Read Biete JOHANA 18 Bible Online

JOHANA 18 - Biete bible

JOHANA 18

¹Jisua a ṭongṭai zoiin chu, a kôilômhei neh an suak a, Kidron vatedung an rikan a. Kha munah khan rikul a om a, amakhan Jisua neh a kôilômhei khah an lût a.

²Jisua neh a kôilômhei khan kha munah khan voi itam takkah an ribuk mai ngai sikin ân man rangtu Juda khom khan kha mun khah a riat a.

³Khanchu, Juda khan Rom.sipai lômkah neh thiampu lalhei neh Farisaihei itir, Tempil vêngtuhei iṭhuiin kha rikulah khan riamrei hei, meiserhei neh romeiserhei ichôiin an fe a.

⁴Jisuan a chunga thil hong itlung rang murdi khah a riat riai a; matiang a va pan a, an ziangah, “Tûm nin izong?” itin ardon a.

⁵Anni khan, “Nazaret Jisua,” itin an lei sâm a. Ani khan, “Keimah hi [36] ki nit,” a ti a. Ân man rangtu Juda khom kha an lâiah â ding a.

⁶Jisuan an ziangah, “Keimah hi ki nit,” a ti kaneh chu nungtiang an ritol a, nuaiah an ilîr tâk a.

⁷Â thar vangin Jisuan an ziangah, “Tûm nin izong?” itin anni khah ardon nôk a. Anni khan, “Nazaret Jisua,” an ti a.

⁸Jisuan an ziangah, “Keimah hi ki nit iti nangni ke ril tâk khate. Khangkan keimah nin ne izong a nitin chu a danghei hi chu fe ta riseh,” a ti a.

⁹Jisuan hi a tina chu, “Epa, keimah ni ne ipêkhei lâia khatka lua inrimang mang e,” ai ti khah a hong tlung idikna ranga a nit.

¹⁰Khante, Simon Petera khan khandai a nei a, a thuat a, Thiampu Laltak isom a sât a, changtianga â kuar a sât iṭhul pêk a. Kha isom riming khah Malka a nit.

¹¹Jisuan Petera ziangah, “Ni khandai khah a kokah thun nôk ta roh; ki pan a ne ipêk tuangna kilât hih kî in ino rang nî sôn mani?” a ti a.

¹²Khanchu, Rom.sipai lôm an ulian inchungtak neh Judahei Tempil vêngtuhei khan Jisua an man a, an khuap a.

¹³Khante, Anna ziangah an fepui bak a. Ani khah Kaiafa tarpu a nit a, Kaiafa khah kha kuma Thiampu Laltak a nit.

¹⁴“Mi murdi, rithûla mi khatka thi chu a ṭhat,” itia Juda thuneituhei iriltu khah Kaiafa hih a nit.

¹⁵Khante, Simon Petera neh kôilôm dang khatkan Jisua khah an zui a, kha kôilôm dang khah Thiampu Laltak mêlriat a nit sikin Thiampu Laltak in rikul idênin Jisua a fepui a.

¹⁶Petera kha chu dâikot putiang a lei om a. Khanungchu, kôilôm dang khah dâikotah a va fe nôk a, dâikot vêngtu nungâk khah arsônpui a, Petera kha a hong ṭhui inlût a.

¹⁷Dâikot vêngtu nungâk khan Petera ziangah, “Nang khom hi mi kôilômhei lâia khatkah nî nit ni mak im a?” a ti a. Petera khan, “Kei chu ni mang e,” itin a sâm a.

¹⁸Kha munah khan isomhei neh vêngtu sipaihei khan a dâi sikin riholin mei an sêm a, ding chungchôiin an ua a. Petera khom khan an lâiah mei iuan a va ding sa a.

¹⁹Khante, Thiampu Laltak khan Jisua kha a kôilômhei thurchi neh a thu inrisei ngai chungchâng ardon a.

²⁰Khante, Jisuan ani khah a sâm a, “Zoro tin vântlâng riatah mi tin ziangah thu ke sîr ngai a; Juda murdi ribûmna ngai inkhôm inah neh Tempilah ken risei ngai a, inrûkkan îte isîr ngai mang e.

