Read Biete JOHANA 9 Bible Online

JOHANA 9 - Biete bible

JOHANA 9

¹Khante, Jisuan a fe malamin a suak ata a mitidel a mu a.

²Kôilômhei khan a ziangah, “Minriseitu, hi mi hih tu sual sika mitdela inzir mani? Ama sual sik im, a nu neh a pa sual sik im?” itin an ridon a.

³Jisuan an ziangah, “Hi a mitdelna hih ama sual sik ni mak, a nu neh a pa sual sika khom ni ual mak e; Pathian sintho a chunga â lang theina ranga a nit.

⁴Sûn a nit lâiah hin ne tirtu sin ei tho rang a nit; zân â zîng rang tâk a nit, kha tikin chu tutên sin tho thei khâi no nih.

⁵Rammuala ki om sungah hin rammual vâr ki nit,” a ti a.

⁶Amakhah a ti zoiin chu rinêngah â chil a, â chilin ibuan a siam a, a mitah â nôt pêk a,

⁷a ziangah, “Fen la, Siloam dîlah ni mâi va phi roh,” a ti a. Siloam chu, “Itir, Tirsuak,” tina a nit. Khanchu, kha mi khah a fe a, a mâi a va phi a, mit ivârin a hong kîr nôk tâk a.

⁸Khante, a bungtualbômhei neh matona a kutdo lâi lei imu tâk ngaihei khan, “Hi mi hih kutdoa ṭhung mai ngai khah ni mak im a?” an ti a.

⁹Mi ṭhenkan, “Hi mi hih a nit,” an ti a. Mi ṭhenkah nôkin chu, “Hi mi hih ni mak e, ar-angpui kêng ai nit,” an ti a. Khanchu, ani khan, “Kha mi khah ki nit,” a ti a.

¹⁰Khante, anni khan a ziangah, “Ingkan im ni mit a hong ivâr tâk?” itin an ridon a.

¹¹Ani khan, “Mi khatkah, Jisua an iti khan ibuan a siam a, ki mit â nôt a, ‘Siloam dîlah fen la, ni mâi va phi roh,’ a ne ti a. Khanchu, ki fe a, ki mâi ki phi a, ki hong imu thei zel tâk a nit,” itin a sâm a.

¹²Anni khan, “Kha mi khah taktiang im ai om?” an ti a. Ani khan, “Reh mang e,” itin a sâm a.

¹³Khanungchu, masaa a mit idelpu khah Farisaihei ziangah an ṭhui tâk a.

¹⁴Jisuan ibuan a siam a, ân dam nî khah sabatnî a nit a.

¹⁵Farisaihei khan a mit a hong vâr tâk tlia khah an lei ridon nôk a. Ani khan, “Ki mitah ibuan a sia a, ki mâi ki phi a, ki mit a hong ivâr zel a nit,” a ti a.

¹⁶Farisaihei lâia mi ṭhenkan chu, “Hi mi hih sabatnî a ser no sikin Pathian zianga rithoka zuang ni thei no nih,” an ti a. Ṭhenkah nôkin chu, “Mi sualin ingkan im hingkana sinrikhêl hih a sin thei rang?” an ti a. Khanungchu, an lâiah inṭhenna a hong om tâk a.

¹⁷Khanchu, Farisaihei khan kha mi khah voikah an ridon nôk a, a ziangah, “Ni mit nang ân vâr pêk a, ani khah ingkana mi inin im ner ngai,” an ti a. Ani khan an ziangah, “Zânthla a nit,” itin a sâm a.

¹⁸Khanniseh, Juda ulianhei khan chu kha a mit hong ivâr tâkpu nu neh pa khah an koi mâkah chu, kha mi khah mitdela inzir a nit a, atûn chu a hong imu thei tâk a nit iti iam thei mak a.

¹⁹Khanchu, Juda ulianhei khan, “Hi mi hih nin naipa, a suak ata mitdel nin iti khah ai nit mani? Ingkan im atûnah hin a mit a hong ivâr nôk tâk?” itin an ridon a.

