Read Biete JOHANA 7 Bible Online

JOHANA 7 - Biete bible

JOHANA 7

¹Kha rizoiin chu Jisuan Galili ram arfang a; Judahein amah ithat an tum sikin Judai ram chu a irfang nuam khâi ino a nit.

²Khante, Judahei Dângdi Kût [17] khah a nâi tâk a.

³Khanchu, Jisua urênghei khan a ziangah, “Hi mun hih man la, Judai ramah fe roh, ni kôilômhein ni sintho an mu theina rangin.

⁴Tutên mahni riming inthang inuam chakkan inrûkkan thil tho ngai mak e. Hi sinhei hih nî sin a nitin teh rammualin nang reh riseh,” an ti a.

⁵A urênghei iluan amah iam mak a.

⁶Jisuan an ziangah, “Ki zoro la tlung mak, nangmani zoro chu tiklâi khomin ai tlung mai a nit.

⁷Rammualin nangni nel thei mak; khanniseh, keimah chu a ne inel a nit, a sinthohei ân sual iti ke ril ngai sikin.

⁸Kûtah khan nangmani lei hang fe rei. Kei chu la fe no [18] ning e, ki zoro a la tlung no sikin,” a ti a.

⁹Khangkah khan a ti a, Galili ramah a la om mai a.

¹⁰Khante, a urênghei Kût imang ranga an fe zoiin chu Jisua khom inrûkkan a fe sa tâk a.

¹¹Judahein Kût lâiah khan amah an zong a, “Taktiang im ai om?” itin mi an ridon vêl a.

¹²Mipuihei khan a chungchâng thu an isîr suai suai a. Ṭhenkan, “Miriam iṭha a nit,” an ti a; a ṭhenin, “Ni mak e, amah kêng mîn buai ngai,” an ti a.

¹³Khannisela, Juda thuneituhei an ṭi sikin tutên â langin chu a chungchâng thu isîr ngam mak a.

¹⁴Kût khah artenna dôr an mang tenan chu Jisua Tempilah a fe a, mihei ân risei tâk a.

¹⁵Judahei khan, “Hi mi hih riseina boi riakan ingkam hingka dôr dôr ai riat hi,” an ti a, an ringai arkhêl tak tak a.

¹⁶Jisuan anni khah a sâm a, “Ki thu inrisei hi keima inriseina ni mak a, Pathian ne tirtu ata suak a nit.

¹⁷Tukhom Pathian lungdo sin nuam kan chu ki thu inrisei hih Pathian zianga rithok im ai nit, keima iphuatot im ai nit iti riang an ti.

¹⁸Tukhom mahni iphuatot thu sîr chu mahni roinpuina ai zong a nit. Khanniseh, â tirtu roinpuina zongtu chu dikna a nei a, amah-ah diknona rêng rêng omak e.

¹⁹Mosian, Dân nangni ai pêk ni mak im a? Nikhomsela, nin lâiah tutên Dân khah zôm mak chei. Ithôm ne that nin itum hi?” a ti a.

²⁰Khante, mipuihei khan an sâm a, “Ramrili iman ni nit hite; tûm nang ithat itum?” an ti a.

²¹Jisuan anni khah a sâm a, “Sinrikhêl khatkah ki sin a, nin rêngkan nin ringai nin inrikhêl a.

²²Mosian nin naiipahei ser itan rangin thu nangni a pêk sikin (Mosia iphut ni mak a, nin chibulhei iphut kêng ai nit,) sabatnî khomin ser nin itan ngai a nit.

²³Mosia Dân ikhiak nona rangin sabatnî khomin ser nin tan ngai inteh, ithôm keiman sabatnin mi ken dam sikin ki chungah nin ilung ai hoi ino?

²⁴Putianga lang dân ringot ienin thu rêl no unla, a nitna dik tak ienin rêl rei,” a ti a.

²⁵Khante, Jerusalema mi ṭhenkahei khan, “Hi mi hih ithat an itum khah ni mak im a?

²⁶En ta u, vântlâng riatah thu â sîr a, tutên rikôk mak a. Ani hih Mesia chu a nit ngêt iti an iriat tâk manih o?

²⁷Khanniseh, Mesia chu a zuang tikah khan taktianga mîm ai nit tutên an iriat ino rang a nit a. Hi mi hih chu taktianga mîm ai nit ei rêngkan ei iriat a nit,” an ti a.

