Read Biete JOHANA 3 Bible Online

JOHANA 3 - Biete bible

JOHANA 3

¹Khante, mi khatkah, arming Nikodema a om a, Judahei ruaitu, Farisai pôla mi a nit.

²Kha mi khah zânkah chu Jisua ziangah a hong a, a ziangah, “Rabi, Pathian ziang ata Minriseitu zuang ni nit iti kin riat. Pathian an ziangah a om non chu tutên hingkana sinrikhêl nî tho angkana hih tho thei no nih,” a ti a.

³Jisuan a sâm a, “Thutak nang ke ril, mi tukhom a suaknôk [7] non chu Pathian Ram mu thei no nih,” a ti a.

⁴Nikodema khan a ziangah, “Ingkan im mi a ûnlian nungin a suaknôk rang? A nu sungah lût thei tlak no nia, isuak khom voi nikah suak nôk thei tlak no nih,” a ti a.

⁵Jisuan, “Thutak nang iril ki ti, mi tukhom tuiah neh rithlan a suak nôk non chu Pathian Ram [8] lût thei no nih.

⁶Taksaa inzir chu taksa mi a nit a, Rithlaa inzir chu rithla mi a nit.

⁷‘Ni suaknôk rang a nit,’ kî ti hih arkhêl ti no roh.

⁸Phâivua hih a nuamna tiang tiang a râng ngai a, â rî khom ni riat a; nikhomsela, taktianga hong rithok im ai nit iti neh, taktiang im ai fe rang iti chu reh mak che. Mi tukhom Rithlaa suak chu khangkah khan an nit,” a ti pêk a.

⁹Nikodeman, “Amakhah Ingkan im a nit thei rang?” a ti a.

¹⁰Jisuan a ziangah, “Israelhei lâiah minriseitu lian ni nit a, hi thu hih nî riat thei ino mani?

¹¹Thutak nang ke ril, kin iriat khah kin isîr a, kin imu khah kin inpuang ngai a; khanniseh, tutên kin thusîr iham nuam mak chei.

¹²Rammual thil nangni ke sîr pêk iluan ne iam mak chei a, rivân thil nangni sîr pêk inlang vâng chu ingkan im nin ne iam thei ranga?

¹³Mi tute rivâna hang ife tâk la om ngai mak a, Miriam Naipa, rivâna rithoka zuang iṭumah ti no hi chu,” a ti a.

¹⁴Mosian ramchâra dâr irûl a ikhâi angkah khan Miriam Naipa hi ikhâiin ai om ngêt rang a nit.

¹⁵Tukhom ama iam kan chu kumtluang ringna an neina rangin.

¹⁶Pathianin rammual lung a thlung tak tak a; khanchu, a Naipa neisun a pêk a; tukhom ama iam kan chu thi loia kumtluang ringna an neina rangin.

¹⁷Pathianin rammual thiamno inchang rangin a Naipa rammualah zuk tir mak a, rammual inring rangin a zuk itir a nit.

¹⁸Tukhom Naipa iam chu thiamno changin omak a, tukhom â iam ino chu atûn ata thiamno changin an iom pial tâk a nit, Pathian Nai khât khah an iam no sikin.

¹⁹Thiamno chang tlia chu hingka hin a nit: ivâr khah rammualah a zuang a; khannisela, mihein ivâr nêkan izîng an kan ual, an sinthohei â sual sikin.

²⁰Tukhom sual isin murdîn ivâr an nel ngai a, ivârah khom hong ngai mak; an sintho sualhei ilang an nuamno sikin.

²¹Thil idik isinhei murdi ivârah an hong ngai, an sinthohei khah Pathian thu zôma sin an nit iti ivâr khan ân lang theina rangin.

²²Kha rizoiin chu Jisua khah a kôilômhei neh Judai ramah an fe a, amakhan zoro sôt zankah an lâiah a châm a, baptisma ân chang a.

²³Johana khomin Salim kho kôla Ainon munah khan mi a baptis ngai a, kha munah khan tui a tam sikin. Mihei a ziangah an fe a, a lei baptis ngai a.

²⁴Kha zoroah khan Johana kha tâng inah ikhum la ni mak e.

²⁵Khante, Johana kôilôm ṭhenkahei neh Juda khatkah risûnfâina dân thu-ah an lei rikhal a.

²⁶Khanchu, Johana ziangah an fe a, “Minriseitu, Jordan râla ni zianga om, a thurchi ni isîr ngai khah ni la riat im? Ani khan atûnah hin mi a baptis a, mipuiin ani khah an ipun tâk a nit,” an ti a.

²⁷Johanan a sâm a, “Pathianin a pêk non chu tutên îte dong thei ngai mak.

²⁸‘Keimah chu Mesia ni mang a, a matona fe ranga tir ki nit,’ kî ti khah nangmani ngêi ki thu riatpuituhei nin nit.

²⁹Imoi pasal chu moineitu khah a nit; nikhomseh, moineitu rual, a kôla dinga a he ringai ṭian khan moineitu rôl a riatin chu a lôm tak tak ngai a. Khaangkan kei khom ki lômna inrikipin ai om tâk a nit.

³⁰Ani chu â roinpui tîr tîr rang a nit a, keimah chu â chîn tîr tîr rang ki nit,” a ti a.

³¹Chungtianga rithoka zuang iṭumtu chu mi tin tin nêka â roinpui a nit; rinênga rithoka hong inzir chu rinêng mi a nit a, rinêng thil â sîr ngai; khanniseh, rivâna rithoka zuang iṭum chu tinrêng chunga ân chungtak a nit.

³²Rivâna rithoka zuang iṭum khan thil ai mu neh ai riathei khah â sîr a; nikhomsela, tutên a thusîr khah iham mak e.

³³Khanniseh, tukhom a thusîr iham khan Pathian chu â dik iti an inam indet ngai a nit.

³⁴Pathianin ai tir khan chu Pathian thu â sîr ngai a, Pathiannin ama Rithla chu rikip [9] takkan ai pêk ngai a nit.

³⁵Pa khan a Naipa lung a thlung a, a kutah tinrêng ai sia tâk a nit.

³⁶Tukhom Naipa iam kan chu kumtluang ringna an nei tâk; tukhom Naipa thu zôm ino chu ringna nei no nia, an chungah Pathian ningthikna ai om mai rang a nit.