Read Biete JOHANA 5 Bible Online

JOHANA 5 - Biete bible

JOHANA 5

¹Kha rizoiin chu Judahei Kût khatkah a om a, Jisua khom Jerusalemah a fe a.

²Khante, Jerusalemah khan Bera Dâikot kôlah dîl khatkah, Hebrai ṭonga Bethesda an iti kha a om a;[11] kha dîl khan thapuk ringakah a nei a.

³Amah khan dam ino itam takkah, mitdelhei, kebâihei, izenghei an om a,[12] tui châng zoro an ngâk a,

⁴a kâr kârah dîlah khan vântirtôn a zuang a, tui khah a zuang inchâng ngai a. Kha tui chang zoroa dîla lût masa tak chu ingkana natna khom ni seh an idam ngai a nit.

⁵Khante, mi khatkah, kum sômithumkah kum iriatka dam khâi ino khom a om a.

⁶Jisuan kha muna zâlin a mu a, isôt takka dam khâi ino a nit iti a riat a, a ziangah, “Indam ni nuam im?” itin ardon a.

⁷Khante, dam ino khan, “Epu, tui châng zoroa dîla ne zu thak rang tute nei mang a; ilût ki tum sungin mi dangin an ne ikhêl nôk ngai a nit,” itin a sâm a.

⁸Jisuan a ziangah, “Thoi inla, ni puantha chôi inla, ken lôn ta roh,” a ti pêk a.

⁹Khanchu, kha mi khah voikarengin a hong dam zel a, a puantha a chôi a, ken a lôn tâk a. Kha nikhua khah sabatnî a nit a.

¹⁰Khasikin, Judahei khan â dam tâkpu ziangah, “Vuani hih sabatnî kêng ai nit; ni puantha chôia lôn hih ei dânin ai phal ino a nit,” an ti a.

¹¹Khante, ani khan an ziangah, “Nen damtu khan, ‘Ni puantha chôi inla, ken lôn ta roh’ a ne iti kêng,” itin a sâm a.

¹²Anni khan, “Hingkana tho ranga nang iriltu hih tûm ai nit?” an ti a.

¹³Khanniseh, kha â dampu khan Jisua khah tûm ai nit lak reh mak a; kha munah khan mipui itam takkah an om a, Jisua lak chu a lei rot pat tâk a.

¹⁴Kha rizoiah khan Jisuan ani khah Tempilah a mu a, a ziangah, “Ringai roh, nî dam tâk a nit, isual nôk khâi no roh; khanonchu, ni chungah thil ṭhano ual a tlung duai lôiin,” a ti a.

¹⁵Khanungchu, kha mi khan Judahei ziangah ân damtu chu Jisua a nit iti a va ril tâk a.

¹⁶Khanchu, sabatnî-a mi ân dam sikah khan Jisua kha nuamning an lo tâk a.

¹⁷Jisuan an ziangah, “Ki Pan sin a tho mai ngai a, Kei khomin ama angkan sin kî tho mai a nit,” a ti a.

¹⁸Khangkan a ti sikin Judahein ithat rangin an tum nôk ual tâk a, sabatnî ân bor iti sik bang ni loiin, Pathian khah, “Ki Pa a nit,” itia Pathian itlukin arbe iti sik khomin a nit.

¹⁹Khante, Jisuan anni khah a sâm a, “Thudik tak nangni ke ril, Naipan ama thun îte tho thei mak; Pa sintho ai mu banah chu; Pan sin ai tho khah Naipa khomin ai tho a nit.

²⁰Pan Naipa lung a thlung a, a sintho murdi a înmu ngai a nit. Hi nêka sin roinpui ual hi nangni lan mûng a ti, kha tikin chu nin ringai lar khêl a ti.

²¹Pan mithihei a kâiithoi a, ringna ai pêk ngai angkan, Naipa khomin ai nuam murdi chu ân ring ngai.

²²Pan tute roirêl pêk ngai mak, Naipa ziangah roirêlna chu ai lan riai a nit.

