Read Biete JOHANA 17 Bible Online

JOHANA 17 - Biete bible

JOHANA 17

¹Jisuan kha thu khah â sîr zoiin chu, rivân tiang a tang a, “Epa, a zoro a tlung tâk. Ni Naipa roinpuina peh ta roh; khanchu, Naipa khomin roinpuina nang peh thei a ti.

²Mi murdi chunga thuneina nî pêk angkah khan ani khomin amah zianga nî pêkhei khah kumtluang ringna a pêk theina rangin.

³Amahih kumtluang ringna chu a nit, nangmah Pathian tak nang iria neh nî tir Jisua Krista ria hih a nit.

⁴Ni roinpuina rinêngah ken lang tâk a, sin tum ni ne ipêk khah ki sin zoi tâk.

⁵Epa, rammual insiang maa ni zianga roinpuina kî nei ngai kha, atûn nangma ziang ngêiah roinpuina ne peh roh.

⁶“Rammual ata ni ne ipêk mihei ziangah ner ming ken rilang tâk a. Khahei khah ni ta an nit a, anni kha keimah ni ne ipêk an nit. Ni thu an zôm tâk a.

⁷Atûn chu thil ni ne ipêk murdi hih nangmaa rithoka suak a nit iti an riat tâk.

⁸Nangman thu ni ne ipêkhei khah an ziangah ki pêk a, an iham tâk a; ni ziang ata zuang ki nit iti khom an riatinfel tâk a, ni ne itir a nit iti khom an iam tâk.

⁹“Keiman an ta rang pialin kî ngên pêk a nit. Rammual ta rangin ngên mang e, nangma ta an nit sikin nangman ni ne ipêkhei ta ranga ngên ki nit.

¹⁰Ki ta murdi chu ni ta a nit a; ni ta murdi khom ki ta a nit, anmaniah ki roinpuina inlangin a om tâk.

¹¹Atûn chu ni ziangah kî hong rang tâk a nit a; rammualah om khâi no ning a, anni hi chu rammualah la om an ti. Epa Rithiang, nangman ni ne ipêkhei hih ner ming sinthotheinan ihoih roh, riming ni ne ipêk ngêiah khan; khanchu, keimah neh nangmah pumkah ei init angkan anni khom pumkah an nit theina rangin.

¹²“An ziangah ki om sungkah chu nangman keimah ni ne ipêkhei hi ner ming sinthotheinan ke hoih ngai, riming ni ne ipêk ngêiah khan. Anni chu ki sunghual a, an lâia khatka lua rimang mak, mi armang rang piala banah khan chu, Lekhabu Thu a tlung idikna rangin.

¹³Atûn chu ni ziangah kî hong rang tâk a nit, hi thil hih rammualah ki îsîr a nit, ki lômna anmaniah an nei rikipna rangin.

¹⁴Ni thu an ziangah ki pêk tâk a, keimah rammual mi kî nit ino angkan rammuala mi an nit no sikin, anni chu rammualin ai nel a nit.

¹⁵“Anni chu rammual ata ilah suak rangin nang ngên mang a, Mi Suala rithoka ihoih rangin nang kî ngên a nit.

¹⁶Keimah rammual mi kî nit ino angkah hin anni khom rammual mi ni mak e.

¹⁷Anni chu thutakin thâr inrithiang roh, ni thu chu thutak a nit.

¹⁸Rammualah ni ne itir angkan anni hih rammualah kî tir a nit.

¹⁹Anmani sik pialin ni ziangah ki irthâr a nit, anni khom ni ziangah thutaka an rithârna rangin.

²⁰“Hihei ta rang bangah hin nang ngên pêk mang e, an thu sîr sika ne iamhei ta rang khomin nang kî ngên a nit.

²¹An rêngkan pumkah an chang theina rangin nang kî ngên a nit. Epa, nangmah keimaah nî om a, keimah nangmaah kî om angkah hin, anni khom eimaniah om riseh. Pumkah chang riseh, nangman keimah ni ne itir a nit iti rammualin a iam theina rangin.

²²Nangman roinpuina ni ne ipêk ngir khah kei khomin anmani kî pêk a nit, nangmah neh keimah pumkah ei init angkana pumkah an nit theina rangin.

²³Keimah anmaniah, nangmah keimaah, an inpumna arkipna rangin; khanchu, nangman keimah ni ne tir a, lung ni ne ithlung angkan anni khom lung nî thlung a nit iti rammualin riang an ti.

²⁴“Epa, hi mi ni ne ipêkhei hih ki omnaah ki zianga om rangin ki nuam, lung ni ne thlung sika rammual insiang maa ni ne ipêk roinpuina khah an mu theina rangin.

²⁵Epa fel tak, rammualin chu nang reh mak e, keiman chu nang ki riat; hihei khom hin ni ne itir a nit iti an iriat a nit.

²⁶An ziangah ner ming ken puang tâk a, nang lân puang mai ki ti; lungthlungna, keimah lung ni ne thlungna ngêi khah anmaniah a om a, kei khom anmaniah ki om theina rangin,” a ti a.