Read Biete TIRTÔNHEI SINTHO 16 Bible Online

TIRTÔNHEI SINTHO 16 - Biete bible

TIRTÔNHEI SINTHO 16

¹Paulan Derbe neh Lustra khom â thlo sa a, amakhan iamtu khatkah arming Timothea a om a. A nu khah iamtu ngir Juda a nit a, a pa kha chu Grik mi a nit.

²Lustra neh Ikonioma iamtuhei murdi khan Timothea khah an ringai inlut a.

³Paulan ani khah iṭhui rang a nuam a, kha vêla Judahei khan Timothea pa khah Grik mi a nit iti an riat riai sikin â ser a tan pêk a.

⁴Kho tin an rifang malamin Jerusalema tirtônhei neh upahei thu rêl khah an pêk thiai mai a, izôm rang khomin he an be thiai a.

⁵Khanchu, koindang mihei khah iamnaah an rât ual ual a, nîn tin an pung tîr tîr tâk a.

⁶Asia rama thu sîr Rithla Rithiangin a khap sikin Frugia neh Galatia ram an rifang a.

⁷Musia ramrî an tlung a, Bithunia rama fe an tum a; kha khom khah, Jisua Rithla khan phal mak a.

⁸Khanchu, Musia ram ikhêlin Troasah an fe tâk a.

⁹Khante, Paulan zânah inlârna a mu a, Makedonia rama mi khatkan idingin, “Makedonia ramah hong kâi inla, ne hong san roh,” itia ngênin a mu a.

¹⁰Paulan kha inlârna khah a mu zoiin chu Makedonia rama fe rangin kin risiam zel tâk a, kha rama mihei zianga Thurchi Ṭha sîr rangin Pathianin a ne ikoi a nitin kin riat tâk a.

¹¹Khanchu, Troasa rithokin rikuangin kin suak a, Samothraki khua kin tlung a, atûkah Neapolis khua kin tlung nôk a.

¹²Khan taka rithokin Filipi khuaah kin fe a, kha khua khah Makedonia ram huala khua poimo tak, Rom.mihei khua a nit. Kha khuaah khan sûn itam takkah kin châm a.

¹³Sabatnin chu khopui putianga vadung rikamah Judahei ṭongṭaina ngai mun inih ranga kin iiamah khan kin fe a; amakhan kin iṭhung a, nupang hong ribûmhei ziangah thu kin isîr a.

¹⁴Khahei lâiah khan Thuatira khuaa mi nupang khatkah arming Ludi, Pathian iṭi mi, puan senduk izuar ngai khan kin thu sîr a lei ringai sa a. Paula thusîrhei izôm rangin Pumapan a lungril a ong pêk a.

¹⁵Amah neh a inmihein baptisma an chang zoiin chu, “Pumapa iam titakin nin ne ben chu ki inah hong tlung rei,” itin a ne fial ngit a, a ne tûk tâk a.

¹⁶Khante, nikhuakah chu ṭongṭaina munah kin fe lâiin suak nungâk khatkah ramrili iman, thlasân ithiam hin a ne tong a. Ani khah ithlasân a thiam sikin a puhei rang sum itam takkah a lo pêk ngai a.

¹⁷Kha nupang khan Paula neh keimani a ne zui a, “Hi mihei hih Pathian Inchungtak suakhei an nit a, saninringna lampui nangni an hong îril a nit hi,” itin â khêk â khêk a.

¹⁸Khangkah khan, sûn itam takkah a tho tenan chu Paula lung hoi khâi mak a, arhêl a, ramrili ziangah khan, “Jisua Krista rimingin thu nang ki pêk; a sunga rithokin suak roh,” a ti a. Kha mitrikhapah khan a hong suak zel tâk a.

¹⁹Khante, a puhei khan an sum nâr a chat tâk iti an riatin chu Paula neh Sila khah an man a, vântlâng ribûm khômnaah khan an kâi inlût a.

