Read Biete JOHANA 13 Bible Online

JOHANA 13 - Biete bible

JOHANA 13

¹Khante, Kalkan Kût rang nikhua a hong nit tâk a. Jisuan hi rammual ima a, Pa zianga a fe zoro a tlung tâk iti a riat a. Ama mi rammuala omhei khah lung a thlung a, a mong idênin lung ai thlung a nit.

²Jisua neh a kôilômhei zânbu an rikhîl a. Soitana khan Simon Iskariota naipa Juda khah Jisua inman rangin ngaituana [30] a lei innei thlâm tâk a.

³Jisuan, Pan richamneina murdi a pêk iti neh Pathiana rithoka zuang a nit a, Pathian zianga fe nôk rang a nit iti a riat a.

⁴Khasikin, bukhêng kung ata khah a thoi a, a zakorfual a khek a, rirûkna puan a lâk a, a vong a.

⁵Khanungchu, tâborah tui a sung a, a kôilômhei ke arsûk tâk a, rirûkna puan ai vongah khan a rûk thiai a.

⁶Khante, Simon Petera ziang a hong tlung a, Petera khan, “Pumapa, nangman ki ke ni irsûk rang im?” a ti a.

⁷Jisuan a sâm a, “Ki sintho hih atûn chu la reh mak cheh; nikhomsela, nakanah chu la riang ni ti,” a ti a.

⁸Peteran a ziangah, “Nangman ki ke chu risuh tlak no tin,” a ti a. Jisuan a sâm a, “Ni ke ker sûk non chu ki kôilôm ni khâi no tin e,” a ti a.

⁹Simon Petera khan a ziangah, “Pumapa, kha non chu ki ke bang ni loiin, ki kut neh ki lu khom risuh sa roh,” a ti a.

¹⁰Jisuan a ziangah, “Tukhom tui risil tâk chu a ke bang ti no chu risûk nang khâi mak e; a pumin ai fâi tâk a nit. Nin lâia mi khatkah ti no chu nin rêngkan nin ifâi tâk a nit,” a ti a.

¹¹Jisuan ân man rangtu khah a riat ṭian sikin, “Nin lâia mi khatkah ti no chu nin rêngkan nin ifâi tâk a nit,” ai ti a nit.

¹²Khante, an ke arsûk pêk zoiin chu a zakorfual khah â hâk a, bukhêng a pan nôk a, an ziangah, “Nin chunga ki sintho hih a omzia nin riat thei im?

¹³Nangmanin, Minriseitu neh Pumapa nin ne ti ngai a, nin itîn dik a nit; inih khom kî nit pial a nit.

¹⁴Keimah, nin Pumapa neh Minriseitu lua manin nin ke ker sûkin chu, nangmani khomin nin ke nin risûk risak rang a nit.

¹⁵Nin chunga kî tho angkah hin nangni khomin nin tho theina rangin enton rang nangni ki înmu a nit.

¹⁶Thudik nangni ke ril, suak hih a pu nêkan roinpui mak a, tirtôn khom â tirtu nêkan roinpui ual mak e.

¹⁷Atûn chu kha thudik khah nin riat tâk a, nin zômin chu lôm tak tak nin ti.

¹⁸“Nin rêngka thu ki îsîr ni mak e; ki irthlanghei chu keiman ki riat. Nikhomseh, Pathian Thubûn, ‘Ki bukhêng ne otpuitu kha ke râl a hong chang tâk,’ ai ti khah a hong tlung idik ngêt rang a nit.

¹⁹Amahih a hong tlung man nangni ki lei îril a nit, a hong tlung tikah, ‘Ani khah keimah ki nit,’ iti nin iam theina rangin.

²⁰Thudik tak nangni ke ril, tukhom ki mi tir lei iham chu keima ne ham a nit a; tukhom ne ham chu ne tirtu ham a nit,” a ti a.

²¹Jisuan kha thu khah â sîr zoiin chu, â lung a sôl tak tak a, “Thudik tak nangni ke ril; nin lâia mi khatkan nen man a ti,” itin ân puang a.

²²Kôilômhei khan a tu bîk im ai ti an riat no sikin an ri-en risak a.

²³A Kôilômhei lâia khatkah, Jisuan lung ai thlungah khah, Jisua dep takah khalai iotin â ṭhung a.

²⁴A tu tak im ai ti riatna rangin zâizirin Simon Petera khan ani khah ân ridon a.

²⁵Khanchu, kha mi khah Jisua tiang a var thîn a, “Pumapa, tu tak im ai nit?” itin ardon a.

²⁶Jisuan a sâm a, “Ibai lek ichiang ki ta, kî pêk tak khah nîng a ti,” a ti a. Khanchu, ibai lek a lâk a, â chia a, Simon Iskariota naipa Juda khah a pêk a.

²⁷Juda khan ibai lek khah a lâk kaneh chu a sungah Soitana a lût zel tâk a. Jisuan a ziangah, “Ni tho rang khah tho vak vak ta roh,” a ti pêk a.

²⁸Kha docham rikhîlhei lâia tutên amakhah îtho sika a ziangah Jisuan ai ti pêk manih iti reh mak a.

²⁹Kôilôm ṭhenkan chu Juda khan sumkok â kol sikin Jisuan, “Kût mangna rang thil ei inanghei richoh roh,” ai ti manih, anitnole, “Inrianghei ziangah itika peh roh,” ai ti pêk manih an sôn a.

³⁰Khanchu, Juda khan ibai khah a lâk a, a rot zel tâk a. Kha zoro khah zân a nit.

³¹Juda a rot zoiin chu Jisuan an ziangah, “Atûn chu Miriam Naipa chôiinrisângin a om tâk, ama sikin Pathian khom chôiinrisângin ai om tâk a nit.

³²Amah-ah Pathian chôiinrisângin a omin chu Pathian khomin amah-ah khan Miriam Naipa chôiinrisâng a ti, chôiinrisâng zel a ti.

³³Ki naihei o, nin lâiah zoro sôt om khâi no ning e. Nangmanin ne zong nin ti; khanniseh, ‘Ki fena rangah fe thei no tin u,’ Judahei zianga kî ti pêk angkah khan nangmani ziangah khom kî ti a nit.

³⁴Khante, atûnah hin thupêk ithar nangni kî pêk a nit: lungrithlung rei. Lung nangni kî thlung angkah hin lungrithlung ngêt rei.

³⁵Lung nin rithlungin chu mi tinin ki kôilômhei nin nit iti riang an ti,” a ti a.

³⁶Simon Peteran a ziangah, “Pumapa, takâm ni fe rang?” itin ardon a. Jisuan a sâm a, “Atûn chu ki fena rangah ne la zui thei no tin e; nikhomseh, nakanah chu ne la zui ni ti,” a ti a.

³⁷Peteran, “Pumapa, ithôm atûn chu nang kî zui thei ino rang? Nangma rang sikin chu ki ringna khom pêng ki ti,” a ti a.

³⁸Jisuan a sâm a, “Keima rang sikin ni ringna nî pêk rang na? Thudik tak nang ke ril, nangman âr khuang man voi thumkah ne phial ni ti,” a ti a.