Read Biete JOHANA 6 Bible Online

JOHANA 6 - Biete bible

JOHANA 6

¹Kha rizoiah khan Jisua kha Galili dîl râl tiang a fe tâk a. (Tiberia dîl khom an ti sa ngai.)

²Dam inohei chunga a sinrikhêl sinhei an mu sikin mipui itam takkan an zui a.

³Khante, Jisua khah itlângah a lui a, a kôilômhei neh an iṭhung a.

⁵Khante, Jisuan a hei thlîr vêl a, mi itam takkah amah hong ipun kha a mu a, Filipa ziangah, “Hi mihei fâk rangin takâm ibai ei richôk rang?” a ti a.

⁶Kha ṭong khah Filipa rinakna ranga ai ti a nit, a tho rang chu aman a riat ṭian a.

⁷Filipan a sâm a, “Mi tinin ichîntek teka an dong rang khomin duli rizanikah man ibai khomin dum no nih,” a ti a.

⁸A kôilômhei lâia khatkah, Simon Petera inzirpuipa Andria khan,

⁹“Barli bai ringakah neh inga inika nei naipangte khatkah hin a om a; nikhomsela, hi zâka mihei fâk rangin chu îte chang no nih,” a ti a.

¹⁰Khante, Jisuan “Mipuihei hih inṭhung rei,” a ti a. Kha munah khan loisûl itam takkah a om a. Mipuihei khah an iṭhung tâk a, patling ringot khom sângringakah vêl an nit.

¹¹Jisuan ibai khah a lâk a, Pathian ziangah lômthu â sîr a, khantaka ṭhunghei khah a sem pêk tâk a; khangkah ngirin inga khom khah a sem a; an nuam dôr dôrkah an rêngkan an chang pak a.

¹²An khop khai nungin chu a kôilômhei ziangah, “Ite ripai loi rangin fâk bân khah bûm riai rei,” a ti a.

¹³Khanchu, an rifuang riai a, barli bai ringaka fâtuhei fâk bân khah khamlu sômleiinikah a la sip a.

¹⁴Khante, kha mipuihei khan Jisua sinrikhêl sin khah an mun chu, “Hi mi hih zânthla, rammuala zuang rang khah a nit ngêt hih,” an ti a.

¹⁵Khanchu, ani khah zâlrâta mana rênga siam an tum iti Jisuan a riat sikin ama khât bangin itlângah a fe[14] nôk tâk a.

¹⁶Khante, kholoi a hong nitin chu kôilômhei khah dîlah an zu fe a,

¹⁷rikuangah an chuang a, dîl râl Kapernaum tiang an pan a. Zân a hong zîng tenan khom Jisua kha an ziang la hong tlung mak a.

¹⁸Thlipui a hong râng sikin tui kha a hong rifôn natinsat tak tak a.

¹⁹Khante, kôilômhei khan mêl ithum mêl ilikah vêl an hei zâp tenan chu Jisua tui chunga lôna rikuang tianga hong ipun khah an mu a, an ṭi tâk a.

²⁰Jisuan an ziangah, “Keimah kêng kî nit, ṭi no rei,” a ti pêk a.

²¹Khanungchu, rikuangah khan an inchuang a, rikuang khan an ipan imuang khah an tlung zel tâk a.

²²Atûkah chu, dîl râl kiangtianga mipui iomhei khan rikuang khatkah bang ti no chu rikuang dang omak iti an mu a, Jisua chu a kôilômhei ziangah rikuangah chuang mak a, a kôilômhei khah an khâta fe an nit iti an riat a.

²³Pumapan lômthu â sîr zoia ibai an fâkna mun kôlah khan Tiberi khua rithoka hong rikuang danghei kha an hong tlung a.

²⁴Mipuihein Jisua neh a kôilômhei khah kha munah khan om khâi mak iti an riatin chu anni khom rikuangah an chuang a, Jisua zongin Kapernaumah an fe tâk a.

²⁵Khante, mipuihein Jisua kha dîl râl kiangtiangah khan an hong mun chu a ziangah, “Minriseitu, tik zoroah khan im hi tiang râl ni hong itlung?” an ti a.

