Read Biete TIRTÔNHEI SINTHO 23 Bible Online

TIRTÔNHEI SINTHO 23 - Biete bible

TIRTÔNHEI SINTHO 23

¹Paula khan roirêltuhei khah a en ngit a, “Suapuihei, vuani tenah hin Pathian maa ki omdânah, ki sia neh ṭha riatnaah mahnia thiamno ritina îte nei mang e,” a ti a.

²Thiampu Laltak Anania khan Paula kôla ngirhei ziangah, “A bâi khah ibên pêk rei,” a ti a.

³Paula khan a ziangah, “Nangmah, bang nâlinvârpa, Pathianin nang ibên ngêt a ti. Dân angkana ne rêl rangin ne ṭhung a, nangman Dân no angkan nen bên rang nî ti na?” a ti a.

⁴Paula kôla ngîrhei khan a ziangah, “Pathian Thiampu Laltak kêng nî ngo na,” an ti a.

⁵Paula khan, “Suapuihei, ani khah Thiampu Laltak a nit iti kî riat ino a nit. Pathian Thubu-ah, ‘Nin nam roirêltu chungah ṭong ṭhano ni ti rang ni mak e,’ iti riziak a nit,” a ti a.

⁶Khante, Paulan ṭhenkah sadukaihei, ṭhenkah Farisaihei an nit iti a riat a, roirêltuhei lâiah khan iring takkan, “Suapuihei, kei khom Farisai ki nit a, Farisaihei naipa khom ki nit. Mithi thoinôkna a om iti tûngna ki nei sikin isualsânin kî om a nit hih,” a ti a.

⁷Amakhah a ti zoiin chu Farisaihei neh Sadukaihei khah an rikhal a, roirêltuhei khah lôm inikan an inṭhen tâk a.

⁸Sadukaihei khan “Mithi thoinôkna zel omak, vântirtôn hei, rithla hei khom omak e,” an ti a. Khanniseh, Farisaihei khan chu khahei khah an iiam riai a nit.

⁹Khanchu, buaina liantak a suak tâk a, Farisai tianga Dân inriseitu ṭhenkah an iding a, an sêl rak a, “Hi mi chungah hin thil dik ino îte mu ma ung e, rithlân manih, vântirtônin manih a îsôn khom a nit thei?” an ti a.

¹⁰Khante, an rikhal lia lia sikin, sipai uliantak khan Paula khah sânnôi chit an ti iti a ṭipui a. Khasikin, zu fe a, an lâi a ta Paula khah iṭhui suak a, kulpuia ṭhui inlût rangin sipaihei khah thu a pêk a.

¹¹Kha zânah khan Pumapa khah Paula kôlah a zuang iding a, a ziangah, “Ihâi takkan om roh; Jerusalemah ki thu ni înpuang angkah hin Rom.khuaah khom nen puang rang a nit,” a ti a.

¹²Atûk zîngah chu Juda ṭhenkahei khah Paula inrinangna rang lungvâr isiamnin an ribûm a. Paula an that mâkah chu îte fah loia in loi rangin vâni an risâm a.

¹³Hi lungvâr isiamhei hih sômilika nêka tam ual an nit.

¹⁴Khanchu, anni khah thiampu lalhei neh upahei ziangah an fe a, “Paula kin that mâkah chu îte ritem loi rangin vâni kin irsâm tâk a nit.

¹⁵Khasikin, atûn nangmani neh roirêltuhein a thu ifel uala ngaitua rang itum i-angin, Paula kha nin zianga zuang iṭhui rangin sipai uliantak ziangah ṭong ithlun rei. Nin ziang a zuang tlung maa lei ithat rangin kin irsiam ṭian a nit,” an ti a.

¹⁶Khannisela, Paula farnu naipa khan ithat ituma ruang an lei chuan rang thu khah a lei riat a, kulpui sungah khan a lût a, Paula a va ril a.

¹⁷Khanungchu, Paula khan sipai rizaka ruitu khatkah a koi a, “Hi tlangvâl hih sipai uliantak ziangah ṭhui roh, a ziangah thu imanih iril rang ai nei a nit,” a ti a.

¹⁸Khanchu, sipai uliantak ziangah a ṭhui a, “Paula, mi tâng khan a ne koi a, hi tlangvâl hih ni zianga hong iṭhui rangin a ne ngên a, ni ziangah thu imanih isîr rang ai nei nîng a ti,” a ti a.

¹⁹Sipai uliantak khan a kutah â tûk a, ân fiarpui a, “Im ne ril rang nî nei?” a ti a.

²⁰Ani khan, “Judahein Paula thu hih ifel uala ngaitua rang itum angkan naktûk zîngah roirêltuhei zianga ṭhui rangin nang hong inih rang an inrual a.

²¹Khannisela, an thu lei ôi no roh, an lâia mi sômilika nêka tamin Paula an that mâkah chu îte fah loi rang neh in loi ranga vâni risâmin ruang an lei ichuan mai a nit. Atûnah hin risiam diamin ni thu bang an ingâk tâk a nit,” a ti a.

²²Khante, sipai uliantak khan, “Hi thu hih ki ziangah ne sir iti tute iril tlak no roh” a ti a. Khanchu, tlangvâl khah ân fe tâk a.

²³Khanungchu, sipai uliantak khan sipai rizaka ruitu inikah a koi a, “Vuanzân zân arfe ruamin [27] Kaisaria fe rangin sipai rizanikah, sakor chungchuang mi sômsarikah neh ifei ichôi mi rizanikah inrisiam rei.

²⁴Khabanah, Paula chuangna rang sakorhei inrifûk sa rei, idam takka Ram-optu Felika ziang nin ithlun rang a nit,” a ti a.

²⁵Khante, hingka hin lekha arziak a:

²⁶“Klaudia Lusia hin Ram-optu maritomtak Felika chibai a bûk:

²⁷Hi mi hih Judahein an man a, ithat rang an ti lâiin sipaihei iṭhuiin ki fe a, Rom.mi a nit iti ki riat sikin ki sanisua a.

²⁸Khante, ithat an tumna bi iria ki nuam a, an roirêltuhei ziangah khom ki zu fepui a.

²⁹An Dân thu itea manih an inô a nit iti ki riat a; khannisela, thina rang neh tâng ina khumna rang rak îte a thonsual iti kî riat thei ino a nit.

³⁰Khante, Judahein ithat itumin ruang an chuan iti mîn an ne ril kaneh ni ziangah ki hong itir zel a nit. Â nôtuhei khom a chunga thu inkhôk inei kangân chu ni makunga hong isîr rangin thu ki pêk a nit,” itin.

³¹Khanchu, sipaihei khan a thupêk angkan Paula khah an ṭhui a, kha nî zânah khan Antipatri an dênpui a.

³²Atûkah chu sakor chungchuang mihei khah Paula ṭhui mai rangin an fe a, sipai danghei khan chu an mâk a, kulpuiah an kîr nôk tâk a.

³³Khante, Kaisari an tlungpui a, Ram-optu ziangah lekhathon khah an pêk a, Paula khom a makungah an inding a.

³⁴Ram-optu khan lekhathon khah a tep zoiin chu Paula omna ram ardon a. Kilikia ram mi a nit iti a riatin chu,

³⁵a ziangah, “Nang inôtuhei an zuang tlung tikah ni roi ngaituang ki ti,” a ti a. Khanchu, Paula khah Heroda inah[28] isiaa vêng inṭha rangin thu a pêk a.