Read Biete JOHANA 8 Bible Online

JOHANA 8 - Biete bible

JOHANA 8

²Atûk zîng takah khan Tempilah a lût a. Mihei rêng rêng a ziangah an hong a; khanchu, â ṭhung a, anmani ân risei tâk a.

³Dân inriseituhei neh Farisaihei khan nupangnu, ân rê lâi taka an iman an hong ṭhui a, mipui maah an inngîr a.

⁴Jisua ziangah, “Minriseitu, hi nupangnu hih ân rê lâi taka kin iman a nit.

⁵Kin Dân, Mosia thupêkin chu lunga dêng that rang a nit a, nangman teh im ni ti?” an ti a.

⁶Amakhah amah an dem theina ranga ama fiana an iti a nit. Khanniseh, Jisua khah â khûn a, a kutṭimin rinêng arziak a.

⁷Khante, iding puma ṭong an irdon angkan a hang tang a, an ziangah, “Nin lâia sual nei ino takin lungin dêng masa rei,” a ti a.

⁸Khanchu, â khûn nôk a, rinêngah [20] arziak nôk ngir a.

⁹Khante, kha ṭong khah an riatin chu khat khatkan a ulian indônin [21] an rot riai tâk a. Khanchu, Jisua kha a khâtin an mâk rak tâk a, nupangnu â dingna ngira ding ṭian neh khan bang an om tâk a.

¹⁰Khanchu, Jisua kha a hang tang a,[22] nupangnu ziangah khan, “Taktiang im an iom tâk? Tutên thiamno nang inchang mak na?” a ti a.

¹¹Nupangnu khan a sâm a, “Epu, tutên thiamno nen chang mak e,” a ti a. Jisuan a ziangah, “A ṭhat, kei khomin thiamno nang inchang mang e. Fen la, atûn ata chu isual nôk khâi no roh,” a ti a.][23]

¹²Jisuan Farisaihei ziangah thu â sîr nôk a, “Keimah rammual vâr ki nit. Tukhom ne zui chu ringna vâr nei an ta, izîngah lêng tlak no nih,” a ti a.

¹³Farisaihei khan a ziangah, “Mahni thurchi kêng ni îsîr, ni thurchi sîr hi idik mak e,” an ti a.

¹⁴Jisuan an ziangah, “Mahni thurchi ki îsîr ni khom sela ki îsîr hih â dik a nit. Keiman chu ki zuang rithokna neh ki fena rang khom ki riat a; nangmanin chu ki zuang rithokna neh ki fena rang reh mak chei.

¹⁵Nangmanin taksa dânin nin rêl ngai a, keiman chu tute thu rêl ngai mang e.

¹⁶Ki lei irêl khom ni sela, ki thu rêl chu idik a ti, keima khât banga rêl ki nit no sikin; Pa ne tirtu khah ki ziangah ai om a nit.

¹⁷Nin Dân lekhabuah khom riatpuitu inika ṭong chu â dik a nit iti riziak a nit kha.

¹⁸Keiman mahni thurchi ke sîr a, Pa ne tirtu khomin ki thu a ne iriatpui sa a nit,” a ti a.

¹⁹Anni khan a ziangah, “Takâm ni Pa chu?” an ti a. Jisuan a sâm a, “Nangmanin ne reh mak chei, ki Pa khom reh mak chei. Nin ne iriat ni sela chu ki Pa khom reh tâng nin ti,” a ti a.

²⁰Jisuan hi thu hih Tempila tholôm bôm an siana munah ân risei lâia ai ti a nit. Ama zoro a la tlung no sikin tutên ani khah an iman ino a nit.

²¹Khante, Jisuan an ziangah, “Kî fe rang tâk a nit, nangmanin ne zong nin ta; khanniseh, nin sualnaah khan thîng nin ti. Ki fena rangah fe thei no tin u,” a ti nôk a.

²²Juda ulianhei khan, “‘Ki fena rangah fe thei no tin u,’ ai ti hih ama khâtin rithat ai tum mani?” an ti a.

²³Jisuan a sâm a, “Nangni chu hi rammuala mi nin nit. Kei chu chungtianga rithoka zuang ki nit. Nangni chu hi rammuala rithoka hong isuak nin nit a, kei chu hi rammuala rithoka hong isuak ni mang e.

²⁴Khasikah khan a nit, ‘Nin sualnaah khan thîng nin ti,’ nangni kî ti a nit. ‘Ki nit’ kî ti hih nin iam non chu nin sualnaah nin ithi ngêt rang a nit,” a ti a.

²⁵Anni khan, “Tûm nî nit,” an ti a. Jisuan, “A tîra rithokin nangni ki îril tâk ni mak im a?

²⁶Nin chungchângah hin isîr rang neh demna rang itam takkah ki nei. Îkhom ni seh, ne tirtu chu mi dik tak a nit a, a zianga rithoka kî riat bang khah rammual ki îril ngai a nit,” a ti a.

²⁷Jisuan an ziangah Pa thurchi a îsîr a nit iti reh mak a.

²⁸Khasikin, an ziangah, “Miriam Naipa hih nin ikhâi tikah keimah ki nit iti neh keima richamin îte tho mang a; nikhomseh, Pan a ne îril kah ki îsîr a nit iti reh tâng nin ti.

²⁹Ne tirtu chu ki ziangah a om a, keima khât banga om rangin ne marak ngai mak; a lungdo ki sin mai ngai sikin,” a ti a.

³⁰Kha thu Jisuan a îsîr khah mi itam takkan an riat a, amah an iam tâk a.

