ti.

²⁹Ni sinthotheina roinpui tak neh bân ritha rât taka ni hong iṭhui suak, ni mihei neh ni dongtum bîkhei lak an init ngêt a nit a,’ ki ti a.