Read Biete TIRTÔNHEI SINTHO 19 Bible Online

TIRTÔNHEI SINTHO 19 - Biete bible

TIRTÔNHEI SINTHO 19

¹Apolova khah Korinth khuaah a la om lâiin, Paulan tlângram tiang bial rifangin Efesi a hong tlung a. Amakhan iamtuhei ṭhenkah a mu a,

²ani khan, “Nin iam phutah khan Rithla Rithiang nin dong im?” itin ardon a. Anni khan, “Dong mang ung, Rithla Rithiang a om iti khom reh mang ung e,” an ti a.

³Ani khan, “Khate, ingkana baptisma tak im nin ichang?” a ti a. Anni khan, “Johana baptisma,” an ti a.

⁴Khanchu, Paulan an ziangah, “Johana khan sual rilet entîrnan baptisma ân chang ngai a; mihei ziangah ke nunga zuang rangtu Jisua nin la iam rang a nit itin a îril ngai a nit kha,” a ti a.

⁵Amakhah an riatin chu Pumapa Jisua rimingin baptisma an chang tâk a.

⁶Khangkana Paulan an chungah a kut arngat lâiah khan Rithla Rithiang an chungah a zuang ṭum a, ṭongriatloihein an ṭong a, Pathian thuhei an isîr tâk a.

⁷An rêngkan pasal sômleiinikah vêl an nit.

⁸Paula kha inkhôm inah ân khôm mai ngai a, thla thumka sung ihâi takkan thu â sîr a, Pathian Ram Thurchi ân ritukpui a, thlêm inê a tum ngai a.

⁹Nikhomsela, ṭhenkah chu an lesêt a, iam nuam mak a. Mipui makungah Pumapa Lampui thu khah an isîrinsiat a. Khasikin, Paulan anni khah a mâk a, iamtuhei khah a ṭhui a, nîn tin[25] Turana risei inah khan thu ân ritukpui ngai a.

¹⁰Khangkah khan kum inika sung a tho a; khasikah khan, Asia rama mi murdi, Judahei neh Grikhei khan Pumapa thu an riat tâk a.

¹¹Khante, Pathianin Paula kut imangin sinrikhêl danglam itam takkah a sin a.

¹²Paulan a lei imang ngai mâihuaihei neh a puan rizêmhei khah daminohei ziangah an chôi a, an dam tâk a, an sunga ramrilihei khom an suak a.

¹³Khanchu, ramrili ûmisua tuma rivâk ngai Judahei khomin Pumapa Jisua riming an mang a. Ramrilihei ziangah, “Paulan a îsîr ngai Jisua rimingin a sung ata suak rangin thu nang kin pêk,” an ti ngai a.

¹⁴Juda Thiampu Lal khatkah Skeva khan khangkana tho ngai nai pasal sarikah a nei a.

¹⁵Khannisela, ramrili khan an ziangah, “Jisua ki riat, Paula khom ki riat; nangni hi chu tuhei im nin init?” a ti a.

¹⁶Khanchu, a sunga ramrili nei khan a hong ibô a, â nê riai tâk a; kha in ata khah ipop neh an puan iṭet chitkan an itlân riai tâk a.

¹⁷Kha thu khah Efesia om Judahei neh Grikhei murdîn an riatin an ṭi tak tak a; khanchu, Pumapa Jisua riming kha an chôiinrisâng ual tâk a.

¹⁸Iamtuhei lâia itam takkah an hong a, vântlâng riatah an sual inpuangin an thil thonsualhei an inpuang a.

¹⁹Dôiithiam itam takkah khomin an lekhabuhei an hong bûm a, mi tin mitmuah an hâl a; khante, a man an sût a, sîngringakah a nitin an riat.

²⁰Khangkah takah natinsatin Pumapa thu kha ân dar a, â nê thiai tâk a.

²¹Kha rizoiah khan Paulan Makedonia ram neh Akaia ram rifang zoi baka, Jerusalema fe a tum a. “Amakhan ki fe zoiin chu Rom.khom kî sir sâ rang a nit,” a ti a.