³¹Khanchu, Jisuan ama iamtu Judahei ziangah khan, “Ki thu nin zômin chu ki kôilôm diktak nîng nin ti;

³²thutak riang nin ta, thutak khan nangni inzalen a ti,” a ti a.

³³Anni khan a ziangah, “Abrahama richi kin nit a, tute suakah la om ngai mang ung e. ‘Nangni inzalen a ti,’ ingkana ni tîm ai nit?” an ti a.

³⁴Jisuan an ziangah, “Thudik nangni ke ril, tukhom sual isin kangân chu sual bôi an nit.

³⁵Suak chu insungkuaah kop kumkhua ngai mak; naipa chu kumkhuan a om mai ngai.

³⁶Khasikin, Naipan nangni ân zalenin chu zalen tak tak tâng nin ti.

³⁷Abrahama richihei nin nit iti ki riat; nikhomsela, ki thu nin iham no sikin nangmanin ne that nin itum a nit.

³⁸Keiman Pa zianga kî mu khah ke sîr a, nangmanin chu nin pa nangni ril lamin nin isin ngai a nit,” a ti a.

³⁹Anni khan, “Kin Pa chu Abrahama a nit,” itin an sâm a. Jisuan an ziangah, “Abrahama nai diktak nin init ni sela chu Abrahama lei sin lam angkah takin nin isin rang a nit.

⁴⁰Ki sintho tâkhei rêng rêng chu Pathian zianga thutak kî riat nangni ril hi a nit; khanniseh, atûnah hin ne that nin itum a nit. Abrahaman chu hingka hin tho ngai mak e.

⁴¹Nangmanin chu nin pa lei itho ngai khah nin itho a nit,” a ti a. Anni khan, “Pathian bang hi kin Pa neisun a nit, keini hih a nai diktakhei kin nit” itin an sâm a.

⁴²Jisuan an ziangah, “Pathian nin Pa a nit titakin chu lung nin ne thlung rang a nit; Pathian zianga rithoka zuang ki nit sikin atûnah hin nin lâiah kî om a nit. Keima richama zuang ni mang a, ne tirtu richama zuang kêng kî nit.

⁴³Ithôm ki thu sîr hih nin riatthiam thei tlak no? Ki thu sîr nin ringaitua thei no sika a nit.

⁴⁴Nangni chu nin pa Diabola naihei nin nit a, nin pa lungdo sin nin inuam a nit. Ani khah a tîr ata mi that ngai a nit a, amaah khan thutak a omno sikin thudikah iding ngai mak. Milak a rilin amah-a suak khah a îsîr a nit, milakpa a nit sikin milakhei tinrêng pa khom a nit.

⁴⁵Khanniseh, keiman thutak ke sîr sikin nin ne iiam ino a nit.

⁴⁶Nin lâiah tûm sualna tianga thiamno nen chang thei nin om? Thutak ke sîr khomin ithôm nin iam thei no?

⁴⁷Pathian zianga rithoka zuangin chu Pathian thu â ham ngai a. Nikhomseh, nangni chu Pathian zianga rithoka nin nit no sikin ki thu khom nin îham ino a nit,” a ti a.

⁴⁸Khante, Judahei khan a ziangah, “Samari mi, ramrili iman ni nit kin iti khah kin itîn dik ni mak im a?” an ti a.

⁴⁹Jisuan an ziangah, “Ramrili iman ni mang e. Ki Pa ki chôiinrisâng a, nangmanin nin ne îsîrinsiat a nit hih.

⁵⁰Keima roinpuina rang izong ni mang; khannisela, â zongtu khatkah a om a, ani khah â rêltu chu a nit.

⁵¹Thutak nangni ke ril, tukhom ki thu zôm chu thina ritem tlak no nih,” a ti a.

⁵²Judahein a ziangah, “Atûn chu ramrili iman ni nit iti kin riat infel tâk. Abrahama a thi tâk a, zânthlahei khom an thi zoi tâk a, nangmah lakin chu, ‘Ki thu zôm chu thina ritem tlak no nih,’ ni ti a.

⁵³Kin chibul Abrahama nêkan nî roinpui ual mani? Ani khom a thi tâk, zânthlahei khom an thi zoi tâk; a tukhôkin im ni irbe hi?” an ti a.

⁵⁴Jisuan a sâm a, “Mahni chôiinrisâng ni ngân inlang chu kha chôiinrisângna khah îte ni no nih. Kin[24] Pathian nin iti, ki Pa khah ne chôiinrisângtu a nit.

⁵⁵Nangmanin chu ani khah reh mak chei, keiman chu kî riat a nit. ‘Ani khah reh mang e,’ ki tin chu nangmani angkan milak kî nit rang a nit. Nikhomsela, ani khah ki riat a, a thu khom kî zôm ngai a nit.

⁵⁶Nin chibul Abrahama khah ki zuang nikhua mu rang a nit sikah khan a râi a fân tak tak a; khaangkan, imu khom a mu ngêi a, ai lôm tak tak a nit,” a ti a.

⁵⁷Anni khan a ziangah, “Kum sôm ringa lua la kâi loi chen Abrahama nî mu na?”[25] an ti a.

⁵⁸Jisuan an ziangah, “Thudik nangni ki îril a nit, Abrahama inzir ma khomin ki om tâk,” a ti a.

⁵⁹Khanungchu, ama dêngna rang lung an rût a; nikhomsela, Jisua arbîk a, Tempil ata khah a suak tâk a.