Read Biete JOHANA 14 Bible Online

JOHANA 14 - Biete bible

JOHANA 14

¹Jisuan, “Nin ilung dûk tong no riseh, Pathian iam[31] unla, kei khom ne iam rei.

²Ki Pa inah omna itam takkah a om, om no sela chu nangni ki îril rang tâk a nit; nin ta rangin mun isiam kî fe rang a nit.

³Khante, nin ta rangin mun ki hang siam zoiin chu zuang kîr nôk ki ta, ki ziangah nangni ṭhui ki ti, ki omnaah nangni khom nin om theina rangin.

⁴Ki fena rang lampui khom nin riat,” a ti a.

⁵Thoman a ziangah, “Pumapa, ni fena rang khah reh mang ung e; khasikin, ingkan im a lampui kin riat thei ranga?” a ti a.

⁶Jisuan a sâm a, “Keimah hi lampui neh thutak neh ringna chu ki nit; keimaa fe no chu tute Pa ziang tlung ngai mak.

⁷Keimah nin ne iriat ni sela chu, Ki Pa khom nin iriat rang tâk a nit; atûn chu amah nin riat tâk a, imuh khom nin mu tâk,” a ti a.

⁸Filipan a ziangah, “Pumapa, Pa khah nen mun la, kin ta rangin ân rup,” a ti a.

⁹Jisuan a ziangah, “Filip, hi ten hih nin ziangah ki om a, khan khoma ni ne lai riat ino mani? Tukhom ne mu chu Pa mu a nit. Ingkan im, ‘Pa khah keimani nen mu roh,’ nî ti hi?

¹⁰Keimah Paah ki om a, Pa keimaah a om iti nî iam ino mani? Nin zianga thu ki îsîrhei hih keima iphuatot ni mak e. Pa, keimaa om mai khan ama sin ai tho kêng ai nit.

¹¹Keimah Paah ki om a, Pa keimaah a om kî ti-ah hin ne iam rei. Anitnole ki sintho sik iluah hin ne iam rei.

¹²Thudik tak nangni ke ril, tukhom ne iam kan chu ki sintho hih la sin a ti; a nit, hi nêka roinpui ual khom la sin a ti, Pa ziangah ki fe rang sikin.

¹³Khante, ker minga îkhom nin ini chu nangni sin pêk mai ki ti, Pa chu Naipa sika chôiinrisânga a om theina rangin.

¹⁴Nangmanin ker minga îkhom nin ne[32] nin chu amakhah sin mai ki ti.

¹⁵“Nangmanin lung nin ne thlungin chu, ki thupêkhei zôm nin ti.[33]

¹⁶Khanchu, keiman Pa ziangah ngên ki ta, aman Thlangamtu [34] dang nangni pêng a ti; kumkhuaka nin zianga om rangin.

¹⁷Ani khah Rithla diktak, Pathian thutak inlangtu a nit. Rammualin amah a mu thei no sik neh a riat theino sikin ai dong thei ino a nit. Khanniseh, nangmanin chu nin ziangah a om mai sik neh nangmaniah a om mai sikin nin iriat a nit.

¹⁸“Faran nangni marak no ning e, nin ziangah zuang kîr nôk ki ti.

¹⁹Itôiteka nungah chu rammualin ne mu khâi no nih; khanniseh, nangmanin chu ne mûng nin ta, keimah ki ring sikin nangni khom ring nin ti.

²⁰Kha nikhuaah khan chu keimah Paa kî om a, nangmani keimah-a nin iom a, keimah nangmania kî om hih reh tâng nin ti.

²¹“Tukhom ki thupêkhei ihama zômtu chu lung ne thlungtu a nit. Tukhom lung ne thlungtu chu ki Pa khomin lungthlung a ti; kei khomin lungthlung ki ta, a ziangah inlâr mai ngai ki ti,” a ti a.

²²Khante, Juda (Juda Iskariota nino) khan a ziangah, “Pumapa, kin ziangah chu inlâr ni ta, rammual ziangah chu ni înlâr ino rang khah îtho sik im?” a ti a.

²³Jisuan a sâm a, “Mîn lung a ne thlungin chu ki thu zôm a ti. Ki Pa khomin ani khah lungthlung a ta, Ki Pa neh a ziangah zuang kin ta, a ziangah om mai kin ti.

²⁴Tukhom lung ne thlung inotu khan chu ki thu zôm ngai mak e. Khante, inriseina thu nin iriat hih keima thu ni mak a, Pa, ne tirtu thu a nit.

²⁵“Nin ziangah ki la om sungah hin hi thu hih nangni ki îril a nit.

²⁶Thlangamtu, Rithla Rithiang, ker minga Pan a zuk tir rang khan tinrêng nangni inrisei a ta, nin zianga ki lei îsîr tâkhei rêng rêng khah iremai rangin nangni siam a ti.

²⁷“Thlangamna nangni ki mâk pêk, keima thlangamna nangni kî pêk a nit. Rammualin ai pêk angkana nino nangni kî pêk a nit. Nin lungril dûk tong no sela, iṭi khom ṭi no rei.

²⁸‘Nangni kî mak rang a nit; nikhomseh, nin ziangah zuang kîr nôk ki ti,’ kî ti khah nin riat tâk a. Lung nin ne thlungin chu Pa zianga ki fe rang hih lôm nin ti; Pa chu keima nêkan ai roinpui ual a nit.

²⁹Amakhah a hong tlung tikah nin iam theina rangin atûn a hong tlung maah hin nangni ki lei îril a nit.

³⁰Nin ziangah thu isîr tam thei khâi no ning e; hi rammual rêng hih ai hong thiai tâk a nit. Ki chungah richam chu îte nei mak e.

³¹Nikhomsela, keiman Pa lung ki thlung a, Pan thu a ne pêk lam angkah takin kî sin ngai a nit iti rammualin a riat ai nang a nit. “Tho thoi unla, hin taka rithokin lei suak ta rei u.