Read Biete JOHANA 11 Bible Online

JOHANA 11 - Biete bible

JOHANA 11

¹Bethani khuaa mi khatkah arming Lazara kha dam mak a. Bethani khah Mari neh ân zirpuinu Marthi omna khua a nit.

²Hi Mari hih Pumapa ke siriak namhoi inôt a, a sama a ke ruh pêknu khah a nit; â dam ino Lazara khah a ṭâpa a nit.

³A farhei khan Jisua ziangah, “Pumapa, ni mal lungthlung khah dam mak e,” itin ṭong an richa a.

⁴Jisuan a lei riatin chu, “Hi natna hih thina rang ni mak e; Pathian roinpuina rang a nit. Hi sikah hin Pathian Naipa hih chôiinrisângin ai om rang a nit,” a ti a.

⁵Jisuan Marthi neh ân zirpuinu neh Lazara khah lung a thlung a;

⁶khanniseh, Lazara dam mak iti thu a riat nungin a omna ngaiah khan sûn nikah a la châm nôk a.

⁷Khanungah khan a kôilômhei ziangah, “Judai ramah fe nôk tâng ei ti u,” a ti a.

⁸A kôilômhei khan a ziangah, “Minriseitu, nîkah le le Judahein lungin nang idêng rang an ti kha, khan khoma la fe nôk nî tum mani?” an ti a.

⁹Jisuan a sâm a, “Sûnkan dârkâr sômleiinikah ai om ni mak im a? Khasikin, mi tukhomin sûn khovârah a lêngin chu ivâi ngai mak, hi rammual vâr hih a mu sikin.

¹⁰Khanniseh, zânah a lêngin chu â bâ ngai, ivâr a nei no sikin?” a ti a.

¹¹Jisuan kha ṭong khah a ti zoiin chu an ziangah, “Ei malpa Lazara chu a in tâk; nikhomseh, amah kâiithoi rangin kî fe rang a nit,” a ti a.

¹²A kôilômhei khan a ziangah, “Pumapa, a in takin chu dam nôk tâng a ti,” an ti a.

¹³Jisuan Lazara thi thu â sîrna khah anmanin chu in balama in thu â sîrna manih an isôn a nit.

¹⁴Khasikin, Jisuan ifel takkan an ziangah â sîr pêk a, “Lazara a thi tâk,

¹⁵nikhomseh, nangmani sikin a zianga kî om ino khah kî lôm a nit, nin iam theina rangin. Tho a ziangah fêng ei ti u,” a ti a.

¹⁶Thoma (Phîrah an iti) khan a kôilômpuihei ziangah, “Tho Minriseitu ziangah ei rêngkan fêng ei ta, a thinaah thîng ei ti u,” a ti a.

¹⁷Jisua a hong tlungin chu Lazara an phûmna khah sûn likah a nit tâk iti a riat a.

¹⁸Bethani khah Jerusalem kôl zela om a nit, mêl inikah vêla lâ a nit.

¹⁹Judai rama mi itam takkah, an ṭâpa a thi chungchânga Mari neh Marthi beidonga om thlangam isak rangin an hong a.

²⁰Marthi khan Jisua a hong iti a riat kaneh chu amah neh rimu rangin a suak a; Mari chu insungah a lei om ṭian a.

²¹Marthi khan Jisua ziangah, “Pumapa, hin nî om ni sela chu, ki ṭâpa hih thi no nih.

²²Nikhomsela, atûn khom Pathian zianga ni nî kangân chu nang pêng a ti iti ki riat,” a ti a.

²³Jisuan a ziangah, “Ni ṭâpa thoinôk a ti,” a ti a.

²⁴Marthi khan, “Sûn nungkhônah chu thoinôk a ti iti chu ki riat,” a ti a.

²⁵Jisuan a ziangah, “Keimah hih thoinôkna neh ringna chu ki nit. Tukhom ne iam chu thi man sela ring mai a ti;

²⁶tukhom a la ringa keima ne iam chu thi tlak no nih. Amahih ni iam im?” a ti a.

²⁷Ani khan a ziangah, “O, Pumapa, ki iam. Nangmah hi Mesia, Pathian Naipa, rammuala zuang rangpu khah ni nit iti ki iam titak,” a ti a.

²⁸Marthin kha ṭong khah a ti zoiin chu ân zirpuinu Mari khah inrûkkan a va koi a, a ziangah, “Minriseitu hin a om a, nang a zong,” a ti a.

²⁹Mari khan a riat kaneh rimot takkan a thoi a, a ziangah a fe zel tâk a.

³⁰Jisua khah khua la hong lût mak a, Marthi neh an ritongna munah khan a la om mai a.

³¹In sunga Mari thlangam isaka om Judahei khan Mari rimot takkan a thoi a, a suak khah an mun chu iṭap ranga ithlâna fe an sôn a, an zui a.

