Read Biete JOHANA 12 Bible Online

JOHANA 12 - Biete bible

JOHANA 12

¹Khante, Kalkan Kût rang sûn rukka matonah, Jisua khan thina rithoka ai kâiithoi Lazara omna Bethani khuah a fe a.

²Amakhan ama ta rangin kholoi bu nêkna an inrifûk a, Marthi khan khalai rikhîlhei khah bu-an a sem pêk a, Lazara khom Jisua bukhêng iotpuihei lâiah a ṭang a.

³Khante, Marin nard siriak namhoi, man ilu tak, kilâtkah [28] a hong chôi a, Jisua ke â nôt a, a ke khah a samin a rûk pêk a. Khanchu, kha siriak namhoi inam khan in pumpui khah a sip riai tâk a.

⁴Khante, a kôilômhei lâia khatkah, Juda Iskariota, amah ân man rangtu khan,

⁵“Ithôm hi siriak namhoi hih duli rizathumka zuarin inrianghei ziangah an pêk no hi?” a ti a.

⁶Kha ṭong khah inrianghei a uksak sika ai ti ni mak a, inru a nit sika a nit. Kha mi khan sumkok â kol a, a sunga sum khah ama ta rangin ai lâk ngai a nit.

⁷Khanniseh, Jisuan, “Inbuai no rei, a thil nei hih iphûma ki om nî-a rangin rê riseh.

⁸Inrianghei chu nin lâia om mai kêng an init, kei chu nin ziangah om mai no ning e,” a ti a.

⁹Khante, Juda mi itam takkan Bethani khuah Jisua a om iti an riatin chu kha munah khan an hong a; Jisua mu nuam banga hong ni mak a, Jisuan thina rithoka ai kâiithoi Lazara mu khom an inuam a nit.

¹⁰Khanchu, thiampu lalhei khan Lazara khom khah ithat an tum tâk a,

¹¹ama sikin Judahei itam takkan anmani an heng a, Jisua an iam tâk sikin.

¹²Atûkah khan Kûta hong mipui itam takkan Jisua Jerusalemah hong a ti iti an riat a,

¹³itûm ibânhei an chôi a, ama don rangin an fe a, “Hosana, Pumapa riminga zuang chu inpâkin om riseh, Israel Rêng chu inpâkin om riseh,” itin an ipâi a.

¹⁴Jisuan sakuartung a mu a, a chungah a chuang a, Pathian Thubu-a,

¹⁵“Ṭi no roh, Zion nainu, En ta, ni rêng chu a hong e, Sakuartungte chunga chuangin,” iti riziak angkah khan.

¹⁶Kha thu khah a kôilômhein a phutah khan chu rethiam mak a; nikhomsela, Jisua chôiinrisânga a om zoi tenan chu Pathian Thubûn ama chungchâng a lei irziak a nit iti neh a chungah khangkah khan an lei itho a nit iti an riat tâk a.

¹⁷Khante, Jisuan Lazara ithlân ata a koi isua a, thina rithoka a kâiithoi lâia mipui iomhei khan kha thu khah an lei isîr mai tâk a.

¹⁸Kha sinrikhêl khah ai tho a nit iti an riat sikin mipuihei khan an lei idon a nit.

¹⁹Farisaihei khan, “En ta u, îte chang khâi mang meh; en rei, rammual pumpuiin amah kêng an izui tâk hi,” an ti a.

²⁰Khante, Kût lâia Pathian chubai iûn ranga Jerusalema honghei lâiah khan Grik mi ṭhenkah an om a.

²¹Khahei khah Galili rama Bethsaida kho mi Filipa ziangah an fe a, “Epu, Jisua mu kin nuam,” an ti a.

²²Filipa khan Andria a va ril a; khanchu, Filipa neh Andria khan Jisua an va ril a.

²³Khante, Jisuan an ziangah, “Miriam Naipa chôiinrisânga a om zoro a tlung tâk.

²⁴Thudik nangni ke ril; Far mal rinêngah a tlâka a thi non chu, armalin a om ṭian ngai a; a thi bangin kêng irâ itam takkah a îsua ngai.

²⁵Tukhom mahni ringna inpâmtu khan ichân a ta, tukhom hi rammuala mahni ringna neltu khan kumtluang ringna nei mai a ti.

²⁶Tukhomin ki sin itho a nuamin chu ne zui riseh, ki omnaah ki sin ithotu chu om sâng a ti. Tukhom ki sin itho chu ki Pan chôiinrisâng a ti.