²⁶Jisuan a sâm a, “Thudik tak nangni ke ril, sinrikhêl nin mu sika nin ne izong ni mak a, ibai nin fâk sik neh nin irsam murdi nin mu sika nin ne izong kêng ai nit.

²⁷Ifâk rimang thei zel rizûlin rivâk rivâk no unla, kumtluang ringna dai rang ifâk rizûlin rivâk lem rei. Kha fâk khah Miriam Naipan nangni pêng a ti, Pa Pathianin ani khah risin ai sia tâk a nit,” a ti a.

²⁸Khanchu, anni khan a ziangah, “Pathian lungdo kin sin theina rangin im kin sin rang?” itin an ridon a.

²⁹Jisuan a sâm a, “Pathianin isin ranga nangni ai nuam chu amahih a nit, a mi tir hih iam rei,” a ti a.

³⁰Anni khan a ziangah, “Kin mua kin iam theina rangin î sinrikhêl im ni sin rang? Im ni sin rang tâk?

³¹Kin chibulhein chu ramchârah Manna khah an fâk a, Pathian Thubûn, ‘Rivâna rithokin ifah rang ibai a pêk,’ ai ti angkah khan,” an ti a.

³²Jisuan an ziangah, “Thudik tak nangni ke ril, Mosian ibai nangni ai pêk khah rivâna rithoka ni mak e; ki Pa khan kêng rivâna rithokin ibai dik nangni ai pêk a nit.

³³Pathianin ibai nangni ai pêk chu rivâna rithoka zuang iṭum a, rammual zianga ringna petu hih a nit,” a ti a.

³⁴Anni khan a ziangah, “Epu, kha bai khah ne peh mai roh,” an ti a.

³⁵Jisuan an ziangah, “Keimah hih ringna bai chu ki nit. Tukhom ki zianga hong kangân chu an vonṭâm no nia; tukhom keima ne iam chu an tuirihâl khâi no nih.

³⁶Khanniseh, nangmanin chu nin ne mu khomin ne la iam mak chei iti nangni ke ril.

³⁷Pan a ne ipêkhei murdi chu ki ziangah hong an ta, ki zianga hong kangân chu tute ûmisua tlak no ning e.

³⁸Mahni lungdo sin ranga rivâna rithoka zuang ni mang a, ne tirtu lungdo sin ranga zuang kêng kî nit.

³⁹Ne tirtu lungdo chu amahih a nit; aman a ne ipêk murdi tute inrimang loia nikhua nungkhônah an rêngka kâiithoi rang hi a nit.

⁴⁰Ki Pa lungdo chu amahih a nit; Naipa mua ama iam murdîn kumtluang ringna nei sela, anni khah nikhua nungkhônah keiman kâiithoi inlang iti hih a nit,” a ti a.

⁴¹Khante, “Rivâna rithoka ibai zuang iṭum ki nit,” a ti sikin Judahei kha a chungah an riphun tâk a.

⁴²Khanchu, “Hi mi hih Josefa naipa Jisua khah ni mak im a? A nu neh a pa khom ei riat a. ‘Ingkan im rivâna rithoka zuang iṭum ki nit,’ ai ti thei hi?” an ti a.

⁴³Jisuan an ziangah, “Riphun kikêng khâi no rei.

⁴⁴Pa, ne tirtûn arkuai non chu tute ki ziangah hong thei no nih; keiman nikhua nungkhônah â honghei kha kâiithoi ki ti.

⁴⁵Zânthlahein, ‘Pathian înriseiin om khai an ti,’ iti an riziak a. Mi tin, Pa thu riaa, a zianga rithoka riseihei chu ki ziangah an hong ngai.

⁴⁶Pa mu tâk an om tina ni mak e; Pa ziang ata zuang bang hih Pa mutu om sun chu a nit.

⁴⁷Thudik tak nangni ke ril, â iamtu [15] khan kumtluang ringna a nei tâk.

⁴⁸Keimah hi ringna bai chu ki nit.