²¹Îtho sik im keimah teh ni ne irdon? Ki thu sîr iriahei ziangah im ki îsîr ngai ridon rei. Im ki îsîr pêk ngai an riat khate,” a ti a.

²²Khante, amakhah a ti zoiin chu vêngtu sipai khan taka omhei lâia khatkah khan Jisua mâiah â bên a, a ziangah, “Khangkah khan Thiampu Laltak nî sâm ngam na?” a ti a.

²³Jisuan a ziangah, “Thu dik ino kî ti a nitin chu, im kî tin sual, hi zâkah mihei hih iril roh. Khanniseh, thudik kî ti a nitin teh ithôm ni ne îben?” a ti a.

²⁴Khanungchu, Anna khan ikhuap pumin Thiampu Laltak Kaiafa ziangah a tir tâk a.

²⁵Simon Petera chu mei iuan a la ding mai a, “Nang khom hi a kôilômhei lâia mi khatkah nî nit ni mak im a?” an ti a. Khanchu Petera khan a phial a, “Kei chu ni mang e,” a ti a.

²⁶Khante, Thiampu Laltak isomhei lâia khatkah, Peteran â kuar ai sât pêkpu suapuipa khan Petera ziangah, “Rikulah khan a ziangah nang kî mu ni mak im a?” a ti a.

²⁷Â thar vangin Petera khan, “Ni mang e” a ti nôk a. Khanungchu, âr a khuang zel tâk a.

²⁸Jisua khah Kaiafa in ata Ram-optu inah [37] an ṭhui a. Zîng tak a la nit a, Judahei chu borinnim chang loia Kalkan Kût ruai an fâk theina rangin Ram-optu inah khan lût mak a.

²⁹Khanchu, Pilata kha an ziangah a va suak a, an ziangah, “Hi mi hih im nin nôna ai nit?” a ti a.

³⁰Anni khan, “Hi mi hin thil thonsual no sela chu ni ziangah hong ṭhui no ning ung e,” an ti a.

³¹Pilatan, “Nangmani ngêiin ṭhui unla, nin dân angkan a chungthu rêl rei,” a ti pêk a. Judahei khan a ziangah, “Keinin chu mi that theina dân nei mang ung e,” an ti a.

³²Amakhah Jisuan a thi rang tlia a lei isîr lam angkana a hong tlung theina rangin khahei khah a hong iom a nit.

³³Khanchu, Pilata khah a inah a lût nôk a, Jisua a koi a, a ziangah, “Judahei Rêng ni nit im?” itin ardon a.

³⁴Jisuan a ziangah, “Hi ṭong hih nangma lung suaka ni ne irdon im, anitnole, mi dangin ki thurchi nang an isîr pêk sik âm?” a ti a.

³⁵Pilata khan a sâm a, “Juda mi ni ne isôn mani? Ni chipuihei neh thiampu lalhein ki kut chungah nang an hong ilan a nit hih. Im nî tho pêk?” a ti a.

³⁶Jisuan a ziangah, “Ki ram chu hi rammuala hih ni mak e; ki ram kha hi rammuala hih ni sela chu ki ṭhuiruaihein doi an ta, Juda thuneituhei kutah iman ni no ning e. Ki ram chu hin ni mak e,” a ti a.

³⁷Khante, Pilatan, “Khate, Rêng nî nit im?” a ti a. Jisuan a sâm a, “Nangman Rêng ni nit ni ne ti khate; kei chu thutak inria hih ki zuang suakna bi neh rammuala ki zuangna bi chu a nit. Tukhom thutaka om khan chu ki rôl an ringai ngai,” a ti a.

³⁸Pilatan a ziangah, “Thutak im ai nit?” a ti a. Khanungchu, Pilata kha Judahei ziangah a va suak nôk a, an ziangah, “Thiamno inchang rangin îte a bi mu mang e.

³⁹Nikhomsela, nin dân angkan Kalkan Kût zoron mi tâng khatkah nangni ken zôk pêk mai ngai a. Judahei rêng hih nangni inzôk pêk inlang nin nuam im?” a ti a.

⁴⁰Khannisela, iring takkan an ikhêk a, “Hi mi hih chu nuam mang ung e, Baraba kha kêng kin inuam,” an ti a. Baraba kha chu suammi a nit.