Read Biete TIRTÔNHEI SINTHO 12 Bible Online

TIRTÔNHEI SINTHO 12 - Biete bible

TIRTÔNHEI SINTHO 12

¹Khante, kha zoroah khan, rêng Herodan koindanga mi ṭhenkahei a nuam ilo a phut tâk a.

²Jakoba, Johana inzirpuipa khah khandaiin a sât that a.

³Amakhan Judahei ân lôm iti a riatin Petera khom khah iman a tum nôk tâk a. (Kha zoro khah Bairiam Kût zoro a nit.)

⁴Petera khah a man a, tâng inah a khum a, sipai lôm ilikah, mi ilikah chita rithlâkin ân ngâk a. Kalkan Kût ṭuma mipui makunga isuaa, irêl ai tum a nit.

⁵Khasikin, Petera khah tâng inah a khum ngit a; nikhomsela, ama ta rangin koindanghei khan ṭhatnemringai takkan Pathian ziangah an ṭongṭai pêk a.

⁶Herodan ṭhui isua a, irêl rang a tum nî zânah khan Petera khah â bân kiangruaika rênbun ibunin sipai inika kârah a zâl a. A danghei khan inkot bula dingin an ngâk ṭian a.

⁷Khante, tukvakkan Pumapa vântirtôn khatkah a zuang iding a, tâng in sung khah a vâr pum tâk a. Vântirtôn khan Petera dârah â soi inhar a, “Irang takkan thoi roh,” a ti a. Khanchu, voikan rênbunhei khom khah Petera bân ata a ṭul tâk a.

⁸Vântirtôn khan a ziangah, “Ni kongkhit inrichel inla, ni pheilôn ribun roh,” a ti a. Peteran khangkah khan a tho a. Khanchu, vântirtôn khan a ziangah, “Ni chungzakua ihâk inla, ne zui roh,” a ti nôk a.

⁹Petera khan a zui suak tâk a; khanniseh, vântirtôn sintho khah a tak a nit iti reh mak a, inlârna ai mu manih ai sôn a nit.

¹⁰Khante, a ngâktu â khatna neh â nikna khah an khêl a, khopui tianga suakna rang thîr dâikot khah an va tlung a. Dâikot khah a khâtin a lei ri-ong a, an suak a, lamilian khatkatah an lôn lâiin tukvakkan vântirtôn khan Petera khah a mâk tâk a.

¹¹Khanchu, Petera khah a har vang tâk a, “Pumapan a vântirtôn a zuk tir a. Heroda kut ata neh Judahei phiarrûkna murdia rithokin a ne înzôk a nit iti atûnah hin ki riat infel tâk,” a ti a.

¹²Thil omzia a riat infel zoiin chu Johan Marka nu Mari inah a fe a; amakhan mi itam takkah an ribûm a, an lei ṭongṭai a.

¹³Petera khan thapuk inkhâr â kik a, nungâk khatkah, Rodi khah inkhâr iong rangin a va fe a.

¹⁴Petera rôl a riatin chu a lôm tak tak a, inkhâr iong loiin â tlân kîr nôk a, “Petera, inkot bulah son â ding,” itin a va ril a.

¹⁵Nikhomsela, anni khan a ziangah, “Ni învêt tâk a nit hi,” an ti a. Ani khan, “A dik titak kêng?” a ti ngit a. Khanchu, anni khan, “Ama vêngtu Vântirtôn nîng a ti,” itin an sâm a.

¹⁶Nikhomsela, Peteran inkhâr khah â kik mai a. Nungah chu an va ong a, ani khah an mu a, arkhêl an ti tak tak a.

¹⁷Khanchu, ani khan an dâirekna rangin a kut a zâp a; Pumapan tâng ina rithoka a kêlisua tlia khah â ril tâk a. Khante, “Hi thu hih Jakoba neh iamtu danghei va ril rei,” a ti a. Khanungchu, a suak a, mun dangah a fe tâk a.

¹⁸Zîng a hong nitin chu vêngtu sipaihei khah, “Petera im ai pan tâk?” itin an buai tak tak tâk a.

¹⁹Heroda khomin ân zong a; khanniseh, mu mak a. Â ngâktuhei khah a sualsân a, anni khah ithat rangin thu a pêk tâk a. Khante, kha rizoiin chu Heroda khah Judai ram a mâk a, Kaisari khuaah khan a châm mai tâk a.

²⁰Khante, Heroda khah Tura neh Sidon mihei chungah a ning a thik ok a. Anni khan inrual takkan ama sôn rangin an hong a, rêng milian Blasta khah an palâkin an siam a. Khanungchu, Heroda ziangah an fe a, an ram khan Heroda rama rithoka fâknêk ai mu ngai a nit sikin ringeina siampui rangin an ngên a.

²¹Khante, a nikhua inkungah khan Heroda khah ilal puan isilin rêngṭhungmunah â ṭhung a, mipuihei ziangah thu â sîr a.

²²“Miriam rôl ni mak e, pathian rôl kêng ai nit,” itin mipuihei khah an ikhêk a.

²³Ani khan Pathian ziangah roinpuina a pêk no sikin Pumapa vântirtônin voikarengin kut a tlâk a, rûlkûtin a fâk a, a thi tâk a.

²⁴Kha lâiah khan Pathian thu kha ân dar mai a, iamtu khom an pung mai a.

²⁵Barnaba neh Saulan an sinthona an zoiin chu Jerusalema rithokin [18] an kîr nôk tâk a, Johan Marka khah an ziangah an ṭhui sa a.