Read Biete JOHANA 16 Bible Online

JOHANA 16 - Biete bible

JOHANA 16

¹“Nin iamna nin mâk nona rangin hi thu hih nangni ki îril a nit.

²Inkhôm ina rithokin nangni la ûmisuang an ta, nangni thathei murdi khan Pathian lungdo sin angkana an ribe zoro la hong tlung a ti.

³Pa neh keimah an ne riat no sikin mihei khan kha thilhei khah nin chungah la thông an ti.

⁴A zoro a hong tlung tikah nangni ki lei îril thlâm tâk a nit iti nin riatmaina rangin hi thu hih nin ziangah ki îsîr a nit. “Nin ziangah ki la om mai sikin a tîr ata hi thu hih nangni ki la îril ino pial a nit.

⁵Atûn chu ne tirtu ziangah kî fe rang tâk a nit a; khannisela, nin lâia tutên ki fena rang ner don mak chei u.

⁶Atûn chu hi thu hih nangni ke sîr pêk tâk a, nin lungril kha ngaisiatin ai sip tâk a nit.

⁷“Nikhomsela, thudik tak nangni ke ril, kî fe hih nin ta rangin ai ṭhat a nit, ki fe non chu Thlangamtu khah nin ziangah zuang no nih. Nikhomseh, ki fen chu ani khah nin ziangah zuk tir ki ti.

⁸Ani khah a zuang tlung tikin chu sual chungchâng thu hei, thiam inchangna thu hei, roirêlna thu hei an lei ringai insual iti rammual inriang a ti.

⁹Sual thu-a an idik nona chu, keimah an ne iam nona hi a nit a;

¹⁰thiam inchangna thu-a an idik nona chu, Pa ziangah kî fe rang tâk a nit a, nin ne imu khâi ino rang hi a nit;

¹¹roirêlna thu-a an idik nona chu, hi rammual roiirêltu hi a roiirêlpêkin ai om tâk hi a nit.

¹²“Nin ziangah thu itam takkah isîr rang ki la nei; nikhomsela, atûn chu nin ta rangin â reh riai intak rai a ti.

¹³Nikhomsela, Rithla diktak, Pathian thutak inlangtu khah a zuang tlung tikin chu thutak tinrêngah nangni ruai inlût a ti. Ama iphuatotin thu isîr no nia, thu ai dong khah isîr a ta, thil hong itlung rang khom nangni ril a ti.

¹⁴Ani khan keimah ne chôiinrisâng a ti, ki ṭong tihei khah lâng a ta, nangni a îril rang a nit.

¹⁵Ki Pan thil ai nei murdi chu ki ta a nit; khasikah khan kêng, ‘Rithla khan ki taa mi lâng a ta, nangni ril a ti,’ kî ti a nit.

¹⁶“Itôiteka nungah chu ne mu khâi no tin ua, itôiteka nungah khan ne mu nôk nin ti,” a ti a.

¹⁷A kôilômhei ṭhenkan, “Ei zianga a thu sîr hih im a omzia? ‘Itôiteka nungah chu ne mu khâi no tin ua, itôiteka nungah khan ne mu nôk nin ti,’ ai ti neh, ‘Pa ziangah ki fe rang sikin,’ ai ti hi.

¹⁸‘Itôitekah,’ ai ti hi î tina mani? Im a îsîr ei iriat ino a nit,” an ti a.

¹⁹Khante, Jisuan amah ṭongridon an nuam iti a riat a, an ziangah, “‘Itôiteka nungah chu ne mu khâi no tin ua, itôiteka nung ngirah khan ne mu nôk nin ti,’ kî ti kha na nin lâiah ridon risakna nin inei?

²⁰Thudik tak nangni ke ril, nangmani iṭapin irung nin ta, rammual chu lôm a ti; ngaisiatin om nin ta; nikhomseh, nin ngaisiatna chu lômnan rilet a ti.

²¹Nupangin nai a nei rangin chu naiha a tuang ngai, a dengthei zoro a tlung sikin; nikhomsela, arthla zoiin chu a dengthei khah reh nôk khâi ngai mak e, naite rammuala zuang isuak khah a lôm sikin.

²²Khangkah khan nangni khom atûn chu ngaisiatin nin om a; nikhomsela, nangni la mu nôk ki ta, nin lungril lômnan la sip a ti. Kha nin lômna kha chu tutên nangni sut thei khâi no nih.

²³“Kha nikhuaah khan chu nangmanin îte ner don khâi no tin u. Thudik tak nangni ke ril, ker minga [35] Pa zianga îkhom nin ingên chu nangni pêng a ti.

²⁴Atûn tenah hin ker mingin îte la ngên mak chei; ngên rei; khanchu, mûng nin ti, nin lôm arkipna rangin.

²⁵“Kha thu khah nin ziangah ṭongrikhekin ki îsîr a nit. Nikhomseh, ṭongrikhekin isîr loiin, ifel takka Pa thu nangni ke ril zoro la hong tlung a ti.

²⁶Kha nikhua khah a hong tlungin chu, ker mingin ani khah ngên tâng nin ti; keiman Pa ziangah nangni ngên pêk ki ti ki tina ni mak e.

²⁷Pa ngêi khan lung nangni ai thlung a nit. Keimah lung nin ne thlung a, Pathiana rithoka zuang ki nit iti nin iam sikin Pan lung nangni ai thlung a nit.

²⁸Pa zianga rithokin ki zuang suak a, rammualah ki zuang lût a; atûn chu rammual mâng ki ta, Pa ziangah kî fe nôk rang tâk a nit,” a ti a.

²⁹Khante, a kôilômhei khan a ziangah, “Atûn chu ifel takkan thu ne sîr tâk a, ṭongrikhek reng mang khâi mak che a.

³⁰Nangman tinrêng ni riat a, tutên nang an ridon khom nang mak che iti atûn chu kin riat tâk. Hi sikah hin Pathian zianga rithoka zuang ni nit iti kin iiam tâk a nit,” an ti a.

³¹Jisuan a sâm a, “Atûn chu nin iiam tâk na?

³²Ringai rei, a zoro â tlung rang tâk a nit, â tlung thiai tâk a nit, kha tikin chu mahni in chitah rithekindar vang nin ta, ki khâtin ne marak nin ti. Nikhomsela, Pa khah ki ziangah a om sikin keima khât bangin chu om no ning e.

³³Keimah-ah thlangamna nin nei theina rangin hi thu hih ki îsîr a nit. Rammualah hin dengthei ituangin nin om ngai; nikhomsela, thlangam takkan om rei, keiman rammual ke nê tâk,” a ti a.