Read Biete TIRTÔNHEI SINTHO 11 Bible Online

TIRTÔNHEI SINTHO 11 - Biete bible

TIRTÔNHEI SINTHO 11

¹Judai ram pumpuia tirtônhei neh iamtuhei khan Jentailhei khomin Pathian thu an ôi sa tâk iti an riat tâk a.

²Petera khah Jerusalem a tlung nôkin chu, “Sertan a nang,” itituhein an lei sêl a,

³“Sertan ino Jentailhei inah ni tlung a, an ziangah ifah khom ni fâk ngai,” an ti a.

⁴Khanchu, Peteran a bula rithokin a rêngkan thil hong itlunghei khah â sîr pêk a.

⁵“Joppa khuaah ki om a, ki ṭongṭai lâiin inlârna ki mu a. Thilfûn puanhâk ilian tak angkan, â kil ilika thlung a, rivâna rithoka ki kôla zuang ritûl ki mu a.

⁶Amakhah ki en ngit a, sakeli chi tinhei, bokrivâk ngai chi tinhei neh iva chi tinhei ki mu a.

⁷Khanungchu, rôlin ki ziangah, ‘Peter, thoi inla, that inla, fah roh,’ a ne ti a.

⁸Nikhomsela, keiman, ‘PUMAPA, ni mak e. Arthiang ino neh â nim îte ki bâiah lût ngai mak,’ ki ti a.

⁹Rivâna rithoka rôl khan, ‘Pathianin a înrithiang tâk khah nangman rithiang mak ti no roh,’ a ne ti nôk a.

¹⁰Khangkah khan, voi thumkah a zuang om a; khanchu, thilfûn khah rivân tiang ilan a om nôk tâk a.

¹¹Kha lâi takah khan mi ithumkah, Kaisaria rithoka ki zianga an hong itirhei khah ki omna in an lei hong tlung pial tâk a.

¹²“Rithla khan lungrilakna boia anmani zui rangin a ne ril a. Hi iamtu irukkahei khom hin an ne zui sa a, kin rêngkan Kornelia inah kin lût a.

¹³Khanchu, ani khan a inah vântirtôn iding a mu tlia neh vântirtôn khan a zianga, ‘Joppa khuaah mi tir inla, mi khatkah arming Simon Petera an iti khah hang inkoi roh;

¹⁴ani khan thu nang isîr pêk a ta, a thu sîr sikah khan nangmah neh ni insung mihei murdi saninringin om nin ti,’ a ti tlia thuhei a ne lei iril a.

¹⁵Thusîr ki hang phut a, Rithla Rithiang kha, a tîra ei chungah a zuang itlung angkah khan Rithla Rithiang an chungah a zuang tlung tâk a.

¹⁶Khante, Pumapan, ‘Johanan tuiin a baptis ngai a, khan, nangni chu Rithla Rithiangin baptisma la chang nin ti,’ ai ti khah ki riat suak nôk tâk a.

¹⁷Khangkah khan, eimani Pumapa Jisua Krista iamtuhei a ne ipêk angkana thilpêk ngir khah Jentailhei khom ai pêk a nit iti a fel a. Khasikin, keimah hih tûm ki nit, Pathian idan thei rang hi,” a ti a.

¹⁸Kha thu khah an riatin chu an dâirek tâk a, “Khangkan a nitin chu Pathianin Jentailhei khom rilet a, iring rangin lampui a iong pêk tâk a nit khate,” itin Pathian an inpâk tâk a.

¹⁹Khante, Stefana an that zoroa nuamlona sika rithekindarhei khah Foiniki ram hei, Kupra tuihual hei neh Antiokei khua dên hein an indar a, Judahei ziang bangah khan thu an isîr a.

²⁰Nikhomsela, an lâia ṭhenkah kha Kupra tuihual mi neh Kurini kho mihei an nit a. Kha mihei khan Antiokei an tlungin chu Jentailhei [16] ziangah khom thu an isîr a. Pumapa Jisua Thurchi Ṭha an iril tâk a.

²¹Pumapa ritha khan anni chu a ṭangpui a, mi itam takkan an iam a, Pumapa tiang an ngat tâk a.

²²Kha thurchi khah Jerusalema koindanghein an lei riat a, anni khan Barnaba khah Antiokeiah an tir tâk a.

²³Ani khah a zu tlungin chu kha mihei Pathianin ṭhat a vur tlia khah a mu a, a lôm tak tak a. Iamom takka Pathian itûn det mai rangin an rêngkan â thor a.

²⁴Barnaba khah mi ṭha tak, Rithla Rithiang neh iamnaa sip a nit. Khanchu, mi itam takkah Pumapa tiang iṭhui an nit tâk a.

²⁵Khante, Barnaba kha Saula zong rangin Tarsas khuaah a fe nôk tâk a.

²⁶A va mun chu Antiokeiah a hong ṭhui a, kumkah sar koindanghei inkhômnaah an ṭang sa a, mi itam takkah an inrisei ngai a. Antiokei khuaah hin a nit, iamtuhei khah Kristian an iti masa tak a nit.

²⁷Kha zoroah khan Jerusalema rithokin zânthla ṭhenkah Antiokeiah an hong a.[17]

²⁸An lâia mi khatkah, arming Agaba kha â ding a, Rithla Rithiang înriatin rammual pumpuiah ṭâmpui a tlâk rang thu ân puang a. Kha ṭâmpui khah Klaudia inlal lâiin ai tlâk a nit.

²⁹Kôilômhei khan an thei lam chit itho a, Judai rama iamtu omhei ṭangpuina thon an tum a.

³⁰An tum lam angkah takin an tho a, upahei zianga peh rangin Barnaba neh Saula kutah an thon tâk a.