²³Mi murdîn Pa marit an itho angkan Naipa khom marit an thona rangin. Tukhom Naipa marit tho no chu ama tirtu Pa khom marit ai tho no a nit.

²⁴“Thudik tak nangni ke ril, tukhom ki thu riaa, ne tirtu iam kan chu kumtluang ringna a nei tâk, thiamno changin om no nia, thina rithokin a suaka ringnaah ai lût tâk a nit.

²⁵Thudik tak nangni ke ril, a zoro â tlung rang tâk, atûn khom a tlung thiai tâk; mithihein Pathian Naipa rôl an riat tikin chu, â riahei kangân chu ring an ti.

²⁶Pa chu ringna nâr ai nit angkan, Naipa khom hi ringna nârin ai siam a nit.

²⁷Khante, Miriam Naipa a nit sikin a ziangah roirêl ranga richamneina ai pêk a nit.

²⁸Amahih arkhêl ti no rei; a zoro â tlung rang tâk, kha tikin chu mithihein a rôl riang an ta,

²⁹ithlân ata hong thoi an ta, sin iṭha sinhei chu ringna changin thoinôk an ta, sin isual isinhei chu thiamno changin thoinôk an ti.

³⁰“Keima khâta richamneinan îte tho thei mang e; Pathianin a ne ril lam angkah takin roi kî rêl a nit, ki roirêl khom â dik a nit. Keima nuamlam isin tum mang a, ne tirtu nuamlam kêng isin kî tum.

³¹“Mahni thurchi isîr nin lang, ki thu sîr kha idik no nih.

³²Nikhomsela, mi dang, ki thurchi minrehtu a om; ani khan ki thurchi a isîr khah â dik iti ki [13] riat a.

³³Nangmanin Johana ziangah mi nin tir a, ani khan thutak nangni a lei iril a.

³⁴Miriam riatpuitu nang mang e; khannisela, saninringa nin om theina rangin amahih ki îsîr a nit.

³⁵Johana khah meiser ichok ivâr tak angkah a nit, a vâra ihoi takka la om khom hi nin inuam a nit.

³⁶Nikhomsela, Johana riatpuina nêka riatpuitu roinpui ual kî nei a nit. Pan sin itho ranga a ne ipêkhei, atûna ki sintho lâihei hin Pan a ne itir a nit iti a înriat a nit.

³⁷Pa ne tirtu khom khan ki thurchi a înriat sa a nit, nangmanin chu tiklâi khomin a rôl la reh ngai mak chei a, a mêl khom la mu ngai mak chei.

³⁸A thu khom nin lungrilah vong mai ngai mak chei, a mi tirah hih nin iam no sikin.

³⁹Pathian thubu nin tep inchial ngai, a sungah kumtluang ringna omin nin iam sikin. Kha Pathian Thubuhei ngêi khan ki thurchi an îsîr a nit.

⁴⁰Khanniseh, ringna nei rangin ki ziangah hong nuam mak chei.

⁴¹“Miriam inpâkna zong mang e,

⁴²Nangni chu ingkana mîm nin init nangni ki riat, nin lungrilah Pathian lungthlungna zel nei mak chei u, iti kî riat a nit.

⁴³Ki Pa richamin ki zuang a; nikhomsela, ne lei iham mak chei; mi dang mahni richamin hong seh chu lei iham nin ti.

⁴⁴Pathian tak iomsun inpâkna zong nuam loiin, nin khâta ripâk risak nin inlut a; khangkan a nitin teh ingkam nin ne iam thei rang?

⁴⁵Keiman Pa makungah nangni doi ki ti sôn no rei. Nangni doi rang chu Mosia, nin rinpui tak khah a nit.

⁴⁶Mosia kha nin iiam ni sela chu kei khom nin ne iam rang a nit; ani khan keima thurchi kêng a irziak a nit.

⁴⁷Nikhomsela, a thu riziak khah nin iam non teh, ki thu sîr ingkan im nin iam thei ranga?” a ti a.