Read Biete TIRTÔNHEI SINTHO 13 Bible Online

TIRTÔNHEI SINTHO 13 - Biete bible

TIRTÔNHEI SINTHO 13

¹Khante, Antiokeia koindang mihei lâiah khan zânthlahei neh minriseituhei an om a; khahei khah: Barnaba hei, Simeona (Hângah an iti) hei, Lukia (Kurini mi) hei, Manaena [19] (Rêng Heroda urêng angkana ai en) hei, neh Saula hei an nit.

²Bu ngeia Pumapa chubai an ûn lâiin Rithla Rithiangin an ziangah, “Barnaba neh Saula hih anmani ken kungna bi tak isin rangin nen ran pêk rei,” a ti a.

³Khaangkan, bu an ngei a, an ṭongṭai a, an chungah kut an ringat a, an infe tâk a.

⁴Khangkan, Rithla Rithiang itir suakin an fe a, Selukai khua an tlung a, khantaka rithokin Kupra tuihualah rikuangin an fe a.

⁵Khante, Salamis khua an tlungin chu Judahei inkhôm inheiah Pathian thu an isîr a. Johan Marka khom anmani ṭangpui rangin an ṭhui sa a.

⁶Khante, tuihual khah a rêngkan, Pafos khua dênin an rifang suak a. Dôithiam, zânthla riti, Juda khatkah arming Bar-Jisua an tong a.

⁷Kha mi khah Ram-optu vâr tak Sergia Paula zianga om a nit. Kha Ram-optu khan Pathian thu ringai a nuam sikin Barnaba neh Saula khah a ziangah a koi a.

⁸Nikhomsela, dôipu Eluma (amakhah Grik ṭonga arming a nit) khan Ram-optu khah iamna thu inzôm ino a tum a, anni khah a lei sêl a.

⁹Khanchu, Saula, Paula khom an iti ngai khah Rithla Rithiangin a sip a, dôipu khah a en ngit a, a ziangah,

¹⁰“Nangmah Diabola naipa, ṭhatna tinrêng irâlpa, milak tinrêngin ni sip a, zorotin Pathian thutak hih thuno inchang nî tum ngai a nit.

¹¹Ringai roh, atûn Pumapa kut ni chungah ai ṭum rang a nit; ni mit del a ta, sûn khovâr mu tom no tin e,” a ti a. Khanchu, sûm neh izîngin amah â bô zel tâk a, a ruai rang mi zongin arvâk diai tâk a.

¹²Khante, Ram-optu khan kha thil itlung khah a mun chu a iam tâk a; PUMAPA thu an înrisei khah arkhêl a ti tak tak a.

¹³Khante, Paula neh a champuihei khah Pafos khuaa rithokin rikuangin an fe a, Pamfulia rama Perga khua an tlung a; amakhan Johan Marka khan anni khah a mâk a, Jerusalemah a kîr nôk tâk a.

¹⁴Pergaa rithokin Pisidia rama Antiokei khuaah an fe a; khante, sabatnin chu inkhôm inah an lût a, an iṭhung a.

¹⁵Khante, Dân lekhabu neh zânthla lekhabu tep zoiin chu inkhôm in ulianhei khan an ziangah mi an tir a, “Suapuihei, rithorna thu nin inei a omin chu mipuihei zianga sîr rangin nangni kin inuam a nit,” an va ti a.

¹⁶Khanchu, Paula khah â ding a, a kutin a zâp a, thusîr a phut tâk a: “Ki Israel champuihei neh Jentail Pathian iṭituhei, ringai rei,

¹⁷Hi Israelhei Pathian hin ei chibulhei khah a lei rithlang a, an khualmi changna Aigupta ramah an om sungin nam roinpui takin a siam a, kha rama rithokah khan a sinthotheina roinpui tak imangin a ṭhui isua a.

¹⁸Kum sômilika sung ramchârah lungidiar takkan a ṭhui a.[20]

¹⁹Khante, Kanan rama nam sarikah ân rimang nungah khan an ram khah a mihei ân lua tâk a.

²⁰Khahei murdi khah kum rizalikah sômringaka sung ai lût a nit. “Kha nungah khan roirêltuhei a pêk ngai a, zânthla Samuela dênah khan.

²¹Kha nungah khan Rêng an nî a, Pathianin Benjamina richia mi, Kisa naipa Saula khah kum sômilika sunga an rêng rangin a pêk a.

²²Ani khah a heng nungah khan Pathianin Davida khah rêngin a siam tâk a. Pathianin hingkan â sîr a, ‘Ke lung ido tak, Jesaia naipa Davida ki mu tâk, ani khan ki lungdo murdi sin a ti,’ a ti a.

²³Pathianin a lei înkung angkah takin, kha mi richihei lâia rithokah khan Israel mihei Saninringtu Jisua a zuang pêk tâk a.

²⁴Jisuan sin a phut maah khan Johanan, an sualhei rileta baptisma chang rang an nit thu Israel mi murdi a sîr pêk ngai a.

²⁵Khante, Johana khan a sintum a len zoi rang lâiah khan mipuihei ziangah, ‘Nangmanin tûm nin ne isôn? Ani khah keimah hih ni mang e. Nikhomsela, ringai ta u, ke nungah zuang a ti, kei chu a pheikok ikhek pêk rang iluan ritluk mang e,’ a ti a.