²²Khasikin, Makedonia ramah khan ama ṭangpui ngai mi inikah, Timothea neh Erasta khah a lei tir bak a, ani chu Asia ramah a la om a.

²³Kha lâiah khan Pumapa Lampui thu sikin Efesiah khan buaina liantak a om a.

²⁴Demetria, tangkaruaa pathiannu Artemi Tempil rilim isiamtu[26] khan kutithiam itam takkah a mang a, sum itam takkah khom a man ngai a.

²⁵Ani khan ama sintho angkana sin ngai mi danghei khah a koibûm a, an ziangah, “Suapuihei, hi sin hih ei sum nâr a nit iti nin riat a.

²⁶Khanniseh, hi Paula sintho hih nangmani khomin nin mu a, nin riat a. Efesi bangah khom ni loiin Asia ram pumpuiah iti rang dôrin hi mi hin, ‘Kuta siam pathianhei hih pathian ni tlak mak e,’ itin mi itam takkah â thlêm inê zoi tâk a.

²⁷Khasikin, ei sintho hih min enkhûm an ti iti bang ni loiin, pathian roinpui tak Artemi Tempil hi mihein eninnuai an ta, Asia ram pumpui neh rammualin an ibiak ngai pathian roinpui khom rimang a ti iti hih iṭi ai om a nit,” a ti a.

²⁸Kha thu khah an riatin chu an ning a thik tak tak a, “Efesia Artemi hih roinpui tak a nit,” itin an ikhêk a.

²⁹Khanchu, a kho pumpui an buai tâk a; Gaia neh Aristarka, Makedonia rama mi, Paula inzinpuihei khah an man a, enhoi siamna munah an itlânpui a.

³⁰Paulan mipui lâia va ding a tum a; khanniseh, iamtuhein phal mak a.

³¹Khante, Asia ram ruaitu lianhei lâia ṭhenkah kha Paula malhei an nit a, khahei khom khan Paula khah enhoi siamna muna va lang loi rangin ṭong an hong inriat a.

³²Mipui ribûmhei lak chu an ikhêk suai a, ṭhenkan thu khatkah an ikhêkpui a, ṭhenkan thu dang an ikhêkpui a, an rêngkan an buai tâk a; mi tam takkah vângin chu an ribûmna bi khom reh mak a.

³³Judahei khan Alekzandara khah matiang an nam inlût sikin mipui lâia ṭhenkan chu ama sik nîng a ti an ti a. Alekzandara khan mipui rihu dâina rangin a kut a zâp a, mipui ziangah an thiam thu isîr a tum a.

³⁴Khannisela, ani khah Juda a nit iti an riat kaneh, dârkâr inika sung chu a rualin, “Efesia Artemi hih roinpui tak a nit,” iti ringotin an ikhêk dur dur a.

³⁵A nungkhônah an kho ziaktu khan mipuihei khah a ngôn dâi a. A ngôn dâi zoiin chu an ziangah, “Efesia mihei o, Artemi roinpui tak Tempil neh arlim lung rithiang rivâna rithoka zuang iṭul khah Efesia mihei hih â enkoltu nin nit iti mi tinin an riat a.

³⁶Hi thu hih tutên sêl thei no nih. Khasikin, nin rihu nin indâi ngêt rang a nit, ngaitua zon loiin îte nin tho rang ni mak e.

³⁷Hi nin mi hong ṭhuihei hih Tempil irok ngai ni mak a, ei pathiannu sîrinsehtu khom ni mak e.

³⁸Demetria neh a sinthopuihei khomin tu chungah khom thu inkhôk an neiin chu roirêltuhei ei nei a, roirêlna in khom ar-ong mai a nit, amah son va thlun riseh.

³⁹Khan, thu inkhôk dang pial nin neiin chu inkhôm ngaingirah ingaitua rang a nit.

⁴⁰Vuaninta thil hih rihel ituma buaina siam khomin mîn nen tum an ti iti khom hih iṭiom tak a nit. Hi ribûmna bi isîr rang lakin a bi isîr rang reh thei mang me a,” a ti a.

⁴¹Amakhah a ti zoiin chu mipui ribûmhei khah â ṭhîn tâk a.