²⁰A nu neh a pa khan an sâm a, “Hi mi hih kin naipa a nit iti neh, a suak ata mitdel a nit iti kin riat;

²¹khanniseh, ingkan im a mit a hong ivâr chu reh mang ung, a mit invârpêktu khom reh mang ung e, amah ridon rei. Mi puitling a nit tâk a, ama thurchi chu aman isîr riseh,” an ti a.

²²A nu neh a pa khan Juda ulianhei an ṭi sikin khangkan an isâm a nit. Judahei khan, “Jisua kha Mesia a nit,” itia pom kangân chu inkhôm in ata ûmisua rang itia an lei îthlûk thlâm tâk a nit a.

²³Kha sik takah khan a nit, a nu neh a pa khan, “Puitling a nit tâk a, amah ridon rei,” an iti a nit.

²⁴Khante, mitdel lei inih ngaiah khah a voi niknan an koi nôk a, a ziangah, “Pathian makungah thudik iril rangin inkungna nei roh. Nang indamtu khah mi sual a nit iti kin riat,” an ti a.

²⁵Ani khan a sâm a, “Mi sual a nit neh nitno îte reh mang e. Kî riat chu mitdel ki nit a, atûn chu ki mu thei tâk,” a ti a.

²⁶Anni khan a ziangah, “Im nang ai tho pêk? Ingkan im ni mit a învâr?” an ti a.

²⁷Khante, ani khan, “Nangni ke ril tâk khate, nin iriat nuam ino a nit. Ithôm â ria nin inuam nôk tâk? Nangni khom ama kôilôm ichang nin inuam mani?” itin a sâm a.

²⁸Khanchu, anni khan an ngo tâk a, “Nangmah ama kôilôm ni nit a, keini chu Mosia kôilôm kêng kin init.

²⁹Mosia ziangah Pathian a lei ṭong iti kin riat. Khanniseh, hi mi hih chu taka rithok manih khom reh mang ung e,” an ti a.

³⁰Kha mi khan an ziangah, “Khah tak khah arkhêlna chu a nit. Nangmanin chu arthokna khom reh mak chei a; khanniseh, keimah chu ki mit a ne învâr pêk a nit.

³¹Pathianin mi sual ṭong ringai ngai mak e iti ei riat; nikhomseh, ama ngîk a, a lungdo sintuhei ṭong chu arngai ngai.

³²Rammual insiang ata mitdel isaia suak mit invâr pêk tutên la reh ngai mak e.

³³Hi mi hih Pathian zianga rithoka zuang ni no sela chu hingkana sin hih tho thei no nih,” a ti a.

³⁴Anni khan a ziangah, “Nangmah suala inzir neh seilian hin nen risei nî tum mani?” an ti a. Khanchu, inkhôm in ata an ûmisua tâk a.

³⁵Jisuan kha mi khah an ûmisua iti a riatin chu a zong suak a, a ziangah, “Miriam Naipa [26] hih ni iam im?” a ti a.

³⁶Ani khan, “Epu, ani khah tûm ai nit, amah ki iam theina rangin ne ril roh,” a ti a.

³⁷Jisuan a ziangah, “Ani khah ni mu tâk a, atûna nang risônpuitu hih amah chu a nit,” a ti a.

³⁸Ani khan, “Pumapa, ki iam,” a ti a. Jisua ke bulah rikhûk idilin chubai a ûn tâk a.

³⁹Jisuan a ziangah, “Hi rammualah hin roi irêl ranga zuang ki nit, mitdelhei mit vârna rang neh mit ivârhei mit a delna rangin,” a ti a.

⁴⁰Khante, Farisai ṭhenkah a kôla omhei khan kha ṭong khah an riat a, a ziangah, “Keini khom hih mitdel kin init sa mani?” an ti a.

⁴¹Jisuan an ziangah, “Mitdel nin init ni sela chu sual nei no tin u; khanniseh, ‘Kin mu thei,’ nin ti sikin nin sual kha ai om mai a nit,” a ti a.