Read Biete TIRTÔNHEI SINTHO 18 Bible Online

TIRTÔNHEI SINTHO 18 - Biete bible

TIRTÔNHEI SINTHO 18

¹Kha rizoiah khan Paula khah Atheni a mâk a, Korinth khuaah a fe tâk a.

²Amakhan Juda mi khatkah arming Akuila a mu a, ani khah Ponto rama suak a nit. Rom.rêng Klaudian Juda murdi Rom.khua ata a ûmisua vang sikin Akuila khah a nupui Priskili neh Itali rama rithoka hong rithon phing an nit. Paula khan an ziangah a lêng a,

³khahei khom khah ama angkana puan in isiam ngai an nit sikin an ziangah a om a, munkan sin an tho a tâk a.

⁴Sabatnî tin inkhôm inah thu ân ritukpui ngai a, Judahei neh Grikhei khah inrethiam itumin zâl a song ngai a.

⁵Sila neh Timothea kha Makedonia rama rithokin an zuang tlung tenan chu Paula khah thusîr ringotin a zoro a mang tâk a; Jisua chu Mesia a nit iti Judahei ziangah a rilfia ngai a.

⁶Khannisela, Judahein an doi a, an isîrinsiat a; khanungchu, Paulan a puana vâivut â thing a, an ziangah, “Nin thi khomin nangmanin a mo pêl rei, kei chu kî hûl a nit. Atûna rithokin chu Jentailhei tiang ngat tâng ki ti,” a ti a.

⁷Khanchu, khantak ata a suak a, Jentail mi khatkah arming Tita Justa inah a lût a, kha mi khah Pathian ngaisak mi tak a nit a; a in khom inkhôm in neh artôn ṭian a nit.

⁸Inkhôm in ruaitu Krispa neh a insung mihei murdi khan Pumapa an iam a. Korinth khuaa mi tam takka khomin thu an riat a, an iam a, baptisma an chang tâk a.

⁹Zânkah chu Paulan inlârna a mu a, Pumapa khan a ziangah, “Ṭi no roh, ringam loiin thu isîr mai roh.

¹⁰Keimah ni ziangah ki om mai sikin nang innah rangin tutên ni chungah kut tlâk no nih; hi khuaah hin mi itam takkah kî nei a nit,” a ti a.

¹¹Khanchu, Paula khah kha khuaah khan Pathian thu inriseiin kumkah neh kum rilangkah a om tâk a.

¹²Khante, Galioa khah Akaia rama Ram-optu a chang lâiin Judahei an inruala Paula an man a, roirêlnaah an ṭhui a.

¹³“Hi mi hin kin dân ni noa Pathian chubai iûn rangin mi a îthlêm ngai a nit,” an ti a.

¹⁴Paula khan isâm a tum a; nikhomseh, Galioa khan Judahei ziangah, “Judahei, ama thil hih pualoina thu manih, thonsual itho thu manih ni sela chu nin thu nangni kî ngaitua pêk rang a nit.

¹⁵Khannisela, thuhei, riminghei neh nin dân chungchânga rikhalna thu kêng a nit a, nangmanin rêl rei. Keiman chu khangkana thilhei kha chu rêl no ning e,” a ti a.

¹⁶Roirêlna muna rithokin â sua riai tâk a.

¹⁷Khanchu, an rêngkan an inkhôm in ruaitu Sosthena khah an man a, roirêlna mun kottualah khan an itôk a. Kha khom khah Galioa khan iten ringai viat mak a.

¹⁸Kha nungah khan Paula khah sûn itam takkah a la châm a; kha rizoiin chu iamtuhei â thla a, Suria ram tiang rikuangin a fe tâk a, a ziangah Priskili neh Akuila khom an fe sa a. Paulan ṭonginkung a lei nei sikin Kenkriai khuaah chu an rithok nôk man a sam a la ep a.

¹⁹Khanchu, Efesi khua an tlung a, amakhan Priskili neh Akuila kha a mâk a; ani chu inkhôm inah a lût a, Judahei khah Pathian thu ân ritukpui a.

²⁰Anni khan la châm ual rangin an ngên a; khanniseh, iham mak a.

²¹“Fe khom inlang Pathian lungdo a nitin chu nin ziangah la hong nôk ki ti,”[24] itin ṭong ihoiin â thla a. Khanchu, Efesi ata khah rikuangin a fe tâk a.

²²Kaisari a tlung a, Jerusalemah a fe tâk a, koindang chibai a bûk a; kha rizoiin chu Antiokeiah a fe tâk a.

²³Amakhan sûn itam takkah a châm nungin a fe nôk a, Galatia ram neh Frugia ram arfang suak a, iamtuhei murdi kha ân det thiai a.

²⁴Kha lâiah khan Juda khatkah, arming Apolova, Alekzandria khuaa suak kha Efesi khuaah a zuang a. Ani khah thusîr ithiam tak a nit a, Pathian thu ria tak a nit.

²⁵Ani khah Pumapa lampui thu lei inrisei tâk a nit a, ṭhatnemringai takkan Jisua thurchi ifel takka sîrin mi ân risei ngai a. Nikhomsela, Johana baptisma bang a lai riat a nit.

²⁶Inkhôm inah ihâi takkan thusîr a phut a, Priskili neh Akuila khan a thusîr an riatin chu an inah an ṭhui a, a ziangah Pathian Lampui thu ṭhatnemringai takkan an rilfia pêk a.

²⁷Khante, Apolova khan Akaia rama fe a tum iti an riatin chu Efesia iamtuhein an ithor a, amah an lei lôm theina rangin Akaia rama iamtuhei ziangah lekha an riziak pêk a. A zuk tlungin chu Pathian lungkhamna sika iamtu hong ichanghei ta rangin ṭangpuitu ṭha tak a chang a.

²⁸Vântlâng riatah Judahei khah a sêlindong ngai a, Pathian Thubu mangin Jisua chu Mesia a nitzia a înlang pêk ngai a nit.