²⁷“Atûnah hin ke lung a kâng tak tak, im ki ti rang tâk? ‘Epa, hi zoro hih ki chungah ne thlun pêk no roh,’ kî ti rang mani? Khanniseh, hi thil ituang rang pial hi ki zuangna bi chu a nit.

²⁸Epa, ner ming [29] chôiinrisâng roh,” a ti a. Khanchu, rivâna rithokin rôl a zuang suak a, “Ki chôiinrisâng tâk, la chôiinrisâng nôk ki ti,” a ti a.

²⁹Kha muna, mipui idinghei khan rôl khah an riat a, an lâia ṭhenkan, “Khuarî a nit,” an ti a; ṭhenkah nôkin chu, “Vântirtônin a îsôn a nit,” an ti a.

³⁰Jisuan an ziangah, “Kha rôl khah keima ta ranga zuang isuak ni mak a, nangmani ta rang kêng ai nit.

³¹Atûn hih hi rammual chungchâng irêla a om zoro a nit; atûn hi rammual roirêltu hih ipai suak nîng a ti.

³²Khante, keimah rinênga rithoka ikhâi inrisângin ki om tikin chu mi tin ki tiang rikuai ki ti,” a ti a.

³³Kha ṭong khah a thi rang tlia riat theina ranga a isîr a nit.

³⁴Mipuihei khan an sâm a, “Mesia chu kumkhuantluangkan ring mai a ti iti kin Dân lekhabu khan a ne îril a nit. Ingkam nangman chu, ‘Miriam Naipa hih ikhâi inrisângin om a ti,’ nî ti thei? Miriam Naipa hih tûm ai nit?” an ti a.

³⁵Jisuan an ziangah, “Ivâr hih itôitekah chu nin lâiah la om a ti. Ivâr nin la nei sungah hin lêng rei; khanchu, izîngin nangni de no nih; tukhom izînga lêng chu a fena reh ngai mak e.

³⁶Ivâr nin la nei sungah hin ivâr hih iam ta rei; khanchu, ivâr naihei nîng nin ti,” a ti a. Kha thu khah Jisuan a ti zoiin chu a rot a, an mu thei nona rangah arbîk tâk a.

³⁷An mitmua sinrikhêl itam takkah a sin nung khomin mipuihein amah iam mak a,

³⁸Zânthla Isaian, “Pumapa, kin thu sîr tûm â iam? Pumapa ritha khom tu ziangâm a îlang?” ai ti khah a hong tlung idik theina rangin.

³⁹Hi sikah hin an iiam thei ino a nit, Isaia ngirin,

⁴⁰“Pathianin an mit ân del pêk a, An ilung khom ân cho pêk a, An mitin a mu nona rang neh, An lungrilin a riatthiam nona rangin. Kha no ni sela chu, hong kîr nôk an ta, Anni khah ki lei îndam rang a nit,” itia a lei îsîr angkah khan.

⁴¹Isaian kha thu a îsîr khah Jisua roinpuizia a mu sikin a thurchi a îsîr a nit.

⁴²Khangkah dôran khom Juda ulianhei lâia mi itam takkan Jisua chu an iam tâk a; nikhomsela, Farisaihei sikin isîr inlang ngam mak a; inkhôm in ata ûmisua an nit nona rangin.

⁴³Pathian ihamna nêkan miriam ihamna an înlut ual a nit.

⁴⁴Jisuan rôl iring takkan, “Tukhom ne iam chu keima ne iam bang ni mak a, ne tirtu iam khom a nit.

⁴⁵Tukhom ne mu chu ne tirtu mu a nit.

⁴⁶Rammual invârtu ranga zuang ki nit, tukhom ne iam chu izîngah om mai no nih.

⁴⁷Tukhom ki thu sîr irian zôm no khom sela, keiman chu thiamno inchang no ning e. Rammual thiamno inchang ranga zuang ni mang a, rammual saninring ranga zuang kêng kî nit.

⁴⁸Tukhom keima ne heng a, ki thu sîr pom ino chu ama chungthu rêlpêk rang khatkah a nei. Ki thu sîr ngêi khah sûn nungkhônah chu a chungthu rêlpêktu la nîng a ti.

⁴⁹Keima iphuatotin îte isîr ngai mang a, ne tirtu, ki Pa khan ki ti rang neh ke sîr rang thu a ne ipêk ngai a nit.

⁵⁰Ama thupêk chu kumtluang ringna a nit iti ki riat. Khasikin, thu ki îsîrhei hih Pan a ne ril lam angkah takin ki îsîr a nit,” a ti a.