Read Biete TIRTÔNHEI SINTHO 10 Bible Online

TIRTÔNHEI SINTHO 10 - Biete bible

TIRTÔNHEI SINTHO 10

¹Khante, Kaisari khuaah mi khatkah arming Kornelia a om a; “Itali Sipai Pôl” an itia sipai rizaka ruitu a nit.

²Ani khah Pathian ireh mi a nit a, a insungmi murdi neh Pathian iṭi mi an nit. Judahei lâia inrianghei zianga riphal takka thilpêk ipeh ngai mi a nit a, Pathian ziangah a ṭongṭai mai ngai a.

³Sûnkah chu chonung fasukrup vêlah hin inlârna a mu a. Pathian vântirtôn a ziangah a zuang a, “Korneli,” a zuang ti a.

⁴Kornelia khan vântirtôn khah a en ngit a, a ṭi a. Vântirtôn khan a ziangah, “Ni ṭongṭaina neh ni lungkham sinhei khah Pathianin a lôm a, nang ai sâm rang a nit.

⁵Atûn Joppa khuaah mi tir inlan, mi khatkah arming Simon Petera an iti khah hang inkoi roh.

⁶Tuipui rikamah, savun isiam ngaitu Simona ina tlung a nit,” a ti a.

⁷Khanchu, vântirtôn khah a fe kaneh, Kornelia khan â somhei mi inikah neh sipai khatkah, Pathian ireh mi, a tirtôna ai mang bîk ngaihei lâia mi khah a koi a.

⁸Thil ai mu neh ai riathei tinrêng â ril zoiin chu Joppa khuaah a tir tâk a.

⁹Khante, atûk sûnlâiah kha mihein Joppa khua an tlung rangin chu, Petera khah ṭongṭai rangin inchungah a hang lui a.

¹⁰A von a ṭâm tak tak a, fâk izong a nuam a; nikhomsela, ifarua an inrifûk lâiah khan inlârna a mu tâk a.

¹¹Rivân ri-ong a mu a, thilfûn, puanhâk ilianpa ang, â kil ilika thlung hi rinênga zuang ritûl a mu a.

¹²Kha thilfûn sungah khan sakeli chi tinhei, bokrivâk ngai chi tinhei neh iva chi tinhei a om a.

¹³Rôl khan a ziangah, “Peter, thoi roh; that inla, fah roh,” a zuk ti a.

¹⁴Khannisela, Peteran, “Pumapa, ni mak e, thil rithiang ino neh â bor îte fah ngai mang e,” a ti a.

¹⁵Rôl khan, “Pathianin a înrithiang tâk khah nangman rithiang inon be no roh,” a zuk ti nôk a.

¹⁶Khangkah khan, voi thumkah a zuang om a; khanungchu, thilfûn khah rivân tiang ilan a om nôk tâk a.

¹⁷Khante, Peteran inlârna ai mu omzia reh loia a om lâiah khan, Kornelia mi tirhei khah Simona in an ridon infel a, inkot bulah an ngîr ṭian tâk a.

¹⁸Anni khan, “Amahin Simon Petera a tlung im,” itin an ridon a.

¹⁹Peteran inlârna ai mu omzia khah a la ngaitua mai lâiin, Rithla khan a ziangah, “Ringai ta, mi ithumkan[13] nang an zong.

²⁰Khasikin, risiam inla, ṭum roh. Lungrilak viat loiin anmani zui roh; anni chu ki hong itir an nit,” a ti a.

²¹Khanchu, Petera khah a ṭum a, kha mihei ziangah khan, “Nin izong khah keimah hi ki nit. Im nin hongna bi ai nit?” a ti a.

²²Anni khan, “Pathian iṭi mi, Juda nam murdîn an imarit, sipai rizaka ruitu mi ṭhatak Kornelia khah Pathian vântirtônin â sôn a, nangma thu sîr a riatna rangin a inah nang ifial rangin a ti pêk a, keini hih a ne hong itir a nit,” an ti a.

²³Khanchu, kha mihei khah a koi inlût a, ân riak tâk a. Atûkah chu Petera khah arsiam a, ama koi ihonghei khah a zui tâk a, Joppa khuaa iamtu ṭhenkahei khomin Petera khah an zui sa a.

²⁴Atûk nôkah khan Kaisari khua kha an tlung tâk a. Kornelia khan a suapuihei neh a rual ṭhahei a lei koibûm a, Petera hei khah an lei ngâk ṭian a.

