Read Biete JOHANA 2 Bible Online

JOHANA 2 - Biete bible

JOHANA 2

¹Khante, sûn nika nungah khan Galili ram Kana khuaah rineina a om a. Jisua nu khom amakhan a om a.

²Jisua neh a kôilômhei khom rineinaah khan an fial a.

³Khante, uain inridum khâi mak a, Jisua nu khan a ziangah, “Uain an irsam tâk kêng,” a ti a.

⁴Jisuan a sâm a, “Enu,[6] nangman ni ne lei hong iril nang mak. Ki zoro a lai tlung ino a nit,” a ti a.

⁵Jisua nu khan isomhei ziangah, “Nin zianga ai ti murdi chu tho rei,” itin â ril a.

⁶Khante, Judahein an sakho dânin risûnfâi dân an nei a, kha sikah khan lung tuibêl irukkah, an sikah ṭin ringaka manih, ṭin sarika manih vêl ikeng thei amakhan an inṭhung a.

⁷Jisuan isomhei ziangah, “Tuibêlheiah hin tui sung insip rei,” a ti a. Khaangkan tui an sung insip riai tâk a.

⁸Khanchu, an ziangah, “Atûn chu thâl unla, ruaiṭhe chongpu ziangah fepui rei,” a ti a. Khanchu, tui khah an chôi tâk a.

⁹Ruaiṭhe chongpu khan tui uain ichang tâk kha a lei ritem a, uain khah taka rithoka manih reh mak a; tui ithâltu isomhei khan chu an riat a. Khanungchu, ruaiṭhe chongpu khan moineitu khah a koi a,

¹⁰a ziangah, “Mi tinin uain iṭha an sem bak a, itam takkah an in zoi tenan chu uain ṭha ok ino an isem ngai a nit a. Khanniseh, nang chu atûn tenan uain iṭha ni la sem mai a,” a ti pêk a.

¹¹Jisuan hi sinrikhêl masatak hih Galili rama Kana khuah a sin a, a roinpui tlia ân lang a, a kôilômhei khan amah an iam tâk a.

¹²Kha rizoiin chu, Jisua kha a nu neh ân zirpuihei neh a kôilômhei neh Kapernaum khuaah an fe a, amakhan sûn itôitekah chu an châm a.

¹³Khante, Judahei Kalkan Kût a nâi teng tak sikin, Jisua kha Jerusalemah a fe a.

¹⁴Khante, Tempilah khan sialhei, berahei neh pharvalihei lei izuarhei neh sum inrithleng ngaihei an docham bula lei iṭhung khah a mu a.

¹⁵Khanchu, zêpna ruirual angkana a siam a, an berahei, an sialhei neh mîring dang murdi khah an rêngkan Tempil ata kha a ûmisua riai a; sum ithlengtuhei docham khah a nam inkûi pêk a, an sum khom a thekindar pêk chit a.

¹⁶Khante, pharvali zuarhei ziangah khan, “Hin tak ata chôi suak vang rei. Ki Pa in hih rivai munin siam no rei,” a ti a.

¹⁷Khanchu, “Ni ina ki ṭhatnemringaina hin ne fah zoi a ti,” iti riziak kha a kôilômhei khan an riat nôk tâk a.

¹⁸Khante, Juda thuneituhei khan a ziangah, “Hi thil itho rangah hin richam ni nei iti inlangnan sinrikhêl im ni nen mu rang?” an ti a.

¹⁹Jisuan an ziangah, “Hi Tempil hih ṭhet unla, sûn thumkan sininding nôk ki ti,” a ti a.

²⁰Khante, Judahei khan, “Hi Tempil sinna rangah hin kum sômilikah kum irukkah ai nang a nit a, nangman sûn thumkan nî sininding nôk thei rang mani?” an ti a.

²¹Nikhomsela, Jisuan Tempil ai ti khah ama takpum thu a îsîr a nit.

²²Khanchu, thina rithoka kâiithoia a om tenah khan hi thu hih a lei isîr tâk iti a kôilômhein an riat suak nôk a; Pathian Lekha Thu neh Jisua thu sîr tâkhei khah an iam tâk a.

²³Khante, Jerusalemah Kalkan Kût Jisuan a mang lâia a sinrikhêl tho â mutu mi itam takkahei khan amah an iam tâk a.

²⁴Nikhomsela, Jisuan mi murdi a riat infel sikin kha mihei chungah khan â lung thi mak a.

²⁵An lungrila om khah a riat vang sikin mihei thurchi khah tutên an iril ai nang ino a nit.