³²Mari khan Jisua omna a va tlung a, ani khah a mu kaneh chu a ke bulah â bok a, “Pumapa, hin nî om ni sela chu ki ṭâpa hih thi no nih,” a ti a.

³³Jisuan Mari ṭap neh a hong izuitu Judahei ṭap khah a mu a, a lungrilin arniak a, â lung a nat tak tak a.

³⁴“Ani khah takâm nin iphûm?” a ti a. Anni khan, “Pumapa, hong inla, hong en roh,” an ti a.

³⁵Jisua a ṭap tâk a.

³⁶Judahei khan, “En ta u, Lazara hi ingkana lung ai thlung rai tâk im na?” an ti a.

³⁷Khannisela, an lâia ṭhenkah khan, “Mitdelpa mit invâr pêktu ni mak im a? Lazara khom hih a înthi no thei ino mani?” an ti a.

³⁸Khante, Jisua khah lungrilin arniak nôk a, ithlân khah a tlung tâk a. Ithlân khah ipûk a nit a, lunga sîng a nit.

³⁹Jisuan, “Lung hih thîn pai rei,” a ti a. Â thipu farnu Marthi khan a ziangah, “Pumapa, â nam seh tâng a ti, an phûmna sûn likah reng a nit tâk a,” a ti a.

⁴⁰Jisuan a ziangah, “Ni iamin chu Pathian roinpuina mûng ni ti nang ti mang im a?” a ti a.

⁴¹Khanchu, lung khah an thînpai tâk a. Khante, Jisua khah rivân tiang a tang a, “Epa, ki ṭong ni ner ngai pêk sikin ni chungah lômthu ke sîr.

⁴²Ki ṭong ni ner ngai pêk ngai iti khom ki riat; nikhomsela, hi muna mipui ribûmhei hin nangma ne itir ki nit iti an iam theina rangin amakhah chu kî ti a nit,” a ti a.

⁴³Amakhah a ti zoiin chu rôl iring takkan â khêk a, “Lazar, hong suak roh,” a ti a.

⁴⁴Mithi khah a kut a ke ithlân puana rituam pumin, a mâi khom puana rituam ṭiankan a hong suak tâk a. Jisuan an ziangah, “Sût unla, infe rei,” a ti a.

⁴⁵Mi tam takka Mari ina hong ilênghei khan Jisua sintho khah an mu a, amah chu an iam tâk a.

⁴⁶Khanniseh, mi ṭhenkah chu Farisaihei ziangah an kîr nôk a, Jisua sinthohei khah an va sîr pêk a.

⁴⁷Khanchu, Farisaihei neh thiampu lalhei khan Sanhedrinhei an rimupui a, “Hi mi hin sinrikhêl itam takka ai sinhei hih en ta u, ingkam ei tho rang tâk?

⁴⁸Hingka hin ei infe maiin chu mi tinin amah hong iam an ta; khanchu, Rom.thuneituhei zuang an ta, ei Tempil neh ei nam hi an ne zuang îsiat pêk rang a nit,” an ti a.

⁴⁹Khante, an lâia mi khatkah, arming Kaiafa, kha kuma thiampu laltak khan an ziangah, “Nin intlôk bâk reng na!

⁵⁰Mi pumpui rithûla mi khatkah ithia, nam pumpui rimang vang ino chu nin ta rangin a ṭhat ual iti nin iriat ino a nit,” a ti a.

⁵¹Amakhah ama khât lunginṭonga ai ti ni mak a, kha kumah khan Thiampu Laltak a nit a, Juda nam rithûla Jisua thi rang a lei rillôkna a nit.

⁵²Khante, an nam rang bang ni loiin, Pathian nai rithekindarhei lôm khatka â têl bûm nôkna rang khom a îsîr a nit.

⁵³Kha nikhua rithokin chu Juda ulianhei khan Jisua an that rang dân an ngaitua tâk a.

⁵⁴Khanchu, Jisua khom kha â langin Judai ramah lêng khâi mak a, khantaka rithokah khan ramchâr kôla khua khatkah arming Efraim an itia khan a fe a, amakhan a kôilômhei neh an om mai tâk a.

⁵⁵Khante, Judahei Kalkan Kût a hong nâi tâk a, thingtlânga rithokin mi itam takkah chu Kalkan Kût matona lei rithâr rangin Jerusalemah an hang fe a.

⁵⁶Jisua khah an zong a, Tempilah an ribûm lâiin an risôn a, “Ingkam nin tûng? Kûtah hin hong no nih na?” an ti a.

⁵⁷Thiampu lalhei neh Farisaihei khan amah an man theina rangin, tukhomin a omna an riatin chu, thuneituhei an iril rang a nit iti thu an ipêk a nit.