⁴⁹Nin chibulhein ramchârah Manna an fâk a; nikhomseh, an ithi ngir a nit.

⁵⁰Khanniseh, rivâna rithoka ibai zuang iṭum hi chu tukhomin a fâkin chu thi khâi no nih.

⁵¹Keimah hi rivâna rithoka ibai iring zuang iṭum chu ki nit. Hi bai hih tukhomin a fâkin chu kumkhuantluangkan ring mai a ti. Ibai ki pêk rang chu ki taksa hi a nit, rammual ringna ranga kî pêk chu,” a ti a.

⁵²Khanungchu, Judahei khah an khâtin an rikhal tâk a. “Ingkan im hi mi hin a taksa ifah rangin a ne pêk thei rang?” an ti a.

⁵³Jisuan an ziangah, “Thudik tak nangni ke ril, Miriam Naipa taksa hih nin fâk noa, a thisen khom nin in non chu nin khâtin ringna nei no tin u.

⁵⁴Tukhom ki taksa faa, ki thisen iinin chu kumtluang ringna a nei tâk, keiman nikhua nungkhônah ani khah kâiithoi ki ti.

⁵⁵Ki taksa hih bu diktak a nit a; ki thisen hih iin rua tak a nit.

⁵⁶Tukhom ki taksa faa, ki thisen iin chu keimaah a om mai a, kei khom amah-ah kî om mai a nit.

⁵⁷Pa, â ring khan a ne tir a, Pa sika khan kei khom kî ring a nit. Khangkah ngirin tukhom ne fa chu keima sikin ring an ti.

⁵⁸Amahih rivâna rithoka ibai zuang iṭum chu a nit; nin chibulhein an fâk a, an thi ngir nôkna angkah kha ni mak e. Hi bai ifah murdi chu kumkhuantluangkan ring mai an ti,” a ti a.

⁵⁹Jisuan Kapernaum inkhôm inah ân risei lâia hi thu hih â îsîr a nit.

⁶⁰A kôilômhei lâia itam takkan kha thu khah an riat a, “Hi inriseina hih thu khir tak a nit. Tûm a rethiam rang?” an ti a.

⁶¹Khanchu, kha thu-ah khan a kôilômhei an riphun iti Jisuan a lungrilin a riat a, an ziangah, “Kha thu khan nin ilung a înhoi ino mani?

⁶²Miriam Naipa hih masaa a omna ngaiah a kîr nôk mu ta unla ingkam nin tho rang?

⁶³Ringna petu chu Pathian Rithla a nit; miriam ritha chu îte â mangna omak e. Nin zianga thu ki îsîr hih Rithla neh ringna a nit.

⁶⁴Nikhomsela, ṭhenkan chu nin iiam ino a nit,” a ti a. Jisuan a tîr ata tuhei im â iam nuam ino rang neh tukhôk im amah ân man rang ai riat ṭian a nit.

⁶⁵Khante, amah ngirin an ziangah, “Hi sik takah hin a nit, ‘Pan fe theina a pêk non chu tute ki ziangah hong thei no nih,’ kî ti kha,” a ti a.

⁶⁶Khasikah khan Jisua nung izuituhei lâia itam takkan nungkîr an tho a, amah zui khâi mak a.

⁶⁷Khanchu, Jisuan kôilôm Sômleiinikahei ziangah khan, “Nangni khom iro nin nuam im?” itin ardon a.

⁶⁸Simon Peteran a sâm a, “Pumapa, tu ziangâm kin rot ranga? Kumtluang ringna thu nangman nî nei a nit.

⁶⁹Pathian Mi Rithiang [16] kha ni nit iti atûn chu kin iam a, ireh khom kin iriat tâk a nit,” a ti a.

⁷⁰Jisuan anni khah a sâm a, “Nangmani Sômleiinikahei hih keima nangni irthlang ni mak chei im a? Khan khoma nin lâia mi khatkah chu diabola a nit,” a ti a.

⁷¹Ani khan Simon Iskariota naipa Juda thurchi a îsîr a nit. Juda khah Kôilôm Sômleiinikahei lâia mi ni khom seh amah ân mantu rang a nit a.