Read Biete TIRTÔNHEI SINTHO 21 Bible Online

TIRTÔNHEI SINTHO 21 - Biete bible

TIRTÔNHEI SINTHO 21

¹Anni khah he kin ithla zoiin chu rikuangin kin suak tâk a. Itlûn thalkan kin fe a, Kos tuihual kin tlung a; atûkah Rodi tuihual kin tlung nôk a, khan taka rithokin Patara khua kin tlung a.

²Amakhan Foiniki pan rang rikuang khatkah kin mu a, kin chuang a, kin fe nôk tâk a.

³Kupra tuihual ilangna mun kin phâk a, Kupra khah voitiang kin lôi a. Suria ram ipanin Tura khua kin tlung a, rikuanga neinun an iṭhum rang a nit sikin imuangah kin ṭum a.

⁴Amakhan iamtuhei ṭhenkah kin mu a, an ziangah sûn sarikah kin châm a. Anni khan Rithla Rithiangin â ril lamin Paula khah Jerusalemah fe loi rangin an khap a.

⁵Nikhomsela, anmani neh kin zoro mang rang ten a hekin chu kin suak a, kin fen chu iamtuhei khan an rêngkan, an nupuihei, an naihei neh khua ata tuipui rikam idênin an ne zu thla a, amakhan rikhûk idilin kin ṭongṭai a.

⁶Kha rizoiin chu he kin rithla a, rikuangah kin chuang a, anni chu in tiang an kîr nôk tâk a.

⁷Tura ata kha rikuangin kin fe mai a, Tolemai khua kin tlung a, amakhan iamtuhei chibai kin itûk a, an ziangah sûnkah kin châm a.

⁸Atûkah chu kin suak nôk a, Kaisari khua kin tlung a. Amakhan thuriltu Filipa inah kin lût a, a ziangah kin châm tâk a. Filipa khah Jerusalema rithlang upa sarikahei lâia mi kha a nit.

⁹Ani khan nai nungâk ilikah a nei a, khahei khan Pathian thu an isîr ngai a.

¹⁰Amakhan sûn itam takkah kin châm a, kin châm sungah khan Judai rama rithokin zânthla khatkah arming Agaba a zuang a.

¹¹Kin ziangah a hong a, Paula kongkhit khah a lâk a, a ke neh a kut a khâtin a khuap a; khanungchu, kin ziangah, “Jerusalema Judahein hi kongkhit ineitu hih khuap an ta, Jentailhei kutah bâng an ti, Rithla Rithiangin ai ti a nit,” a ti a.

¹²Kha thu khah kin riatin chu keimani neh kha khuaa mihei khan Paula khah Jerusalemah fe loi rangin kin ngên ngit a.

¹³Nikhomsela, Paulan kin ziangah, “Îtho tâk im hingkana nin iṭap nin iṭap a, ngaisiat ne sak a, indôpa ne siam nin itum? Pumapa Jisua sikin chu Jerusalema ikhuap rang bangin rihuam mang a, ithi rang khomin ki irhuam kêng ai nit,” a ti a.

¹⁴Thlêm inê chi a nit khâi no sikin, “Pathian richam cham ni ta riseh,” kin ti a, kin ithla tâk a.

¹⁵Kha rizoiin chu kin risiam a, Jerusalema fe rangin kin suak tâk a.

¹⁶Kaisari khuaa kôilôm ṭhenkahein an ne zui a, anni khan kin tlungna rang Manasona inah an ne ṭhui a; ani khah Kupra tuihuala kôilôm masahei lâia mi a nit.

¹⁷Jerusalem kin tlungin chu iamtuhein râiifân takkan an ne lei lôm a.

¹⁸Atûkah chu Paulan Jakoba inah a ne fepui a; amakhan koindang upahei murdi khom an lei om a.

¹⁹Khante, Paulan anni khah chibai â tûk zoiin chu a sinthona manga Pathianin Jentailhei lâia sin ai tho murdi khah a kip a kôiin â ril a.

²⁰Kha thu khah an riatin chu an rêngkan Pathian an inpâk a. Paula ziangah khan, “Suapuipa, Judahei lâiah iamtu an tam tâk tlia ni mu a, ei Dâna an ripêk tlia ni riat riai a.