²⁸Khasikah khan Jisuan Tempilah ân risei lâiah khan iring takkan â khêk a, “Tûm kî nit neh taktianga mîm kî nit hih nin riat titak im a? Mahni richama zuang ni mang e. Ne tirtu chu mi diktak a nit. Nangmanin chu ani khah reh mak chei.

²⁹Keiman chu ki riat, a zianga zuang rithok neh ama ne itir ki nit sikin,” a ti a.

³⁰Khanchu, iman an tum tâk a; nikhomseh, a zoro a la tlung no sikin tutên tôn mak a.

³¹Mipui lâia mi itam takkan chu amah an iam tâk a, “Mesia a zuang tikah hi mi hin ai sin nêka tam sinrikhêl sin ual a tîm a?” an ti a.

³²Khante, Farisaihei khan Jisua chungchâng mipuiin an îsîr suai suai khah an riat a; khanchu, thiampu lalhei neh Farisaihei khan Jisua man rangin manmihei an tir tâk a.

³³Jisuan an ziangah, “Itôitekah nin lâiah la om ki ta; khanungchu, ne tirtu ziangah fêng ki ti.

³⁴Nangmanin ne zong nin ta, ne mu no tin u, ki omna rangah khan nin fe thei no rang sikin,” a ti a.

³⁵Judahei khah an khâtin an risôn a, “Ei mu thei nona rangah taktiang im ife ai tum hi? Grik khopuiheia Juda rithekindarhei ziangah ife a, Grikhei inrisei ai tum im ai nit rang?

³⁶‘Nangmanin ne zong nin ta, ne mu no tin u, ki fena rangah hong thei no tin u,’ ai ti hih îtina mani?” an ti a.

³⁷Khante, Kût ṭin rang nî, nikhua roinpui takah khan Jisua â ding a, rôl iring takkan â khêk a, “Tukhom a tuirihâl kangân chu ki ziangah hong sela,[19] in riseh.

³⁸Pathian Thubûn ai ti angkan, tutu ne iam chu a sunga rithokin tui iring dunghei luang suak a ti,” a ti a.

³⁹Jisuan kha thu khah ama iamhein Rithla an la dong rang thu â sîrna a nit. Kha zoroah khan Jisua khah roinpuinaa kâiithoi a la nit no sikin Rithla kha ipe a lai nit ino a nit.

⁴⁰Mipui lâia ṭhenkan kha thuhei khah an riatin chu, “Hi mi hih zânthla chu a nit ngêt hite,” an ti a.

⁴¹Ṭhenkan, “Mesia chu a nit,” an ti a. Khanniseh, ṭhenka nôkin chu, “Mesia chu Galili rama rithokin hong suak no nih.

⁴²Pathian Thubûn, ‘Mesia chu Rêng Davida richi nîng a ta, Davida omna khua Bethlehemah ai suak rang a nit,’ ai ti ni mak im a?” an ti a.

⁴³Khanchu, Jisua sikin mipui lâiah inṭhenna a hong om tâk a.

⁴⁴Mi ṭhenkan ani chu iman an tum a; khannisela, tutên a chungah kut iṭhum mak a.

⁴⁵Khante, manmihei khah an hong nôk a, thiampu lalhei neh Farisaihei khan an ziangah, “Ithôm nin hong ṭhui no?” itin an lei ridon a.

⁴⁶Manmihei khan an sâm a, “Hi mi thu sîr angkah hin tutên thu la sîr ngai mak e,” an ti a.

⁴⁷Khante, Farisaihei khan an ziangah, “Nangni khom ilêmin nin iom sa tâk mani?

⁴⁸Ulianhei neh Farisaihei lâia mi khatka lua khomin amah an iam tâk iti nin riat im a?

⁴⁹Hi mipui Mosia Dân ria nohei hih Pathian vânisâm nuaia om an nit,” an ti a.

⁵⁰Farisaihei lâia mi khatkah, Nikodema, Jisua zianga fe tâk khan mi danghei ziangah,

⁵¹“Ei Dân angkan chu mi tukhom a ṭongbâi suak ei riat man neh a sintho ei mu suak man chu thiamno inchang zel loi rang ni mak im a,” a ti a.

⁵²Anni khan a ziangah, “Nang khom Galili rama rithoka hong im nî nit? Pathian Thubu iṭha takkan tep inla, Galili rama rithokin zânthla suak ngai mak iti riang ni ti,” an ti pêk a.

⁵³Khante, mi tin mahni in chitah an fe tâk a.