²⁰Khanchu, roirêltuhei ziangah an ṭhui a, “Hi mihei hih Juda an nit a, kin khosungah buaina an siam ngai.

²¹Keimani Rom.khua neh tuihein kin zôm rang neh kin mang ranga rithiang ino dân dang an isîr ngai,” an ti a.

²²Mipuihei khom khah Paula neh Sila tôn rangin an rifo tâk a. Khanungchu, roirêltuhei khan Paula neh Sila puan an sân pêk a, irola toh rangin thu an pêk a.

²³An itôk bit nungin tâng inah an khum a, a ngâktu ziangah khan iṭha takka khum khap rangin thu an pêk a.

²⁴Khangkah taka thu khir an pêk sikah khan anni chu tâng in sungril takah a khum a, an keah thing kolbun ân bun a.

²⁵Zânlâi vêlah chu Paula neh Sila khah Pathian ziangah an ṭongṭai a, la an sak a, mi tâng danghein an ringai a.

²⁶Khanchu, tukvakkan ninupui a hong inîng a; tâng in lungphûmhei ten khom â nîng vang a, voikarengin inkhâr murdihei a hong ri-ong riai a, mi tin rênbunhei khah arsût riai tâk a.

²⁷Khanchu, tâng in ingâktu khah a hong har a, inkhârhei ri-ong riaikan a mu a, mi tânghei an irot zoi tâk a sôn a; khanchu, a khandai a thuat a, rithat a tum a.

²⁸Khannisela, Paulan rôl iring takkan, “Ite rilo no roh, kin rêngkan kin la om riai,” a ti a.

²⁹Khante, ani khan meiser a zong a, â tlân lût a, iṭi neh inthing pumin Paula neh Sila ke bulah â bok rak a.

³⁰Khanungchu, anni khah a ṭhui isua a, “Epuhei, saninringa ki om theina rangin im ki tho rang?” a ti a.

³¹Anni khan, “Pumapa Jisua iam inla; khanchu, saninringin om ni ti, nangmah neh ni insungmihei,” an ti a.

³²Khanungchu, amah neh a insunga om murdihei khah Pumapa thu an isîr pêk tâk a.

³³Kha zân, kha zoro le leah khan Paula neh Sila khah a ṭhui a, an itôkna sâbehei khah arsûk pêk a; khante, amah neh a insungmihei khah baptisma an chang zel tâk a.

³⁴Paula neh Sila kha a inah a ṭhui a, ifah rang a pêk a. Pathian an iam tâk sikin an insung pumkan an lôm tak tak tâk a.

³⁵Atûk zîngah chu roirêltuhei khan, “Kha mihei khah isua ta roh,” iti thupêk inchôiin manmi ulianhei an tir a.

³⁶Khanchu, tâng in ingâktu khan Paula ziangah, “Roirêltuhein nangni sua rang takin thu an hong thon, hong suak unla, thlangam takkan fe ta rei,” a ti a.

³⁷Nikhomsela, Paula khan manmi ulianhei ziangah, “Rom.khua neh tui kin nit a, thônsualna neia thiamno chang khom ni mang ung a; khanniseh, vântlâng mitmuah an ne tôk a, tâng inah an ne khum a. Atûn inrûkkan ne sua nôk rang an iti na? Ni thei tlak no nih. Anmani ngêi hong sela ne hong ṭhui suak riseh,” a ti a.

³⁸Manmi ulianhei khan kha ṭong khah roirêltuhei ziangah an isîr a; Rom.mi an nit iti an riatin chu an ṭi tâk a.

³⁹Khanchu, an fe a, an var phat a; an ṭhui suak a, an khuaa rithoka suak rangin an ngên a.

⁴⁰Paula neh Sila kha tâng in ata an suak a, Ludi inah an fe a. Amakhan iamtuhei khah an mu a, thlangam an sak zoiin chu an mâk tâk a.