²¹Khante, nangman Jentailhei rama Juda om murdihei ziangah Mosia Dân ima a, an naihei ser tan loi rang neh Juda balam zôm loi rangin nen risei ngai iti anni khan mi îsîr an iriat a nit.

²²Ingkam ei tho rang tâk? Ni hong tlung iti lak an iriat ngêt rang a nit a.

²³Khasikin, ni zianga kin ti lam angkah hin thon la kin nuam: Ṭonginkung nei lâi mi pasal ilikah kin ziangah an om a.

²⁴Khahei khah ṭhui inla, an lâiah rithâr san la, an sam ep man peh pêk roh. Khanchu, mi tinin ni thurchi mi îsîr an iriat khah idik make iti riang an ta, nangmah ngêi khom Mosia Dân izômin dân angkah takin ni lai om mai a nit iti riang an ti.

²⁵Jentailhei lâia iamtuhei thu chu mirmil biakna sa rithiangino manih, sa thisen manih, sa thitôt manih fah loi rang neh ridisia bâng rang a nit itin ei thurêlhei ei thon tâk kha,” an ti a.

²⁶Khanchu, atûkah chu Paulan kha mi pasal ilikahei khah a ṭhui a, an lâiah arthâr sa tâk a. Khante, Tempilah a lût a, rithârna sûn hek rang nî neh an sika ribôlna a lan pêk rang zoro thiampuhei ân riat a.

²⁷Khante, sûn sarikah a tluk lôk lôkin, Asia rama Judahein Paula kha Tempilah an mu a. Mipuihei an ithor a, Paula kha an man tâk a.

²⁸An ipâia, “Israel mihei, ne ṭangpui rei, hi mi hih ram tinah ife a, mi tin zianga ei nam hei, Mosia Dânhei neh hi Tempil isîrinseh ngaitu khah a nit hi; atûn khom Tempilah hin Jentailhei a hong ṭhui a, hi mun rithiang hih a înbor a nit,” an ti a.

²⁹Hingkana an tina chu matonah khan khopui sungah Efesi kho mi Trofima khah Paula ziangah an mu a, ani khah Tempilah ai ṭhui an iam sika a nit.

³⁰A kho pum rengin an buai sêp tâk a, mipuihei khah an itlân a, Paula khah an man a, Tempil ata an kâi isua a. Tempil kotbâihei an khâr zel tâk a.

³¹Khante, Paula khah ithat an tum lâiah khan Jerusalema mi murdi an buai iti thu Rom.sipai uliantak khan a lei riat a.

³²Ani khan sipai rizaka ruituhei neh sipaihei a ṭhui a, mipui tiang an itlân zel a. Mipuihei khan sipai uliantak neh sipaihei an mun chu Paula to khah an ringam tâk a.

³³Khanchu, sipai uliantak khan a hong nâi a, Paula khah a man a, rênbun inikah inbun rangin thu a pêk a. Khanungchu, mipuihei khah tûm ai nit neh im ai tho ardon a.

³⁴Mipui lâia ṭhenkan thu khatkan an ikhêk a, ṭhenkan thu dangin an ikhêk a. Kha kuarchok sikah khan îte a bul a bâl rianfel thei khâi mak a; khanchu, Paula khah kulpui sungah ân ṭhui tâk a.

³⁵Anni khan kalbi dênin an ṭhui a; mipuihei an put rai sikin sipaihei khan Paula khah an idom a.

³⁶Mipuihei khan, “That rei,” itia khêkin an zui tul tul a.

³⁷Khante, kulpuiah an ṭhui inlût rang lâiah khan, Paulan sipai uliantak ziangah, “Ni ziangah ṭong viat thei ki tîm?” a ti a. Sipai uliantak khan, “Grik ṭong nî thiam kêng na?

³⁸Khateh, Aigupta mi zoro thlenga mihei rihelpuia mi that ngai sângilikahei ramchâra fepuitu khah ni mak chêm a?” a ti a.

³⁹Paula khan, “Kei chu, Juda mi, Kilikia rama Tarsas khuaa suak ki nit, khua inlâr tak mi ki nit. Ngaihoi takkan mipui ziangah nen ṭong roh,” a ti a.

⁴⁰Khanchu, sipai uliantak khan phalna a pêk a, Paula khah kalbiah khan â ding a, mipui kha an dâirekna rangin a kut a zâp a. Mipui an dâidup tenan chu Hebrai ṭongin thu â sîr tâk a.