Read Biete TIRTÔNHEI SINTHO 1 Bible Online

TIRTÔNHEI SINTHO 1 - Biete bible

TIRTÔNHEI SINTHO 1

¹Theofil, ki lekha masaah khan Jisua sinthohei neh ân riseina thuhei murdi khah sin itho a phut lâia rithoka,

²rivân tianga iṭhuia a om nî tena thu khah ker ziak tâk a. Rivân tiang iṭhuia a om maah khan a tirtôn rithlanghei khah Rithla Rithiang imangin thucha a pêk a.

³A thi nungin a ring nôk iti riatinfel nan voi itam takkah an ziangah arlang a; sûn sômilika sung an ziangah ân lâr a, Pathian Ram thurchi â sîr ngai a.

⁴Khante, an ziangah a om lâiin,[1] “Jerusalem khua mah no rei, Pathian ṭonginkung kha lei ngâk rei.

⁵Johana khan tuiin a baptis ngai a; khannisela, sûn itôiteka nungah chu Rithla Rithiangin baptisma chang nin ti,” itin â ril a.

⁶Khante, tirtônhei khan an ribûmnaah Jisua ziangah, “Pumapa, atûn im Israelhei ram ni pêk nôk rang?” itin an ridon a.

⁷Jisuan an ziangah, “A zoro neh a nikhua chu Pan ama richam chama om ranga a inrifûk a nit, nangni lei riat rang ni mak e.

⁸Nikhomsela, Rithla Rithiang khah nin chungah a zuang tlung tikah chu sinthotheina la nei nin ti; khanchu, Jerusalem heiah, Judai neh Samari ram pumpui heiah, kôlkomong idênin ki thu retuhei nîng nin ti,” a ti a.

⁹Kha thu khah â sîr zoiin chu an mu chung chakah rivân tiang iṭhuiin a om a; sûmin an mu phâkna no-ah a ṭhui inrimang tâk a.

¹⁰Khangkana rîvân tiang iṭhuia a om an thlîr mai lâiah khan mi inikah puan iṭekvata rithluk an kôlah an zuang ngîr a.

¹¹Khahei khan, “Galili mihei o, îtho ranga rivân tiang iena nin îding mai im? Hi Jisua, nin zianga rithoka rivân tiang iṭhuia om hih, rivânah a hang fe nin imu angkah takah hin a lai zuang nôk ngêt rang a nit,” an ti a.

¹²Khanchu, tirtônhei khah Oliv tlânga rithokin Jerusalemah an kîr nôk tâk a; kha tlâng khah Jerusalema rithoka sabatnî-a fe phâk vêl [2] a nit.

¹³Khopui an lûtin chu an omna ngai chontan inchungah khan an fe a; khahei khah Petera, Johana, Jakoba, Andria, Filipa, Thoma, Bartholomaia, Mathaia, Alfaia naipa Jakoba, Simon Zelota neh Jakoba naipa Juda hei an nit.

¹⁴An rêngkah khan nupanghei[3] neh Jisua nu Mari neh Jisua urênghei neh, lunginrual takkan ṭongṭai rangin an ribûm ngai a.

¹⁵Sûnkah chu iamtuhei [4] an ribûm a, an rêngkan rizalei sôminikah vêl an nit; khahei lâiah khan Petera â ding a,

¹⁶“Suapuihei, Rithla Rithiangin Jisua mantuhei ruaitu Juda thu Davida bâia a lei îsîr, Lekha Thu khah a hong itlung rang pial a nit.

¹⁷Ani khah ei lôma mi a nit a, hi ei sinthonaah hin khom rangtum inei ranga rithlang a nit.

¹⁸“Khante, Juda khan a sin sual thalo ai mu sumah khan mun khatkah archôk a, kha munah khan a tlâk a, a thi a; â ril isuak vang kan a phûng a puak chit a.

¹⁹Kha thu khah Jerusalema om murdîn an riat a; khasikin, kha mun khah anmani ṭongin, ‘Akeldama,’ an ti a, amakhah ‘Thisen Mun,’ itina a nit.

²⁰“Lapui Bu-ah hingka hin riziak a nit: “‘A omna in chu inramin om sela, A sungah tute om no riseh,’ iti neh, ‘A ruaitu nitna chu mi dangin dong riseh,’ iti hi.

²¹“Khaangkan, mi khatkah ei Pumapa Jisua thoinôkna ne repuitu rangin ei rithlang suak rang a nit. Kha mi khah, ei Pumapa Jisua Krista neh munka ei lêng lâia ei lâia ṭang sa ngai, baptistu Johana zoroa rithoka Jisua rivânah iṭhuia a om nî dêna ei lôm lâia om mi a nit rang a nit,” a ti a.

²³Khanchu, mi inikah Josefa, Barsaba an iti ngai (Justa khom an ti sa ngai) neh Mathia an zen a.

²⁴Khanungchu, an ṭongṭai a, “Pumapa, nangmah miriam murdi lungril iretu, Judan ama muna om ranga a tirtôn nitna neh a sin ai mâk tâk mun ithûl rangin hi mi inikahei lâiah hin a tukhôk im ni irthlang nen reh roh,” an ti a.

²⁶Khanungchu, thla an sân a, an ithla sân khah Mathia chungah a ṭum tâk a. Khaangkan, Mathia khah tirtôn Sômleikhatkahei[5] lâiah khan itep sa a nit tâk a.