Read Biete TIRTÔNHEI SINTHO 15 Bible Online

TIRTÔNHEI SINTHO 15 - Biete bible

TIRTÔNHEI SINTHO 15

¹Mi ṭhenkah Judai rama rithokin Antiokeiah an zuang a, “Mosia Dân angkan ser nin tan non chu saninring ni thei no tin u,” itin iamtuhei an inrisei a.

²Paula neh Barnaba khan kha thu-ah khan anni khah an rikhalpui ok a; an rikal khap sikin Paula neh Barnaba neh an lâia mi ṭhenkah, kha thubuai chungchângah khan Jerusalema tirtônhei neh upahei hang rimupui rangin an ithlûk tâk a.

³Khanchu, koindang mihei khan an ithla a, anni khan Jentailhein Pathian tianga an rilet thu khah isîr thiaiin Foiniki ram neh Samari ram an rifang suak a, kha thu khan iamtuhei ân lôm tak tak a.

⁴Jerusalem an tlungin chu koindang mihei, tirtônhei neh upahei khan an lei lôm a; Pathianin anmani manga sin ai thohei murdi khah an iril a.

⁵Khannisela, Farisai pôla mi, iamtu ṭhenkah an iding a, “Jentailhei khah ser an tan ngêt rang a nit a, Mosia Dân khom izôm ngêt rangin iti pêk rang a nit,” an ti a.

⁶Kha thu ngaitua rangah khan tirtônhei neh upahei khah an ribûm tâk a.

⁷Isôt takkah an isîrinrituk nungin Petera a ding a, an ziangah, “Suapuihei, Jentailhein Pathian thu an riat a, an iam theina ranga Thurchi Ṭha isîrpêk rangin nin lâia rithokin tian ata Pathianin a ner thlangzia khah nin riat a.

⁸Mi tin ngaituana retu Pathian khan eimani a ne ipêk angkah ngirin an ziangah Rithla Rithiang ipen, Jentailhei khom a îham a nit iti ân lang a.

⁹Eimani neh anmani ithlei mak a, an iam sikin an sualhei â zâ tâk a.

¹⁰Kha sikah khan, ei chibulhei neh eini ipêl zoi khâi ino puak khah atûnah hin iamtuhei chungah ikhop pêk itumin îtho rang im Pathian nin irnak hi?

¹¹Anmani angkah ngirin eini khom Pumapa Jisua lungkhamna sika saninring inih rangin ei iiam a nit,” a ti a.

¹²Barnaba neh Paula khan anmani manga Jentailhei lâia sinrikhêl neh thilrikhêlhei Pathianin ai sin thu an isîr kârkah chu mipuihei khah an dâirek a.

¹³An isîr zoiin chu Jakoba khomin â sîr sa a, “Suapuihei, ki ṭong ringai ta u,

¹⁴Simona khan Pathianin Jentailhei rivoia ama riming ripuh ranga anni lâia mi a lâk suak phut thu â sîr tâk a.

¹⁵Kha thu neh zânthlahei thu hih a irtok thap a nit:

¹⁶“‘Kha rizoiah khan kîr nôk ki ta, Davida rêngram inding nôk ki ti. A siatna munhei siam inṭha nôk ki ta, Inding thar nôk ki ti.

¹⁷Khanchu, mi danghei khomin Pumapa zong an ta, Jentail ker ming riputhei murdi neh.

¹⁸Khuansiang ata hi thu inreh ngaitu, Pumapa khan a ti,’ ai ti angkah khan.

¹⁹“Khasikin, amahih ki ngaidân chu a nit: Jentailhei lâia Pathian tianga hong rilethei hi chu inbuai nông eila.

²⁰Kha nêkan chu mirmil biakna thil rithiangino ata rikiang rang hei, ridisia bâng a, sa thitôt neh sa thisen fah loi rangin lekha thonin ti pêk eila, kî ti a nit.

²¹Mosia Dân chu tian ata kho tinah an inpuang a, inkhôm inheiah sabatnî fengin an tep ngai,” a ti a.

²²Khanchu, tirtônhei, upahei neh koindang mi murdi khan, an lâia mi rithlang suak a, Paula neh Barnaba lôma Antiokeia tir zel a ṭhatin an riat a. Juda, Barsaba an iti neh Sila an rithlang a, anni khah suapuihei lâia ruaitu ualhei an nit.

²³Hingka hin lekhathon an riziak a, an inchôi a: “Keimani, tirtônhei neh upahei neh nin suapuihei hin, Jentail iamtu Antiokeia omhei, Suria rama omhei, neh Kilikia rama omhei kha chibai nangni kin bûk.

²⁴Kin lâia mi ṭhenkah nin zianga hongin thu zuang isîrin nangni an inbuai a, lungzîng nangni an sak iti kin riat a; khanniseh, anni khah thu peh mang ung e.

²⁵Khasikin, kin ribûm a, lunginrual takkan mi rithlanga nin zianga zuang itir rangin kin îthlûk a nit. Ei rual lungthlung tak Barnaba neh Paula,

²⁶ei Pumapa Jisua Krista sinthonaa an ringna phalhei lômah hin zuang sela kin iti a nit.

²⁷Khaangkan, Juda neh Sila kin zuk itir a nit; anni khomin hi thu kin irziak hih mêl rimu ngêiin nangni sîr pêk an ti.

²⁸Rithla Rithiang neh keimanin hi thu poimo takhei ban hih chu puakrik dang siam iloi rangin ṭha kin iti a nit:

²⁹Mirmil biakna thil fah no rei; sa thisen neh sa thitôt fah no rei; ridisia ata rikiang rei. Hi thilhei hih tho tlak loi rangin nin ridîn theiin chu nin ta rangin ṭha ok a ti.[22] Chibai,” itin an riziak a.

³⁰Khanchu, an mi tirhei khah an infe tâk a, Antiokei an tlung a, mipui an koi bûm a, lekhathon khah an pêk a.

³¹An tep zoiin chu kha ithorna thu sikah khan lômnan an sip tâk a.

³²Juda neh Sila chu zânthla khom an nit sa a, iamtuhei khah thu itam takkan an ithor a, an indet a.

³³Khante, sûn isôt zankah an châm zoiin chu a zuang itirtuhei zianga thlangam takka kîr nôk rangin iamtuhei khan an infe tâk a.

³⁴Sila chu iom mai rang a tum tâk a.

³⁵Paula neh Barnaba kha chu Antiokeiah khan mi dang itam takkahei neh an la châm mai a, Pumapa thu an isîr a, an inrisei ngai a.

³⁶Zoro sôt ianka nungah chu Paula khan Barnaba ziangah, “Tho, fe nôk ei ta, kho tina Pumapa thu ei isîrna murdia ei suapui iomhei khah pan ei ta, ingkan im an om tâk lei mu rei,” a ti a.

³⁷Barnaba khan Johan Marka khah an zianga ṭhui rang a nuam a.

³⁸Khanniseh, Paula khan chu, Pamfulia ram tenan a kîrpêk a, an sinthonaah a fepui sa mai khâi no sikah khan ani khah iṭhui nôk chi a nitin reh mak a.

³⁹Khanchu, an ringo tâk sikin anni khom khah an inṭhen tâk a. Barnaba khan Johan Marka khah a ṭhui a, Kupra tuihual tiang rikuangin an fe tâk a.

⁴⁰Paula khan chu Sila arthlang a, iamtuhein Pumapa lungkhamna kutah an inkol zoiin chu an inzin suak tâk a.

⁴¹Suria ram neh Kilikia ram khah an rifang suak a, koindang mihei khah an indet thiai mai a.