Read Biete JOHANA 10 Bible Online

JOHANA 10 - Biete bible

JOHANA 10

¹Jisuan, “Thudik tak nangni ke ril, mi tukhom bera rikul kotbâiah lût loia, mun danga luia lût chu inru neh mi that ngai a nit.

²Kotbâia lût khah berapu chu a nit.

³Kotbâi ingâktu khan ani khah kotbâi a lei iong pêk ngai a; berahei khomin a rôl an riat a, ama berahei chu an riming chitin a koi a, a ṭhui isua ngai.

⁴Ama ta murdi a ṭhui isua zoiin chu an ma â ruai a, berahei khan a rôl an riat sikin amah an zui ngai.

⁵Mi dang chu tute zui no nih, izui nêkan itlân pêk pat an ti; a rôl an riat no sikin,” a ti a.

⁶Hi ṭongrikhek hih Jisuan â sîr pêk a; nikhomsela, a thu sîr omzia khah reh thei mak a.

⁷Khanchu, Jisuan an ziangah thu â sîr nôk a, “Thudik nangni ke ril, keimah hi berahei kotbâi ki nit.

⁸Ki matona lei izuang murdi kha chu inru neh mi that ngai an nit a, berahei khomin an thu zôm mak.

⁹Keimah hi kotbâi chu ki nit. Tukhom keimaa lût chu izôkriamkan om an ti; lût an ta, suak an ta, lêngna mun khom mu sâng an ti.

¹⁰Inru chu iruh rang neh mi that rang neh iseh rang bangin kêng ai hong ngai. Kei chu ringna nin neina rang, itam takkah nin neina ranga zuang ki nit.

¹¹“Keimah hih berapu ṭha ki nit, berapu ṭha khan berahei ta rangin a ringna a pêk ngai.

¹²Rilo mi, berapu dik ni no, berahei khom a ta ni non chu inia hong a mu kaneh chu berahei a mâk rak a, â tlân pat a, inia khan berahei chu a sê a, â chekindar chit ngai.

¹³Rilo mi a nit a, berahei a uksak no sikin a îtlân pat ngai a nit.

¹⁴Keimah hi berapu ṭha ki nit. Pan a ne iriat neh keiman Pa kî riat angkah hin, ki berahei chu ki riat a, anni khomin an ne iriat a nit. An ta ranga thi khom kî huam a nit.

¹⁶Hi bera rikula om ino bera dang khom ki nei; annihei khom la hong ṭhui sâ ngêt ki ti. Ki rôl khom ringai an ta, rikula om berahei neh an rêngkan berapu khatka nuaiah lôm khatkan om tâng an ti.

¹⁷“Ilah nôk ranga ki ringna ki pêk rang sikin Pan lung a ne ithlung a nit.

¹⁸Tutên ki ringna hih ne lah pêk thei no nih. Keima richamin kî pêk rang a nit. Â peh thei ki nit a, â lah nôk thei khom ki nit. Amakhah itho ranga ki Pa thu ne pêk chu a nit,” a ti a.

¹⁹Kha thu sikah khan Judahei lâiah inṭhenna a hong om nôk a.

²⁰An lâia mi itam takkan, “Ramrili imana ân vêt a nit. Ithôm a ṭong nin irngai pêk?” an ti a.

²¹Mi ṭhenkan chu, “Ramrili imanin chu hingkan ṭong thei no nih. Ingkan im ramrilin mitdel mit ân vâr pêk thei ranga?” an ti a.

²²Khante, Jerusalemah Tempil Lan Inthar Nôkna Kût [27] mang lâi a nit a, phalbi zoro tak a nit.

²³Jisua kha Tempila Solomona thapukah khan arlong arlong a.

²⁴Judahei a kôlah an hong ribûm a, a ziangah, “Itena sôt im lung-ôk rikâiin ni ne isia rang? Mesia ni nitin chu ifel takkan ne ril roh,” an ti a.

²⁵Jisuan a sâm a, “Nangni ke ril tâk khate; khanniseh, ne iam mak chei. Ki Pa riminga sin kî thohei hin ki thurchi nangni a înriat a nit.

²⁶Khannisela, ki bera nin nit no sikin nin iiam ino a nit.

²⁷Ki berahein chu ki rôl an riat a; kei khomin anni chu ki riat a, an ne zui ngai.

²⁸An ziangah kumtluang ringna ki pêk a, kumkhuakan thi tlak no nih; tutên ki kuta rithokin ne sut thei no nih.

²⁹Anmani ne petu ki Pa chu tinrêng nêka roinpui ual a nit; ki Pa kuta om chu tutên sut thei no nih.

³⁰Keimah neh Pa chu pumkah kin nit,” a ti a.

³¹Khanungchu, Judahei khan ama dêngna rangin lung an rût nôk a.

³²Jisuan an ziangah, “Pan isin ranga a ne ipêk sin iṭha itam takkah nin mitmuah ki sin tâk a, ki sinthohei lâia a îsik takah hin im lunga ne dêng nin itum hi?” a ti a.

³³Judahei khan an sâm a, “Sin iṭha sin sikin lungin nang deng no ning ung; khanniseh, Pathian riming ne sîr insiat a, miriam inih chakka Pathiana ner be sikin a nit,” an ti a.

³⁴Jisuan an ziangah, “Nin Dân lekhabuah, Pathianin, ‘pathianhei nin nit a ti,’ iti riziak ni mak im a?

³⁵Pathian Lekha Thu chu kumkhuakan â dik a nit iti ei riat; Pathian thu tlungnahei ilua pathiantehei iti an nitin chu,

³⁶keimah vâng chu Pan a ne iser inran a, rammuala a ne zuang itirah hin, ‘Pathian Naipa ki nit,’ ki ti sikah hin ‘Pathian ne sîr insiat,’ nin ne iti hi?

³⁷Ki Pan isin ranga a ne inuam kî sin a nit non chu ne iam no rei.

³⁸Khannisela, kî sin a nitin chu keimah nin ne iam no khoma, ki sinthohei ilua hih iam rei; Pa khah keimah-ah a om a, keimah Paah ki om iti nin riatinfel theina rangin,” a ti a.

³⁹Jisua kha iman an tum nôk a; khanniseh, an kut ata a suak tâk a.

⁴⁰Khante, Jisua khah Jordan râlah, Johanan matona mi baptisma a thona ngai munah khan a fe nôk a, kha munah khan a om mai tâk a.

⁴¹Mi tam takkah a ziangah an hong a, “Johanan sinrikhêl îte sin mak e; nikhomsela, Johanan hi mi chungchâng a lei îsîrhei rêng rêng kha chu a îdik a nit,” an ti a.

⁴²Khanchu, kha munah khan mi itam takkan amah an iam tâk a.