Read Biete TIRTÔNHEI SINTHO 24 Bible Online

TIRTÔNHEI SINTHO 24 - Biete bible

TIRTÔNHEI SINTHO 24

¹Khante, sûn ringaka nungah chu Thiampu Laltak Anania neh upa ṭhenkahei khah dânpu Tertula ṭhuiin an zuang tlung a, Paula an nôna thu khah Ram-optu ziangah an ithlun a.

²Paula an koi isua zoi tenan chu Tertula khan hingka hin a nôna thu a hang isîr tâk a: “Felik maritomtak, nangma zârin ringei takkan kin om tâk a, ni vârna sikin kin rama mihei ta rangah hin thil iṭha no tak tak hei kha,

³lam tinrêngin mun tinah siaminṭhat a hong init tâk hi tiklâi khomin kin ilôm tak tak a nit.

⁴Ni zoro nang ken châi sôt nona rangin itôitekan hang isîr ki ti, lungkham takka ki ṭong ner ngai pêk rangin nang kî ngên a nit.

⁵Hi mi hih ibuaipui iom tak, ram tina Juda murdi lâia buaina siam ngai, Nazaret pôl ruaitu tak a nit iti kin riat a.

⁶Tempil khom innim a tum a, kin iman tâk a nit. Kin dân angkana a chungthu rêl kin tum a;

⁷khanniseh, sipai uliantak Lusia a hong a, zâlrâtin a ne hong isut a nit. Khante, ama nôtuhei khah ni makunga lang rangin thu a ne ipêk a nit.

⁸Nangmah rengin dôp inla, kin nôna bihei murdi hih ama zianga rithokin rianfel thei ni ti,” a ti a.

⁹Judahei khomin a nôna khah an thlop a, “Khahei murdi khah â dik a nit,” an lei ti a.

¹⁰Khanchu, Ram-optu khan inṭong rangin kut izâpa a koiin chu Paula khan, “Kum itam takka hi chihei roirêltu ni lei nit tâk iti ki riat sikin ilôm takkan ni makungah ki thiam thu ki îsîr rang a nit.

¹¹Jerusalemah Pathian ibeh ranga ki hang fe khah sûn sômlei sûn nika ban la ni no nih iti, nangmah rengin reh thei ni ti.

¹²Tempila manih, inkhôm inheia manih, khopui sung takmunah khom tute ki sêl iti neh buaina siam ranga mipui ke thor iti tutên reh mak.

¹³Atûna ni makunga an ne nôna thu khom hih a kip a kôia sîr rang îte reh no nih.

¹⁴Nikhomsela, hi thu hih ni makungah inpuang ki ti: ‘Inriseina dikino’ an iti Lampui dân izuiin ei chibulhei Pathian ki biak ngai a. Mosia Dân neh zânthlahei lekhabua riziak murdi ki iam riai a.

¹⁵Pathian ki iam a, mi fel neh mi sualhei thoinôkna a om iti khom ki iam a; amakhah anmani ngêi khomin an iiam a nit a.

¹⁶Khasikin, tiklâi khomin Pathian neh miriam maah sia neh ṭha riatna feltak inei kî tum mai ngai a nit.

¹⁷“Kum itam takkah Jerusalem ki mâk nungin ki chipuihei rang thilpêk ichôiin neh ribôlna lan rangin ki hang fe a.

¹⁸Khangkana ki tho lâi, rithârna ki nei zoiah khan Tempilah an ne mu a; khanniseh, kha zoroah khan mipui ribûm khom omak a, buaina khom omak e.

¹⁹Nikhomsela, Asia rama Juda ṭhenkahei an om a; khahei ngêi khan ki chungah thu inkhôk an inei a nitin chu hin ihongin ni makungah ne nô riseh.

²⁰Anitnole, hintaka honghei hin roirêltuhei makungah ki ngîr lâiah khan im kî thôn sual an imu an isîr rang a nit.

²¹An makunga ke ding lâia hi thu bâikah, ‘Mithi thoinôkna a om iti tûngna ki nei sikin vuansûnah hin isualsânin kî om a nit hih,’ ki ti sik kha a nit no ngânin chu,” a ti a.

²²Khante, Felika khan Lampui thu khah a lei iriat infel ok sikin a roirêlna khah a khâr hi tâk a. An ziangah, “Sipai uliantak Lusia a zuang tlung tikah nin thu la ngaitua ta rong,” a ti a.

²³Khanchu, Paula kha zalen taka in-om a, a malhein a sin an itho pêk khom khap loia enkol rangin sipai rizaka ruitu ziangah khan thu a pêk a.

²⁴Khante, sûn izâka nunga manih chu Felika kha a nupui Drusili, Juda mi hong iṭhuiin a hong nôk a. Paula khah an koi a, Krista Jisua iamna thu a îsîr khah an ringai a.

²⁵Felna thu hei, mahni ri-enkol zoina thu hei, Roirêlna Nikhua la hong itlung rang thu hei Paulan â sîr pêk lâiin Felika khan iṭiom a ti tak tak a, a ziangah, “Fe nôk hi ta roh, zoron ṭum ki nei tikah nang la koi nôk ta rong,” a ti a.

²⁶Paulan sum a pêk a tûng sa a; khasikin, a koi mai a, ai ṭongpui mai ngai a nit.

²⁷Kum inikah a hek tenan chu Felika khah Porkia Festan a thûl a. Felika khan Judahei inlôm a nuam a, Paula khah tâng inah a mâk tâk a.