Read Biete JOHANA 1 Bible Online

JOHANA 1 - Biete bible

JOHANA 1

¹A tîrin Thu a om, Thu khah Pathian ziangah a om a, Thu khah Pathian a nit.

²A tîr ata Thu khah Pathian zianga om a nit.

³Thiltinrêng ama manga siam a nit; Thil siam rêng rêng amah ṭang loia siam îte zel omak.

⁴Amah-ah khan ringna a om a,[1] kha ringna khah miriamhei invârtu a nit.

⁵Ivâr khah izîngah a zuang vâr a, izîngin amakhah lei idan thei mak e.[2]

⁶Pathian mi tir khatkah a om a, arming chu Johana a nit.

⁷Ani khah ivâr thurchi mihei inreh ranga zuang a nit; mi murdîn ama sika an iam theina rangin.

⁸Ani khah ivâr chu ni mak a, ivâr thu mihei inreh ranga zuang a nit.

⁹Kha vâr khah ivâr dik tak chu a nit; rammuala zuanga, miriam murdi elinvârtu chu a nit.

¹⁰Thu khah rammualah a om a, Pathianin ama mangin rammual hi ai siam a nit a, nikhomseh, rammualin ani khah reh mak e.

¹¹Amah a mihei ziang ngêiah a zuang a, ama mihein lei iham mak a.

¹²Khannisela, mi ṭhenkan chu an lei iham a, amah an iam a, an ziangah Pathian nai nitna a pêk a.

¹³Kha mihei kha [3] chu thisena inzir ni mak a, taksa nuamlama inzir khom ni mak a, ipa nuamlama inzir khom ni ual mak a, Pathian ata inzir an nit.

¹⁴Khante, Thu khah taksa zuang ichangin lungkhamna neh thutaka sipin ei lâiah a zuang om tâk a. A roinpuina ei mu, Pathian Nai neisun roinpuina khah.

¹⁵Johanan a chungrichân thu â sîr a, “‘Ke nunga zuang rangpu chu keima nêka roinpui ual a nit, ken zir ma piala om tâk a nit,’ kî ti khah hi mi hih a nit,” itin â khêk a.

¹⁶A lungkham rikipa rithokin lungkhamna ei dong chit, lungkham chunga lungkham nôkna.

¹⁷Dân chu Mosia manga ipe a nit a, lungkhamna neh thutak chu Krista sika zuang itlung a nit.

¹⁸Tutên Pathian la mu ngai mak e. A Naipa neisun, Pa ṭângchunga om ngêi khan a thurchi a înriat tâk a nit.

¹⁹Khante, Jerusalema Judahei khan Johana khah, “Tûm nî nit?” itia ridon rangin thiampuhei neh Levia richihei an tir a.

²⁰Johana khan thup viat loiin, “Keimah chu Mesia khah ni mang e,” itin ifel takkan a lei inpuang a.

²¹“Khate tûm nî nit? Elija nî nit mani?” itin an ridon nôk a. Ani khan, “Ni mang e,” a ti a. “Zânthla nî nit mani? an ti a. “Ni mang e” itin a sâm nôk a.

²²Anni khan, “Kha nonteh tûm nî nit. Ne tirhei kin sâm theina rangin ne ril roh. Ni thurchi im isîr rang nî nei?” an ti a.

²³Johana khan zânthla Isaia ṭong imangin a sâm a: “Keimah hih, ‘Pumapa lampui siam rei,’ itia, Ramchâra khêktu khah ki nit,” a ti a.

²⁴Kha mihei khah Farisaihei hong itir an nit.

²⁵Anni khan Johana an ridon nôk a, “Mesiah ni nit noa, Elija manih, zânthla manih khom ni nit nonteh, inkan im mi ni baptis ngai tlia?” an ti a.

²⁶Johana khan a sâm a, “Keiman chu tuiin ki baptis a; khanniseh, nin lâiah hin mi khatkah, nin iriat ngai ino a îding ṭian a nit.

²⁷Ani khah ke nungah a zuang a; khanniseh, kei chu a pheikok rui isût rang khomin inrup mang e,” a ti a.

²⁸Khahei khah Johanan a baptisna ngai mun Jordan râl nisua tianga Bethani khuaa tlung a nit.

²⁹Khante, atûkah chu Johana khan Jisua a zianga hong ipun a mu a, “En ta u, Pathian Berate, rammual sual ipêl rangtu soh.

