Read Biete TIRTÔNHEI SINTHO 14 Bible Online

TIRTÔNHEI SINTHO 14 - Biete bible

TIRTÔNHEI SINTHO 14

¹Khangkah ngirah khan Ikoniomah khom, Paula neh Barnaba khah Judahei inkhôm inah an lût a, thu an isîr a. Juda neh Jentail itam takkan an iam tâk a.

²Khannisela, a iam nuam ino Judahei khan Jentailhei an ithor a, iamtuhei khah an inmumâk tâk a.

³Tirtônhei khan ihâi takka Pumapa thu sîrin kha khuaah khan isôt takkah an châm a. A lungkhamna thu tirtônhein an îsîr khah namindetna rangin Pumapan anmani mangin sinrikhêl neh thilrikhêl itam takkah a sin a.

⁴Khosunga mipuihei khah lôm inikan an inṭhen tâk a, ṭhenkan Judahei an thlop a, ṭhenkan tirtônhei an thlop a.

⁵Khanungchu, Jentailhei neh Judahei neh an ruaituhei khan, denginthei bit a, lunga dêng that an tum tâk a.

⁶Tirtônhein kha thu khah an riatin chu Lukaoni rama Lustra khuaah neh Derbe khuaah neh a kôl vêla ramheiah an rot tâk a.

⁷Khahei khomah khan Thurchi Ṭha an isîr mai a.

⁸Khante, Lustra khuaah khan kebâi khatkah, a suaka rithoka lôn thei tlak ino, â ṭhung ṭian hi a om a.

⁹Kha mi khan Paula thu sîr khah arngai a. Paulan a en ngit a, damna rangin iamna a nei iti a mun chu,

¹⁰rôl iring takkan, “Ni ken iding roh,” a ti a. Ani khah artôp a, a lôn zel tâk a.

¹¹Mipuihein Paula sintho khah an mun chu Lukaoni ṭongin an ikhêk a, “Pathianhei khah miriam angkan ei ziangah an zuang iṭum tâk a nit hi,” an ti a.

¹²Barnaba khah Zeusa an ti a, Paula khah thu sîr ual ngai a nit sikin Harmesa[21] an ti a.

¹³Khante, an pathian Zeusa Tempil khah kho putiang a om a, khantaka thiampu khan serâtchalhei neh pârruihei kho dâikotah a hong chôi a; mipuihei neh khan tirtônhei zianga ribôlna lan an tum tâk a.

¹⁴Kha itho rang an înlung khah Barnaba neh Paulan an riatin chu, an puan an ipotthlêr a, mipui lâiah khan an itlân a, an ikhêk a,

¹⁵“Hi thil hih îrang im nin itho? Keini khom nangmani angkana miriam ngir kêng kin init. Hi thil chanlamboi hih ima a, rinêng neh rivân, tuikhanglian neh a sunga om murdi siamtu Pathian Iring tiang nin ngat theina rangin Jisua Thurchi Ṭha nangni kin îthlun kêng ai nit.

¹⁶Pathian khan tianah chu mi tin mahni lampui chit iro a phal ngai a.

¹⁷Khannisela, amah chu a om ngêt a nit iti thil iṭha thon ân lang mai ngai a: rivân ata rua nangni ân sûr pêk a, a zoro takkan nin chimuhei nangni ân râ pêk a, ifah rang nangni a pêk a, nin lungrilah lômna nangni ai pêk ngai a nit,” an ti a.

¹⁸Kha thu khah isîrin mipuihei kha an zianga ribôlna lan loi rangin an khap thei ṭôk tâk a.

¹⁹Nikhomsela, Pisidia rama Antiokei neh Ikonioma rithokin Judahei ṭhenkah an hong a, mipuihei khah an tiang an ithlêm inê a; Paula khah lungin an dêng a, â thi tâk isônin khua ata an kâi suak a.

²⁰Khannisela, iamtuhei khah a kôlah an hong iding lâiin ani khah a thoi a, khuaah khan a lût nôk tâk a. Atûkah chu Barnaba neh Derbeah an fe tâk a.

²¹Derbeah khan Thurchi Ṭha an isîr a, mi itam takkah kôilômin an siam nungin Lustraah an kîr nôk a, Ikoniomah hei, Pisidia rama Antiokeiah hei an inzin thiai mai a.

²²“Intak itam takka tuangin Pathian ramah ei ilût rang a nit,” iti inriseiin iamtuhei khah an indet a, iamnaah khan iom mai rangin an ithor a.

²³Koindang tinah upahei an phun thiai a, bu ngeiin an ṭongṭai a, an iiam Pumapa kutah an inkol mai a.

²⁴Pisidia ram khah an rifang zoiin chu Pamfulia ram an hong tlung a.

²⁵Pergaah thu an isîr a; khanungchu, Attalia khuah an fe a,

²⁶khantaka rithokin chu rikuangin Antiokeiah an fe nôk tâk a. Hi khua hih an lei isin tâk isin ranga iamtuhein Pathian lungkhamnaa ibânga, an inzin phutna mun khah a nit.

²⁷Antiokei an tlungin chu koindanghei an koi bûm a, Pathianin anmani manga sin ai thohei murdi neh Jentailhei ta ranga iamna lampui â ong pêkziahei khah an iril a.

²⁸Iamtuhei ziangah khan isôt takkah an châm tâk a.