Read Biete TIRTÔNHEI SINTHO 22 Bible Online

TIRTÔNHEI SINTHO 22 - Biete bible

TIRTÔNHEI SINTHO 22

¹“Suapuihei neh pahei, ki thiam thu nin makungah ki îsîr hih ringai rei,” a ti a.

²Hebrai ṭongin a ṭong iti an riatin chu an dâidup nôk ual tâk a.

³Khante, Paulan, “Juda mi ki nit a, Kilikia rama Tarsas khuaa suak ki nit; nikhomsela, hi khopui ngêia Gamaliela inriseina nuaia seilian ki nit. Ei chibulhei Dân khah a kip a kôia zôm ranga inrisei ki nit a, vuansûna nangmani angkah ngirah hin Pathian ta ranga ripeh mi tak ki nit.

⁴Hi Lampui izuihei hih ithat rang dôrin ki nuam ki lo ngai a; a nupang â pan ki man a, tâng inah ki khum ngai a.

⁵Thiampu Laltak neh roirêlna buala ṭhung ngai upahei murdi khomin ki ṭong â dik iti an ne riatpui. An zianga rithokin Damaskaa om ei chipui Judahei ipeh rang lekha ki chôi a; khanchu, khan taka om hi Lampuia omhei denginthei ranga zingziria khuap puma Jerusalema hong iṭhui rangin ki fe a.

⁶“Khante, ki fe a, Damaska ki tlung rangin chu, sûnlâi tak a nit a, voikarengin rivâna rithokin ivâr ri-el takin a ne zuang el pum a.

⁷Rinêngah ke lîr a, rôl ki riat a, rôl khan, ‘Saula, Saula, ithôm ni nuam ni ne ilo?’ a ti a.

⁸Keiman, ‘Pumapa, tûm nî nit?’ ki ti a. Ani khan ki ziangah, ‘Nazaret Jisua, ni nuam ni lo ngai khah ki nit,’ a ti a.

⁹Ki champuihei khan ivâr kha chu an mu a, ne sôntu rôl kha chu reh mak e.

¹⁰Khante, keiman, ‘Pumapa, im ki sin rang?’ ki ti a. Pumapa khan ki ziangah, ‘Thoi inla, Damaskaah lût roh, amakhan thil tinrêng ni sin ranga Pathianin a lei înkung murdi khah irilin om ni ti,’ a ti a.

¹¹Kha vâr ri-el sikah khan ki mit a zîng khapa rammual mu thei khâi mang a, ki champuihein an ne ruai a, Damaskaah kin lût tâk a.

¹²“Kha khuaah khan mi khatkah, arming Anania, Pathian ngaisak mi neh Dan izôm mi, khantaka Juda om murdîn an imarit hi a om a.

¹³Ani khah ki ziangah a hong a, ki kôlah a ngir a, ‘Suapuipa Saula, ni mit hong vâr riseh,’ a ne ti a. Kha lâi takah khan ki mu nôk thei tak a, amah ki hang en a.

¹⁴Ani khan, ‘Ei chibulhei Pathianin a lungdo iria a, Mi Feltak khah imua, a rôl ngêi ireh rangin nang a înkung a nit.

¹⁵Ni mu neh ni riat thu-ah khan mi tin ziangah riatpuitu ni lai nit rang a nit.

¹⁶Atûnah hin rivuak loiin thoi inla, arming rilamin baptisma chang inla, ni sualhei risûnfâi roh,’ a ne ti a.

¹⁷“Khante, Jerusalemah ki kîr nôk a, Tempilah ki ṭongṭai lâiin inlârna ki mu a.

¹⁸Pumapa ki mu a, ani khan, ‘Rimot inla, Jerusalem mah zel roh; ki thurchi ni înpuang an îham ino rang a nit,’ a ne ti a.

¹⁹Khante, keiman, ‘Pumapa, inkhôm in tin ilût a, nangma iamtuhei murdi mana ito a, tâng ina khum ngai khah keimah hih ki nit iti an iriat a nit.

²⁰Ni riatpuitu Stefana thisen an isua lâiah khan, kei khom an lâiah ki om a, a ṭhat ki tipui a, â thattuhei puan ki lei ienkol pêk a nit kha’ ki ti a.

²¹Pumapa khan, ‘Fe roh, ilah taka Jentailhei ziangah nang kî tir rang a nit,’ a ne ti tâk a,” a ti a.

²²Khante, kha thurchi tenah khah an ringai a; khanungchu, rôl iring takkan an ipâia, “Inrimang rei, That rei, Iring inrup ni mak e,” an ti a.

²³An rêngkan an ikhêk a, an puanhei an ivirpai a, vâivut rivân tiang an tôm a.

²⁴Khanchu, sipai uliantak khan Paula khah kulpui sungah ân ṭhui inlût a, a chungah khangkah taka an ikhêkna bi khah riat suakna rangin ruiiruala rivêl thiai a, isualsân rangin thu a pêk a.

²⁵Rivêl ranga savun ruia an khuap zoiin chu Paulan a kôla ngîr sipai rizaka ruitu ziangah khan, “Rom.mi, thiamno inchang khom nino hih rivêl rangin dân ai nit mani?” a ti a.

²⁶Sipai rizaka ruitu khan kha thu khah a riat kaneh, sipai uliantak ziangah a fe a, “Ingkan im itho rang nî ti hi? Hi mi hih Rom.mi kêng ai nit,” a ti a.

²⁷Khanchu, sipai uliantak khah Paula ziangah a fe a, “Rom.mi nî nit mani? Ne ril roh,” a ti a. Paula khan, “O, ki nit” a ti a.

²⁸Sipai uliantak khan, “Kei chu Rom.mi nitna neina rangin sum kî thâm ok kêng,” a ti a. Paulan, “Kei chu Rom.mia suak pial ki nit,” itin a sâm a.

²⁹Khanchu, rivêl puma isualsân itumhei khan Paula kha an mâk zel tâk a, sipai uliantak khom khan Rom.mi a lei ikhuap a nit iti a riatin chu a ṭi tak tak tâk a.

³⁰Khante, atûkah chu Judahein îtho sik im Paula an însiat iti rianfel inuamin sipai uliantak khan thiampu lalhei neh roirêltuhei murdi ribûm zit rangin thu a pêk a. Khanchu, Paula khah a sût a, a ṭhui a, an makungah ân ngîr a.