³⁰Hi mi chungrichân hih a nit, ‘Mi ke nunga zuang rang, keima nêka roinpui ual, keimah ken zir ma khoma om tâk,’ kî ti kha.

³¹Ani khah tûm ai nit rang reh mang a; nikhomseh, Israelhein amah an riat theina ranga keimah hi tuia baptisma inchang rangin kî zuang a nit,” a ti a.

³²Khante, Johanan hi thurchi hih â sîr a, “Rithla khah vaṭhu angkan rivâna rithoka zuang iṭum a, a chunga zuang ifu ki mu a.

³³Khan khoma keiman chu la reh mang a; nikhomsela, tuia mi baptis ranga ne tirtu Pathian khan ki ziangah, ‘Mi, a chunga Rithla zuang iṭum a, â fuh mai nî mu khah Rithla Rithianga mi baptis rangtu chu a nit,’ a ti a.

³⁴Ani khah ki mu tâk a; nangni ke ril, ani khah Pathian Naipa chu a nit,” a ti a.

³⁵Khante, atûk nôkah khan Johana kha a kôilôm inikahei neh an iding a.

³⁶Jisua rilong vêl khah a mu a, “En ta u, Pathian Berate soh,” a ti a.

³⁷A kôilôm inikahei khan a thusîr khah an riatin chu Jisua an zui tâk a.

³⁸Jisua khah arhêl a, amah an hong zui a mu a, an ziangah, “Im nin izong?” a ti a. Anni khan, “Rabi, takâm nî om ngai?” itin an ridon a. (Rabi chu Minriseitu tina a nit).

³⁹Ani khan, “Hong unla hong en ta u,” itin a sâm a. (Kha zoro khah kholoi dâr ilikah vêl a nit). Khanungchu, a ziangah an fe a, a omna khah an va mu a, kha nikhuaah khan chu a ziangah an om tâk a.

⁴⁰Johana thusîr iriaa Jisua zuitu inikahei lâia khatkah kha chu Andria, Simon Petera inzirpuipa a nit.

⁴¹Ani khan ân zirpuipa [4] Simona a mu zel a, a ziangah, “Mesia kin mu tâk,” a ti a. (Mesia chu Krista [5] tina a nit.)

⁴²Khanchu, ani khan Simona khah Jisua ziangah a hong ṭhui a. Jisuan Simona khah a lei en a, “Johana naipa, Simona ni nit a; nikhomseh, Kifa nang ti tâng an ti,” a ti a. (Kifa chu Petera iti neh munkah a nit a, a omzia chu “Lungpui” itina a nit.)

⁴³Atûkah chu Jisua Galili rama fe a tum a, Filipa a mu a, a ziangah, “Ne zui roh,” a ti pêk a.

⁴⁴Filipa kha Andria neh Petera omna khua Bethsaida kho mi a nit.

⁴⁵Filipa khan Nathanaela a mu a, a ziangah, “A thurchi Dân lekhabua Mosian a irziak, zânthlahei khomin an irziak, Josefa naipa, Nazaret Jisua kha kin mu tâk,” itin â ril a.

⁴⁶Nathanaela khan, “Nazaret khua rithokin thil iṭha ai suak thei mani?” a ti a. Filipa khan a ziangah, “Hong inla, hong en roh,” a ti a.

⁴⁷Jisuan Nathanaela a zianga hong a mun chu a thurchi a lei isîr a, “En ta u, ani hih Israel mi dik tak, diknona rêng rêng nei ino a nit,” a ti a.

⁴⁸Nathanaela khan, “Ingkan im ni ne iriat?” itin ardon a. Jisuan a ziangah, “Filipan nang a koi maa theichâng kung bulah ni om lâiah khan nang kî mu tâk kêng ai nit,” itin a sâm a.

⁴⁹Nathanaela khan, “Minriseitu, Pathian Naipa ni nit. Israelhei Rêngtak ni nit,” a ti a.

⁵⁰Jisuan a ziangah, “Theichâng kung bulah ni om lâiah khan nang kî mu tâk kêng ai nit nang ki ti sika nî iam mani? Hi nêka thil roinpui ual hih la mûng ni ti,” a ti pêk a.

⁵¹Khante, Jisua ngirin a ziangah, “Thutak nangni ke ril, rivân zuang ri-ong a, Pathian vântirtônhei Miriam Naipa chunga zuang iṭum neh ilui la mûng nin ti,” a ti a.