²⁶“Ki chipui, Abrahama richihei neh nangmani Jentail, Pathian iṭituhei, kha saninringna thu khah ei rêngka ziangah a zuang itlung tâk a nit.

²⁷Jerusalema omhei neh an ruaituhei khan Saninringtu a nit an riat no sik neh sabatnî tina an itep ngai zânthlahei ṭong khah a omzia an riat no sikin Jisua khah thiamno an inchang a, zânthlahei ṭong khah an îthlun inrikip tâk a nit.

²⁸Thina rang inrup a chungah îte an mu no khomin ithat rangin Pilata an ngên a.

²⁹A chungthu Pathian Thubûn a irziak murdi an len zoiin chu kros ata an iṭhum a, ithlânah an inzâl tâk a.

³⁰Nikhomsela, Pathianin ani khah thina rithokin a kâiithoi nôk tâk a.

³¹Galili rama rithoka Jerusalema amah neh munka hang ife sahei ziangah khan sûn itamka sung ân lar ngai a; kha mihei khah atûnah hin Israel mihei zianga ama riatpuituhei an nit.

³²Ei chibulhei zianga Pathianin ṭong a lei înkung khah eimani an richihei ta rangin atûnah hin Jisua kâiithoiin ai len tâk nit iti Thurchi Ṭha nangni inreh rangin kin izuang a nit. Lapui â niknaah: “‘Nang chu ki Naipa ni nit; Vuanah hin nang kî nei tâk a nit,’ iti riziak angkah khan.

³³

³⁴Khante, a ruak khom ramna mun ithlânah mon loia thina rithokin a kâiithoi rang thu hingkan â sîr: ‘Davida zianga ki ṭonginkung rithiang, Inkhêl inoh rang ṭhatvurna khah nang pêng ki ti,’ iti angkah khan.

³⁵Khasikin, mun dangah khom, ‘Ni mi rithiang chu ithlâna ram rangin phal no tin,’ a ti sa a.

³⁶Davida khan a dam sungin Pathian lungdoa sin a tho zoiin chu a in tâk a, a chibulhei kôlah an phûm a, a takpum khah ithlânah ai ram tâk a nit.

³⁷Pathianin thina rithoka ai kâiithoitu kha chu ram mak e.

³⁸Khante, ki Israel chipuihei, amahih nin riat rangin kin nuam, Jisua sika sual izâna thu nin ziangah isîrin ai om a nit. Mosia dâna thiam nin chang thei nona murdiah khan,

³⁹Jisua iamtu murdi chu thiam inchang an nit tâk.

⁴⁰Khasikin, ridîn rei, khanonchu, zânthlahei lekhabua riziak khah nin chungah a tlung duai lôiin:

⁴¹‘Musittuhei, en ta u, arkhêl ti unla, rimang rei; Nin dam sungin vuansûna ki sin tho hih, Mîn nangni rilfia pêk khom seh iam tlak no tin u,’ iti khah,” a ti a.

⁴²Khante, Paula neh Barnaba khah inkhôm in ata an suakin chu sabatnî nôkah kha thu khah hong isîr nôk rangin mipuihei khan an fial a.

⁴³Inkhôm an ṭîn riai nungah khan, Judahei itam takkah neh Juda saphunhei itam takkan Paula neh Barnaba khah an zui a; anni khan an lei isôn a, Pathian lungkhamnaa om mai rangin an lei ithor a.

⁴⁴Sabatnî nôkah chu a kho pumpui iti dôrin Pathian thu ringai rangin an hong ribûm a.

⁴⁵Judahei khan mipuihei an mun chu an inar tak tak a; Paula thu sîr khah an sêlikal a, natinsat takkan an isîr inpôi a.

⁴⁶Nikhomsela, Paula neh Barnaba khan ihâi takkan an isîr a, “Pathian thu hih nin ziangah isîr masa rang pial a nit; khannisela, nin nôl a, kumtluang ringna dong inrupin nin ribe khâi no nungin chu, nangmani nangni man Jentailhei tiang ngat tâng kin ti.

⁴⁷Khangkana tho rangin Pumapan thu a ne ipêk a nit: ‘Jentailhei vâr inih rangin nang ken kung, Rammuala mi murdi saninringna rangin’ iti riziak angkah khan,” an ti a.

⁴⁸Jentailhei khan kha thu khah an riatin chu an lôm a, Pumapa chu an chôiinrisâng tâk a; kumtluang ringna dong ranga rithlanghei murdi khan chu an iam tâk a.

⁴⁹Pumapa thu khah kha ramhual mun tinah ân dar tâk a.

⁵⁰Khannisela, Judahei khan khosunga ulianhei neh Pathian isôn ngai mi Jentail nupang marit iomhei khah an ithor a; Paula neh Barnaba khah an nuam an lo a, an ram ata an ûmisua tâk a.

⁵¹Tirtônhei khan anni chunga an ilung hoino inlangnan an kephaa vâivut khah an ithing iṭhul a, Ikoniom khua an pan tâk a.

⁵²Antiokeia iamtuhei chu Rithla Rithiangin an sip a, an lôm tak tak a.