Read Biete JOHANA 19 Bible Online

JOHANA 19 - Biete bible

JOHANA 19

¹Khanchu, Pilatan Jisua a ṭhui a, ân zêp a.

²Sipaihei khan riling lukhum an siam a, a lu-ah an inkhum a; khanchu, zakorfual senduk an inhâk a,

³a ziangah an hong a, “Chibai, Judahei Rêng,” an ti a; a mâiah an ibên a.

⁴Pilata khah a va suak nôk a, mipuihei ziangah, “En ta u, thiamno inchang rangin îte a sualna bi mu mang iti riatna rangin nin ziangah ki la hong iṭhui a nit hih,” a ti a.

⁵Khanchu, riling lukhum khah ikhum a, zakorfual senduk ihâkin Jisua kha a hong suak a. Pilatan an ziangah, “En ta u, Miriama hih,” a ti a.

⁶Thiampu lalhei neh Tempil vêngtuhein amah an mu kaneh chu an ikhêk a, “Krosah hêmde roh, krosah hêmde roh,” an ti a. Pilatan an ziangah, “Nangmanin ṭhui unla, krosah hêmde rei. Keiman chu thiamno inchang rangin îte a sualna bi mu mang e,” a ti a.

⁷Judahei khan an sâm a, “Dân kin nei a, kha dânah khan chu Pathian Naipan arbe sikin a thi rang a nit,” an ti a.

⁸Pilatan kha thu khah a riatin chu a ṭi nôk ual tâk a.

⁹Insungah a lût nôk a, Jisua ziangah, “Taka rithoka mîm nî nit hi?” itin ardon a. Khannisela, Jisuan sâm mak e.

¹⁰Khanungchu, Pilatan a ziangah, “Ni ne isâm ino rang mani? Nang inzôk thei ki nit a, krosa nang ihêmde thei khom ki nit iti nî riat ino mani?” a ti a.

¹¹Jisuan a sâm a, “Chungtianga rithoka ipe ni nit non chu ki chungah thuneina rêng rêng nei no tin e; khasikin, ni kuta ne lantu khan sual inrik ai pêl ual a nit,” a ti a.

¹²Khante, Pilatan kha thu khah a riatin chu Jisua ân zôkna rang lampui a zong tâk a; nikhomsela, Judahei an ikhêk a, “Hi mi hih nen zôkin chu Kaisara mal nî nit ino a nit. Tukhom rênga ribe chu Kaisara doia rihel an nit,” an ti a.

¹³Khante, Pilatan kha an ṭong khah a riat kaneh chu Jisua kha tualah a ṭhui a, roirêlna ṭhungmun “Lungdâp,” Hebrai ṭong a “Gabatha,” an iti-ah khan â ṭhung a.

¹⁴Kha nikhua khah Kalkan Kût inrinnî a nit a, sûnlâi tak vêl a nit. Pilatan Judahei ziangah khan, “En ta u, nin Rêng hi,” a ti a.

¹⁵Anni khah an ikhêk nôk a, “That roh, That roh; Krosah hêmde roh,” an ti a. Khanchu, Pilatan an ziangah, “Nin rêng hi krosah kî hêmde rang na?” a ti a. Thiampu lalhein an sâm a, “Kaisara banah chu rêng dang nei mang ung e,” an ti a.

¹⁶Khanungchu, Pilatan Jisua khah krosa hêmde rangin an kutah a bâng tâk a. Khanchu, Jisua khah an ṭhui tâk a.

¹⁷Jisua kha mahni kros riputin, “Luru Mun,” Hebrai ṭong a, “Golgotha,” an iti mun idênin a fe tâk a.

¹⁸Kha munah khan krosah an hêmde a, mi dang inikah an hêmde sa a, a sîr seng sengah khat khatkan, ân lâinah Jisua.

¹⁹Pilata khan inriatna arziak a, kros lêrah a târ a. “Nazaret Jisua, Judahei Rêng,” iti riziak a nit.

²⁰Jisua an hêmdena mun khah khopui kôl a nit sikin inriatna khah mi itam takkan an tep a. Inriatna khah Hebrai ṭong, Latin ṭong, Grik ṭong heia riziak a nit.

²¹Khante, thiampu lalhei khan Pilata ziangah, “Judahei Rêng,” itin riziak no roh, aman kêng “Judahei Rêng ki nit ai ti,” an ti a.