²⁵Khante, Peteran in a lût rangto takin chu Kornelia khan a lei don a, a ke bulah â bok a, chubai a ûn a.

²⁶Petera khan ani khah a kâi ithoi a, “Iding roh, kei khom miriam ngir kêng kî nit,” a ti a.

²⁷An ruaika risôn mai pumin an lût a, mi tam takka ribûmhei khah Peteran a va mu a.

²⁸An ziangah, “Judahei rangin nam dang Juda mi nino ipan neh anmani ripôlpui rang Juda sakhuan a phal nozia nangmani rengin nin riat. Nikhomsela, tute rithiang ino neh inim ki ti rang ni mak iti Pathianin ifel takkan a ne înmu a nit.

²⁹Kha sikah khan nin ne hong inkoiah khan sêl viat loiin kî hong zel a nit. Khate, im nin ne hong inkoina bi ai nit?” a ti a.

³⁰Kornelia khan a ziangah, “Vuansûn hih a sûn linî a nit tâk, atûn angkah zoro chonung fasukrup vêlah hin ki inah[14] ki ṭongṭai a; khanchu, mi khatkah puan ri-ela rivon ki makungah a zuang iding a,

³¹‘Korneli, Pathianin ni ṭongṭaina a riat a, ni lungkham sinhei khom khah a riat mai.

³²Khasikin, Joppa khuaah mi tir inla, Simon Petera hang inkoi roh. Ani khah tuipui rikamah, savun isiam ngaitu Simona ina tlung a nit,’ a ti a.

³³Khasikin, ni ziangah mi ki hong itir zel a nit; nî hong thei hih a ṭhat tak tak. Atûnah hin Pumapan thu isîr ranga nang ai pêk murdi ringai rangin Pathian maah [15] kin rêngkah hin kin hong irbûm a nit hi,” a ti a.

³⁴Petera khan thu â sîr a: “Pathianin mi tinrêng ri-ang natkan a en iti ki riatinfel tâk.

³⁵Nam tin lâiah tukhom ama ṭi a, thil idik takka tho murdi chu â ham inrup mi an nit.

³⁶Israel naihei ziangah Pathian khan thu a zuang ithlun a, ringeina Thurchi Ṭha khah Jisua Krista mangin a zuang inpuang a, kha Jisua khah mi tinhei Pumapa a nit.

³⁷Johanan baptisma thu thang ân thei zoi a, Galili rama riphut a, Judai ram pumpuia thil zuang itlung thu khah nangni khomin nin riat a.

³⁸Nazaret Jisua khah Pathianin Rithla Rithiang neh sinthotheinan ân rithluk a, Pathian khah a ziangah a om mai a, sin iṭha sinin mun tinah inzin vêlin diabola dengintheina nuaia om murdi ân dam thiai a.

³⁹Judai ram neh Jerusalema a sintho murdihei iretu kin nit; khanungchu, ani khah krosa hêmden an that tâk a.

⁴⁰Nikhomsela, Pathianin ani khah a sûn thumnin a kâiithoi nôk a, amah imu thei rangin ân lâr a.

⁴¹Khannisela, mi murdi ziangah chu inlâr mak a; Pathianin riatpuitu ranga a lei irthlang keimani bang hin kin imu a nit; thina ata a thoinôk nunga a zianga faa inhei ziangah hin.

⁴²Kha Thurchi Ṭha thang inthei rang neh, ani chu â ring neh â thi chunga roirêltu ranga Pathian înkung kha a nit iti mihei inreh rangin thu a ne ipêk a nit.

⁴³Zânthlahei khomin ama iam murdi chu arming sikin a sualhei izan om a ti iti an lei iril ngai a nit,” a ti a.

⁴⁴Peteran kha thu khah a la sîr mai lâiin, a thusîr ringaitu murdihei chungah khan Rithla Rithiang a zuang ṭum tâk a.

⁴⁵Judahei lâia iamtu, Joppa rithoka Petera hong izuihei khan Rithla Rithiang thilpêk khah Jentailhei chungah khom ivur ai nit khah arkhêl an ti tak tak a.

⁴⁶Ṭongriatloiheia thu an îsîr neh Pathian an înpâk khah an riat a.

⁴⁷Khante, Peteran, “Hi mihei hin eimani angkah ngirin Rithla Rithiang an idong a nit. Tui imanga baptisma an ichang tûm â khap thei ranga?” a ti a.

⁴⁸Khanchu, Jisua Krista riminga baptisma chang rang thu a pêk a. Kha rizoiah khan ani khah sûn itôitekah chu la châm rangin an ngên a.