Read Biete TIRTÔNHEI SINTHO 20 Bible Online

TIRTÔNHEI SINTHO 20 - Biete bible

TIRTÔNHEI SINTHO 20

¹Khante, rihu a dâi nungah khan Paulan iamtuhei a koibûm a, â thor a, â thla a. Khanungchu, a suak a, Makedonia ramah a fe tâk a.

²Kha ram khah arfang suak a, kôilômhei kha iṭha takka â thor zoiin Grik ram a tlung tâk a.

³Amakhan thla thumkah a thang nungin Suria ram tiang rikuanga fe rangin a tum a; khanniseh, Judahein ruang an lei chuan iti a riat sikin Makedonia tianga kîr a tum nôk tâk a.

⁴Purha naipa Sopatera, Beroia kho mi hei, Thesalonika kho mi Aristarka neh Sekunda hei, Derbe kho mi Gaia hei, Asia rama mi Tukika neh Trofima hei, Timothea hei an fe sa a.

⁵Khahei khah ma an lei isâk a, Troasah an ne lei ngâk a.

⁶Keini khom Bairiam Kût ṭumin Filipi khua rithokin rikuangin kin suak a, sûn ringaka nungah Troas kin va tlung a, amakhan sûn sarikah kin châm a.

⁷Khante, Pathiannî-a ibai ikhoi ranga kin ribûmin, Paula khan atûkah ife a tum sikin an ziangah thu â sîr a, zânlâi idênin thu â sîr a.

⁸Kin ribûmna chontan chuanchungah khan meiser itam takkah ichok a nit a.

⁹Khante, tlangvâl khatkah, arming Eutuka an iti kha, tukverah â ṭhung a, Paula thu sîr khah a sôt sikin inrimu a lei ibûk a, a lei in thlar a; in richuan ithumna rithokin a zuang tlâk tâk a. An zu rût tenan chu a lei thi tâk a.

¹⁰Nikhomsela, Paula khah a ṭum a, â bô a, â pom a, “Nin ilung inhâng no rei, a rang la chat mak e,” a ti a.

¹¹Khanungchu, Paula khah chuanchungah a lui nôk a, ibai a khoi a, an fâk tâk a. Isôt takkah, khua vâr rakkan a ṭongpui a; khanchu, a fe tâk a.

¹²Tlangvâlah khah idamin in tiang an ṭhui a, an rithla arngam tak tak tâk a.

¹³Khante, keini chu rikuangin Asso khua panin ma kin lei isâk a, Paula kha kea hong a tum sikin Asso khuaah rikuanga lei inchuang kin tum a; khangkana tho rangin a ne îril thlâm khom a nit.

¹⁴Asso khuaah a ne hong môkin chu rikuangah a hong chuang a, Mitulene kin tlung tâk a.

¹⁵Khan taka rithokin rikuang ngirin kin fe nôk a, atûkah Kio tuihual kin tlung a. Atûk nôkah Samo tuihual kin tlung a, kha tûk nôkah chu Mileti khua kin tlung tâk a.

¹⁶Khante, Paulan Asia ramah om insôt nona rangin Efesi khah rikuangin sûnpâl ai tum a nit. Ithei pai a nitin chu Jerusalemah Pentikos Kût imang a tum a, a irmot a nit.

¹⁷Paula khan Miletia rithokin Efesiah mi a tir a, koindang ulianhei a ziangah ân koi a.

¹⁸An zuang tlungin chu an ziangah, “Asia ram ki lût phut nî-a rithoka nin zianga ki om kârka ki omdân khah nin riat a.

¹⁹Judahein ruang an ne chuan sika dengtheina ne deltu pêl pumin, ringaiintlôm tak neh mitrithli pumin Pumapa sin ki tho ngai a.

²⁰Khangkah khan, rifena nin muna rang thu ṭhahei khah thup viat loiin, vântlâng lâiah neh nin inheiah nangni sîr pêkin nangni ki înrisei ngai a nit iti nin riat a.

²¹Judahei neh Grikhei ziangah khom, rileta Pathian tiang mâi ingat rang neh ei Pumapa Jisua Krista iam rangin lunginîk takkan thu ke ril ngai a.

²²Khante, atûnah hin Rithla Rithiang thu zômin Jerusalemah kî fe rang a nit, amakhan ki chungah im â tlung rang chu reh mang e.

²³Khannisela, Rithla Rithiangin lung in itângna neh buainan a ne ngâk ṭian iti bang hih kho tinah a ne înriat ngai a nit.

²⁴Pumapa Jisua Kristan a ne ipêk sin isin rang ki mabâk, Pathian lungkhamna Thurchi Ṭha isîr rang hi ki len thei ngânin chu, ki ringna khom hih inpâm inrupin kî be no a nit.

²⁵“Atûnah hin reh rei, nin rêngkan, Pathian Ram thurchi sîra ker vâk ker vâk ngainaheiah hin ne mu nôk khâi no tin u iti ki riat.

²⁶Khasikin, mi murdi thisenah khan kei chu kî hûl a nit iti vuanah hin nangni ki înriat a nit.

²⁷Pathian thiltum murdi îte thup viat loiin nangni ki îril riai tâk a nit kha.

²⁸Pathian koindang, ama ta ranga thisena a irchôk ienkol rangin nangmani neh nin berahei ta rangin ridîn rei; Rithla Rithiangin an chunga ruaitun nangni ai sia a nit.

²⁹Ke nungah chu inia inrîthei nin lâiah la hong lût an ta, berahei chu zua no nih iti ki riat.

³⁰Nangmani lâia mi ngêi khom hi mihei tiang iamtuhei an ṭhui theina rangin thutak khah milak inchang la om nin ti.

³¹Khasikin, ridîn titak rei, kum ithumkah sar sûn zâna mitrithli puma mi tin nangni ki inrisei ngai khah remai rei.

³²“Atûnah hin Pathian ziangah neh a lungkhamna thu-ah nangni ki înkol a nit; amakhan nangni a siam inlian thei a, mi rithianghei lâiah dongtum nangni a înnei thei a nit.

³³Tute sum manih, rângkachak manih, silbom manih khom rizuk ngai mang e.

³⁴Ki kut hin keimah neh ki champuihei inkhôkna murdi a sin isua ngai iti nangmani rengin nin riat a.

³⁵Sin itho zâltak isongin mi rât inohei ei san rang a nit iti lam tinrêngah nangni ken mu ngai a; ei Pumapa Jisua ngêiin, ‘Ila nêkan ipêkin lukhông a nei ual,’ ai ti khah remai rei,” a ti a.

³⁶Khante, Paulan kha thu khah â sîr zoiin chu an rêngkan rikhûk a dilpui a, an ṭongṭai a.

³⁷An rêngkan an ṭap tâk a; Paula khah an ikua, an tum an tum a.

³⁸An ilung innatu tak chu a mêl an mu nôk khâi no rang thu Paulan a îsîr pêk khah a nit. Khanchu, rikuang idênin an zu thla tâk a.