²²Pilatan a sâm a, “Ki irziak khah riziak a nit tâk,” a ti a.

²³Sipaihein Jisua krosah an hêmde zoiin chu a silbom an lâk pêk a, rangtum ilikan an ṭhen a, an risem a, sipai khatkan rangtum khatkah chit an dong a. A zakorfual khom an lâk a, amakhah ṭhuiloi zakua, rilangka không a nit.

²⁴Sipaihei khan, “Amahih chu iṭhet no min u, tûm â dong rang thlasân ei ti u,” an riti a. Pathian Thubûn “Ki silbomhei an risem a, Ki zakorfual rangin thla an sân a,” ai ti khah a hong tlung idikna rangin amakhah sipaihein an itho a nit.

²⁵Jisua kros kôla dinghei chu, a nu hei, a nu inzirpuinu hei, Mari, Klopa nupui hei neh Mari Magdalini hei an nit.

²⁶Khante, Jisuan a nu neh a kôla ding kôilôm lung ai thlung khah a mu a, a nu ziangah, “En ta, ni naipa kha,” a ti a.

²⁷Khante, kôilôm ziang khomah khan, “En ta, ni nu kha,” a ti a. Kha zoroa rithokin chu kôilôm khan a ina om rangin ani khah a ṭhui tâk a.

²⁸Kha rizoiah khan Jisuan thil tinrêng a tlung rikip tâk iti a riat a; Pathian Thubu tlung idikna rangin, “Ki tui arhâl e,” a ti a.

²⁹Kha munah khan bêl, uain thûra sip a om a; khanchu, sponj khah uain thûrah an ichia a, husop irolin [38] an târ a, a mûr an hang ithlun a.

³⁰Khante, Jisuan uain thûr khah a in zoiin chu, “Arzoi tâk e!” a ti a. Khanungchu, a lu â khûn a, a rang a chat tâk a.

³¹Judahei inrinnî a nit a, sabatnî-a kros lêra ruak iom mai kha nuam mak a, kha sabatnî khah nikhua roinpui bîk a nit a. Khasikin, Judahei khan Pilata ziangah mi an îkhâihei ke ikhiak a, an ruak kha kros ata iṭhum a, mun danga khâi rangin an ngên a.

³²Khanchu, sipaihei khah an hong a, Jisua lôma an ihêmdehei, tongtîra an îkhâipu neh mi dang kehei khah an ikhiak a.

³³Khannisela, Jisua kôlah an hongin chu a thi tâk iti an riat a. Khasikin, a kehei kha ikhiak pêk mak a.

³⁴Sipai khatkan Jisua kângah â feiin a hang sun a, khanzel thisen neh tui a zuang luang suak tâk a.

³⁵Mit ngêia hi thil imutu hin nangni khom nin iamna rangin a îsîr a nit. A thu sîr hih â dik a, thutak a îsîr a nit iti khom a riat.

³⁶Pathian Thubûn, “A ru khatkah khom ikhiak ni no nih,” ai ti khah a hong tlung idikna rangin amakhah a hong iom a nit.

³⁷Pathian Thubu ngirin, “An isunah khah la en an ti,” a ti sa a.

³⁸Kha zoiin chu, Arimathaia kho mi Josefa khan Pilata ziangah Jisua ruak ilah rangin a ngên a. Josefa khah Juda thuneituhei ṭi sika inrûkka Jisua zuitu a nit. Pilatan ruak ilah rangin a phal pêk a; khanchu, Jisua ruak khah a va lâk tâk a.

³⁹Nikodema, matona zâna Jisua zianga hongpu khan namhoi murra neh aloe ripol [39] her sômithumkah ilikah vêl ichôiin Josefa a fepui sa a.

⁴⁰Khante, an ruaikan Jisua ruak khah an chôi a, Judahei riphûm ngai dânin namhoi neh khan risompuanin an tuam a.

⁴¹Jisua an thatna munah khan rikul khatkah a om a, kha rikul sungah khan tute an la phûmna ngaino thlân ithar khatkah a om a.

⁴²Sabatnî rang inrinnî a nit tâk sikin neh ithlân khom khah inâi tenga om a nit sikin, amakhan Jisua khah an inzâl tâk a.