Read Biete JOHANA 20 Bible Online

JOHANA 20 - Biete bible

JOHANA 20

¹Pathiannî zîng takah, a la zîng lâiin, Mari Magdalini khah ithlânah a va fe a, ithlân kotbâia lung khah inlum paiin a va mu a.

²Khanchu, Simon Petera neh kôilôm dang Jisuan lung ai thlung ziangah khan a va tlân a, an ziangah, “Ithlâna rithokin Pumapa khah an lâk suak a, an siana lak reh mang e,” a ti a.

³Khanungchu, Petera neh kôilôm dang khah ithlânah an fe tâk a.

⁴An ruaikan an itlân a, kôilôm dang khan Petera a khêl a, ithlân kha a tlung masa a.

⁵Â khûn a, risompuan iomhei kha a mu a, a sungah khan chu lût mak a.

⁶Simon Petera khom â nungah a zuang tlung a, ithlân sungah khan a lût thal a; risompuan iomhei kha a mu a.

⁷Jisua lu tuam puan kha chu risompuan lâiah om loiin, rizuata a khâta omin a mu a.

⁸Khanungchu, kôilôm dang, ithlân tlung masa khom khah a lût sa tâk a, a mu a, a iam tâk a.

⁹Pathian Thubu-a mithi lâia rithokin la thoi nôk a ti, ai ti khah anni khan an lai riatthiam ngir ino a nit.

¹⁰Khanchu, kôilômhei khah inah an kîr nôk tâk a.

¹¹Mari chu ithlân putiang iṭap pumin â ding a. Ṭap pumin â khûn a, ithlân sung kha a zuk vêng a.

¹²Vântirtôn inikah, a ngoia rivon Jisua ruak an inzâlna luthlun tiang khatkah, pheithluan tiang khatkah, iṭhungin a mu a.

¹³Anni khan a ziangah, “Nupangnu, ithôm nî ṭap?” an ti a. Ani khan a sâm a, “Ki Pumapa an lâk a, an siana ki riat khâi no sika a nit,” a ti a.

¹⁴Amakhah a ti zoiin chu a hang rihêl a, Jisua ding a mu a; nikhomsela, Jisua a nit iti reh mak a.

¹⁵Jisuan a ziangah, “Nupangnu, ithôm nî ṭap? Tûm nî zong?” a ti a. Ani khan rikul ienkoltu a sôn a, a ziangah, “Epu, amah nî lâk suak a nitin chu ni siana ne ril roh; khanchu, fêng ki ta, ani khah ki va lâka rang,” a ti a.

¹⁶Jisuan a ziangah, “Mari,” a ti a. Khanchu, a tiang a ngat a, Hebrai ṭongin, “Raboni,” a ti a. (Amakhah Minriseitu tina a nit.)

¹⁷Jisuan a ziangah, “Ne tuh khâi no roh, Pa ziangah la fe mang e. Nikhomsela, ki suapuihei ziangah fen la, ‘Ki Pa, an Pa, ki Pathian, an Pathian ziangah kî kîr nôk rang tâk a nit,’ iti va ril roh,” a ti a.

¹⁸Khanchu, Mari Magdalini khah a fe tâk a, Pumapa a mu tlia neh a irilhei khah kôilômhei a va sîr pêk tâk a.

¹⁹Kha nikhua, Pathiannî kholoiah khan, Juda thuneituhei an ṭi sikin kôilômhei khah insungah inkhâr rikalin an ribuk a. Khante, Jisua a hong a, an lâiah â ding a, “Nin chungah thlangamna om riseh,” a ti a.

²⁰Amakhah a ti zoiin chu a kut neh a kâng ân en a. Pumapa kha an mun chu kôilômhei khah râifânin an sip a.

²¹Â thar vangin Jisuan an ziangah, “Nin chungah thlangamna om riseh,” a ti nôk a. “Pan a ne itir angkan kei khomin nangni kî tir a nit,” a ti a.

²²Amakhah a ti zoiin chu an chungah arthuak a, an ziangah, “Rithla Rithiang nei rei.

²³Tu sual khom nin îzâ chu izâ nîng a ta, nin îzâ no chu izâ ni no nih,” a ti a.

²⁴Kôilôm Sômleiinikahei lâia Thoma (Phîra an iti) khah, Jisua hong lâiah khan an lâiah lei omak a.

²⁵Khasikin, kôilôm danghei khan a ziangah, “Pumapa khah kin mu tâk,” an ti pêk a. Thoma khan an ziangah, “A kuta thîr kilna behei ki mu noa, kha thîr kilna behei khah ki kutṭimin ke khîk noa, a kânga sâbe khah ki tôn no zelin chu iam no ning e,” a ti a.

²⁶Sûn iriatka nungah chu kôilômhei khah insungah an ribuk nôk a, Thoma khom an lâiah a om sa a. Inkhârhei khah arkal khap a nit a; khanniseh, Jisua a hong a, an lâiah a hong iding a, an ziangah, “Nin chungah thlangamna om riseh,” a ti a.

²⁷Khanchu, Thoma ziangah, “Ni kutṭimin ikhin la, ki kuthei en roh; hang iban inla, ki kâng khom tôn roh. Iam loiin om non la, iam ta roh,” a ti pêk a.

²⁸Thoman a sâm a, “Ki Pumapa neh ki Pathian ni nit,” a ti a.

²⁹Jisuan a ziangah, “Ni ne mu sikin ni ne iiam na? Mu loia iamhei chu mi hamṭha an nit,” a ti a.

³⁰A kôilômhei mu chungah sinrikhêl itam takka a tho a, khahei khah hi lekhabuah hin riziak ni mak e.

³¹Nikhomsela, Jisua hih Mesia, Pathian Naipa a nit iti nin iam theina rang neh amah nin iamna sika ringna nin nei theina ranga hihei hi chu riziak a nit.